ઓવરસ્પીડમાં વાહન હંકારવું અને સ્ટંટ કરવાનો અત્યારે એક ક્રેઝ બની ગયો છે. જાહેર રોડ પર બેફામ વાહન હંકાવી લોકો પોતાના અને બીજાના પણ જીવ જોખમમાં મૂકી રહ્યા છે તેમજ દિન-પ્રતિદિન અકસ્માતની ઘટનાઓમાં વધારો થતા અમદાવાદ RTO દ્વારા મોટી કાર્યવાહી કરવામાં આવી છે. ટ્રાફિક નિયમોનું પાલન ન કરનારા 250 લોકોના લાઈસન્સ સસ્પેન્ડ કરવામાં આવ્યા છે. એમાં પણ ફેટલ એટલે કે અકસ્માત સર્જી નિર્દોષનો જીવ લીધો હોય એવા કેસમાં સૌથી વધુ લાઈસન્સ સસ્પેન્ડ કરવાની RTO દ્વારા કાર્યવાહી કરવામાં આવી છે.
અમદાવાદ શહેરના અનેક રસ્તાઓને વાહનચાલકો રેસિંગ ટ્રેક સમજી ગયા છે. એસ.જી હાઈ-વે હોય કે રિવરફ્રન્ટ રોડ સહિતના રસ્તાઓ પર જોખમી સ્ટંટ કરતા હોય એવા અનેક વીડિયો પણ સામે આવતા હોય છે તો કેટલાક લોકો ટ્રાફિકના નિયમનું પાલન જ કરતા નથી. સ્પીડમાં વાહન ચલાવવું, મોબાઈલ પર વાતચીત કરવી અને હેલ્મેટ કે સીટબેલ્ટ વગર ડ્રાઇવિંગ જેવી બેદરકારી લોકો માટે રોજિંદી થઈ ગઈ છે. જેના કારણે અમદાવાદ શહેરમાં દરરોજ નાના-મોટા અકસ્માતની ઘટના સામે આવી રહી છે. જેના કારણે જ RTO અને ટ્રાફિક પોલીસ દ્વારા ડ્રાઈવ પણ ચલાવવામાં આવે છે.
શહેરમાં વધતા જતા અકસ્માતની ઘટનાઓ રોકવા અને ડ્રાઇવિંગ લાયસન્સને લક્ઝરી સમજી બેઠેલા લોકો સામે RTO દ્વારા કડક કાર્યવાહી કરવામાં આવી છે. માત્ર 9 મહિનામાં 250 જેટલા લોકોના લાઈસન્સ સસ્પેન્ડ કરવામાં આવ્યા છે. તેમાં પણ સૌથી વધુ બેફામ વાહન હંકાવી અન્ય નિર્દોષ નાગરિકનો જીવ લીધો લેવા કેસમાં 110 જેટલા લાઈસન્સ સસ્પેન્ડ કરવાની RTO દ્વારા કાર્યવાહી કરવામાં આવી છે તેમજ બીજા સૌથી વધુ ઓવરસ્પીડમાં વાહન ચલાવતા પકડાયા હોય એવા 77 લોકો સામે કાર્યવાહી કરીને તેમના પણ લાઈસન્સ સસ્પેન્ડ કરવામાં આવ્યા છે તેમજ 3 કરતા વધુ ચલણ આવ્યા હોય તે લોકોના પણ લાઈસન્સ સસ્પેન્ડ કરવામાં આવ્યા છે. તમામ કેસમાં ગંભીરતાને ધ્યાને લઈ 6 મહિના કે તેથી વધુ સમય માટે લાઈસન્સ સસ્પેન્ડ કરવામાં આવ્યા છે.
અમદાવાદ RTOના નીરવ બક્ષીએ જણાવ્યું હતું કે, જાન્યુઆરીથી સપ્ટેમ્બર સુધીમાં અમદાવાદ શહેર-જિલ્લામાં 250 લાઈસન્સ રદ કરવામાં આવ્યા છે. આ લાઈસન્સ અલગ-અલગ ગુનામાં રદ કરવામાં આવેલા છે. જેમાં ઓવરસ્પીડ, ફટલ રન, ડ્રંક એન્ડ ડ્રાઈવ સહિતના કેસમાં લાઈસન્સ સસ્પેન્ડ કરવામાં આવ્યા છે. 6 મહિના સુધી લાઈસન્સ સસ્પેન્ડ કરવામાં આવ્યા છે તેમજ અત્યારે પણ રોડ સેફ્ટી અંતગર્ત ટ્રાફિક પોલીસ અને RTOની ડ્રાઈવ ચાલી રહી છે. જો તેમાં પણ કોઈ રોંગ સાઇડ ચલાવતા અથવા ઓવરસ્પીડમાં વાહન ચલાવતા કોઈ પકડાશે તો તેનું લાઈસન્સ પણ આગામી દિવસમાં સસ્પેન્ડ કરવામાં આવશે.
વધુમાં તેઓએ જણાવ્યુ કે, જેમાં ત્રણ કરતા વધુ ચલણ ઇસ્યૂ કરવામાં આવ્યા છે, તે તમામના લાઈસન્સ પણ સસ્પેન્ડ કરવામાં આવ્યા છે. જ્યારે કોઈનું લાઈસન્સ સસ્પેન્ડ થયું હોય અને તે વાહન હંકાવતા પકડાય તો તેનું લાઈસન્સ કાયમી ધોરણે સસ્પેન્ડ કરવાની કાર્યવાહી કરવામાં આવતી હોય છે. જેના 3 કે 6 મહિના માટે લાઈસન્સ સસ્પેન્ડ કરવામાં આવ્યા છે, તે પોર્ટલ દ્વારા તેમનો સમયગાળો પૂરો થતા ઓનલાઈન એન્ટ્રી કરીને RTO કચેરીએ લાઈસન્સ લેવા આવવું પડે છે. સગીર વયના બાળકો અકસ્માત સર્જે અને કોઈનું મોત થયું અથવા ચલાવતા પણ પકડાય તો આવા કેસમાં મોટર વ્હીકલ એક્ટ 199 અંતર્ગત કાર્યવાહી કરવામાં આવતી હોય છે. જેમાં કોર્ટ દ્વારા સૂચનાના આધારે કાર્યવાહી કરવામાં આવતી હોય છે.