આ મહિને ત્રીજીવાર પેટ્રોલ અને ડીઝલના ભાવ વધ્યા છે, જેના કારણે મધ્યમ વર્ગમાં મોંઘવારીનો ડર વધી રહ્યો છે. વડાપ્રધાન નરેન્દ્ર મોદીએ થોડા દિવસો પહેલા દેશવાસીઓને ઈંધણ બચાવવા અપીલ કરી હતી, જેનાથી સ્પષ્ટ સંકેત મળ્યો હતો કે આવનારા દિવસોમાં પેટ્રોલ-ડીઝલના ભાવ વધી શકે છે. પેટ્રોલિયમ મંત્રીએ પણ કહ્યું હતું કે, કંપનીઓને દરરોજ 1,000 કરોડ રૂપિયાનું નુકસાન થઈ રહ્યું છે અને એક મર્યાદા પછી ભાવ વધારવો જરૂરી બની જાય છે.
છેલ્લા 10 દિવસમાં પેટ્રોલ લગભગ 5 રૂપિયા પ્રતિ લીટર મોંઘું થયું છે. હવે સવાલ એ છે કે, જો પેટ્રોલ અને ડીઝલને પણ GST હેઠળ લાવવામાં આવે તો એક લીટર પર કેટલો ફાયદો થશે?
હમણાં પેટ્રોલ-ડીઝલ પર કેટલો ટેક્સ લાગે છે?
GST હેઠળ લાવવાથી કેટલો ફાયદો થશે તે સમજવા માટે પહેલા જાણીએ કે હાલમાં કેટલો ટેક્સ લાગે છે. દિલ્હીમાં 23 મેના રોજ પેટ્રોલનો ભાવ 99.51 રૂપિયા પ્રતિ લીટર છે. તેમાં પેટ્રોલનો મૂળ ભાવ માત્ર 66.29 રૂપિયા છે. તેના પર કેન્દ્ર સરકાર 11.90 રૂપિયા પ્રતિ લીટર એક્સાઈઝ ડ્યૂટી વસૂલે છે, જ્યારે દિલ્હી સરકાર 16.03 રૂપિયા વેટ લે છે અને ડીલરને 4.42 રૂપિયા પ્રતિ લીટર કમિશન મળે છે.
ડીઝલ પર વધુ ટેક્સ
ડીઝલનો મૂળ ભાવ દિલ્હીમાં 67.36 રૂપિયા પ્રતિ લીટર છે. તેના પર કેન્દ્ર સરકાર 7.80 રૂપિયા એક્સાઈઝ ડ્યૂટી અને દિલ્હી સરકાર 13.39 રૂપિયા વેટ વસૂલે છે. ડીલરને 3.03 રૂપિયા પ્રતિ લીટર કમિશન મળે છે. આ બધું મળીને ડીઝલનો ભાવ 92.49 રૂપિયા પ્રતિ લીટર થાય છે.
હમણાં કુલ કેટલો ટેક્સ લાગે છે?
હમણાં પેટ્રોલ પર લગભગ 42% અને ડીઝલ પર 32% જેટલો ટેક્સ લાગે છે. એટલે રિફાઈનરીમાંથી નીકળતું સસ્તું પેટ્રોલ-ડીઝલ બજારમાં આવતાં મોંઘું થઈ જાય છે. આ ટેક્સથી મુક્તિ માટે વેપારી સંગઠનો પણ પેટ્રોલિયમ પ્રોડક્ટ્સને GST હેઠળ લાવવાની માગ કરી રહ્યા છે.
18% GST લાગશે તો કેટલો ફાયદો?
હવે મુખ્ય મુદ્દો એ છે કે, જો પેટ્રોલ-ડીઝલ પર 18% GST લાગશે તો કેટલો ફાયદો થશે? દિલ્હીમાં પેટ્રોલનો મૂળ ભાવ 66.29 રૂપિયા છે. 18% GST લાગશે તો કુલ ટેક્સ 11.93 રૂપિયા થશે અને પેટ્રોલનો ભાવ 78.22 રૂપિયા પ્રતિ લીટર થશે.
28% GST લાગશે તો શું થશે?
જો પેટ્રોલ પર 28% GST લાગશે તો પણ પ્રતિ લીટર ઘણો ફાયદો થશે. 28% GST મુજબ કુલ ટેક્સ 18.56 રૂપિયા થશે અને પેટ્રોલનો ભાવ 84.85 રૂપિયા પ્રતિ લીટર રહેશે, જે હાલના ભાવ કરતાં લગભગ 16 રૂપિયા સસ્તું છે. જો સરકાર 28% ટેક્સ સાથે થોડો સેસ પણ વસૂલે તો પણ પ્રતિ લીટર 10થી 12 રૂપિયા સુધી સસ્તું મળી શકે છે.