શાંતિ કરારના ટ્રમ્પના દાવાને ઈરાને ફગાવ્યો, કહ્યું- હોર્મુઝ સ્ટ્રેટ પર અમારું જ નિયંત્રણ રહેશે

હોર્મુઝ અને પરમાણુ મુદ્દે Iran નો ઈનકાર

ટ્રમ્પે દાવો કર્યો હતો કે આ કરાર હેઠળ વ્યૂહાત્મક દરિયાઈ માર્ગ ‘હોર્મુઝ સ્ટ્રેટ’ (Strait of Hormuz) ને સંપૂર્ણપણે ખોલી દેવાશે. જોકે, ઈરાને આ દાવા પર પાણી ફેરવતા સ્પષ્ટ કર્યું છે કે હોર્મુઝ પર તેમનું જ નિયંત્રણ રહેશે અને તેઓ માત્ર યુદ્ધ પહેલા જેટલા જહાજોને જ મંજૂરી આપશે.

બીજી તરફ, ઈરાનની રિવોલ્યુશનરી ગાર્ડ્સ (IRGC) એ ટ્રમ્પના નિવેદનને માત્ર ‘પ્રચાર’ ગણાવીને સ્પષ્ટ કર્યું છે કે પરમાણુ કાર્યક્રમને લઈને કોઈ સહમતી સધાઈ નથી. ઈરાનના વિદેશ મંત્રાલયના મતે આ વાટાઘાટોનો મુખ્ય હેતુ માત્ર દરિયાઈ હુમલા રોકવાનો અને આર્થિક પ્રતિબંધોમાં છૂટછાટ મેળવવાનો છે.

પાકિસ્તાન કરશે આગામી બેઠકની યજમાની

આ દરમિયાન પાકિસ્તાનના પીએમ શાહબાઝ શરીફે ટ્રમ્પના શાંતિ પ્રયાસોના વખાણ કર્યા છે. પાકિસ્તાનના આર્મી ચીફ અસીમ મુનીરે પણ ટ્રમ્પ સાથે ફોન પર ચર્ચા કરી છે. શાહબાઝ શરીફે આશા વ્યક્ત કરી છે કે બંને દેશો(Iran – us) વચ્ચે આગામી રાઉન્ડની બેઠક પાકિસ્તાનમાં યોજાશે અને તેઓ તેની યજમાની કરવા માટે સંપૂર્ણ તૈયાર છે.