જીએસઇબીના વિદ્યાર્થીઓના માર્કશીટ, પ્રમાણપત્રમાં નામ, અટક, જન્મ તારીખમાં સુધારો કરવા સહિતની વિગતોમાં ફી સાથેનો સુધારો ઓનલાઇન કરી શકાશે. બોર્ડ સાથે સંકળાયેલી સ્કૂલોના વિદ્યાર્થીઓના માર્કશીટ-પ્રમાણપત્ર વેરિફિકેશન, વિદેશ જવા માટેના સીલ કવરમાં નામ, અટક, પિતાનું નામ, જન્મ તારીખમાં સુધારો, ટેટ વેરિફિકેશન, ટેટ ડુપ્લિકેશન, માર્કશીટ જેવી સેવાની ફી બૅન્ક મારફતે ચલણ દ્વારા ભરાતી હતી. આ માટે વિદ્યાર્થીઓ અને બેંકકમાં જઈને રૂબરૂ ચલણ મારફતે ભરવી પડતી હતી. આ વ્યવસ્થામાં સુધારો કરીને ક્યુઆર કોડ મારફતે યુપીઆઇ, નેટ બૅન્કિંગ, ડેબિટ કાર્ડ તથા ક્રેડિટ મારફતે ફી ભરી શકાય તેવી વ્યવસ્થા કરવામાં આવી છે.
ગુજરાત શિક્ષણ બોર્ડના સચિવ રાકેશે જણાવ્યું કે, ગુજરાતના વિવિધ ભાગોમાંથી આવતા બહારગામના વિદ્યાર્થીઓ અને વાલીઓને ઓફલાઇન પ્રક્રિયા અંતર્ગત ફી બેંકના નિયત સમયગાળામાં રૂબરૂ ચલણ ભરવા જવું પડતું હતું. આ પ્રક્રિયા પણ વિદ્યાર્થીઓ અને વાલીઓના હિતમાં ઓનલાઇન કરી દેવામાં આવી છે. જેનો સીધો જ લાભ રાજ્યના જિલ્લા મથકો અને તાલુકા મથકેથી ગાંધીનગર આવતા વાલીઓ અને વિદ્યાર્થીઓને થશે.