ભારતના ટેક્સી માર્કેટમાં મોટો ઉલટફેર થવા જઈ રહ્યો છે. અત્યાર સુધી દેશમાં ઓલા (Ola) અને ઉબેર (Uber) નું પ્રભુત્વ રહ્યું છે, પરંતુ હવે વિયેતનામની જાણીતી ઇલેક્ટ્રિક કાર ઉત્પાદક કંપની વિનફાસ્ટ (VinFast) એ ભારતીય ટેક્સી માર્કેટમાં ધમાકેદાર એન્ટ્રી કરી લીધી છે. કંપની ભારતમાં માત્ર પ્રાઇવેટ ઇલેક્ટ્રિક ગાડીઓ વેચવા પૂરતી સીમિત નહીં રહે, પરંતુ હવે સામાન્ય જનતા માટે પોતાની ઇલેક્ટ્રિક ટેક્સી સેવા પણ શરૂ કરવા જઈ રહી છે.
વિનફાસ્ટે ભારતમાં ‘Green SM’ (ગ્રીન એસએમ ઇન્ડિયા પ્રાઇવેટ લિમિટેડ) નામથી પોતાના બિઝનેસની સત્તાવાર શરૂઆત કરી દીધી છે.
ડ્રાઇવરો માટે બમ્પર પગાર
એક અહેવાલ અનુસાર, ગ્રીન એસએમ કંપની ઉત્તર ભારતમાં મોટા પાયે પગપેસારો કરવા જઈ રહી છે. કંપની શરૂઆતમાં 10,000 ‘વિનફાસ્ટ લિમો ગ્રીન’ (VinFast Limo Green) ઇલેક્ટ્રિક એમપીવી (MPV) કારો રસ્તા પર ઉતારવાની યોજના ધરાવે છે. આ વિશાળ કાફલાને ચલાવવા માટે કંપનીએ ડ્રાઇવરોની ભરતી પણ શરૂ કરી દીધી છે. સોશિયલ મીડિયા પર સામે આવેલા વીડિયો અનુસાર, કંપની પોતાના ડ્રાઇવરોને દર મહિને 35,000 રૂપિયાથી લઈને 40,000 રૂપિયા સુધીનો શાનદાર ફિક્સ પગાર આપી રહી છે.
બાઇક ટેક્સી સેક્ટરમાં પણ ઉતરવાની તૈયારી
કંપનીનો આ મેગા પ્લાન માત્ર ફોર-વ્હીલર ટેક્સી પૂરતો સીમિત નથી. આગામી સમયમાં ગ્રીન એસએમ ભારતમાં ઇલેક્ટ્રિક મોટરસાઇકલ (બાઇક ટેક્સી) સેગમેન્ટમાં પણ ધમાકો કરવાની તૈયારી કરી રહી છે. આ માટે કંપનીએ 1,00,000 થી વધુ ઇલેક્ટ્રિક બાઇક્સ ઉતારવાનો રોડમેપ તૈયાર કર્યો છે. ભારતમાં આ બિઝનેસનું સંચાલન ગુરુગ્રામ (હરિયાણા) માં આવેલી હેડ ઓફિસથી થશે અને કંપનીની ઓથોરાઇઝ્ડ કેપિટલ (અધિકૃત મૂડી) 254 કરોડ રૂપિયા છે.
આ કંપનીઓ વચ્ચે જામશે જંગ
ગ્રીન એસએમ કંપની પોતાના કાફલામાં લિમો ગ્રીન એમપીવી ઉપરાંત વિનફાસ્ટની પ્રખ્યાત કોમ્પેક્ટ ઇલેક્ટ્રિક એસયુવી VF5 નો પણ સમાવેશ કરી રહી છે. વિયેતનામી કંપનીની આ આક્રમક એન્ટ્રીથી ભારતીય બજારમાં પહેલેથી હાજર ઓલા, ઉબેર અને બ્લુસ્માર્ટ (BluSmart) જેવી ઈવી ટેક્સી કંપનીઓ વચ્ચે ગ્રાહકોને આકર્ષવા માટે જોરદાર કૂટનીતિક જંગ જામશે. આ સ્પર્ધાનો સીધો ફાયદો ભારતીય ગ્રાહકો અને રોજગાર મેળવનારા ડ્રાઇવરોને થશે.