આ લોન્ચ MCX ના સિલ્વર ડેરિવેટિવ્ઝ પોર્ટફોલિયોને વધારવા જેવું છે, જેમાં હાલમાં 30 કિલો, 5 કિલો અને 1 કિલોના સિલ્વર ફ્યુચર્સ કોન્ટ્રેક્ટ્સ તેમજ 5 કિલો અને 30 કિલો મંથલી ટેન્યોરના સિલ્વર ઓપ્શન કોન્ટ્રેક્ટ્સનો સમાવેશ થાય છે. MCX ના મેનેજિંગ ડિરેક્ટર અને CEO પ્રવીણા રાયે જણાવ્યું હતું કે, “સિલ્વર 100 ફ્યુચર્સ કોન્ટ્રેક્ટ ભારતના સિલ્વર ઉદ્યોગમાં વ્યવસાયોને કિંમતમાં થતી વધ-ઘટ સામે રક્ષણ (હેજિંગ) આપવામાં મદદ કરે છે. સ્થાનિક જ્વેલરી વ્યવસાયો હવે તેમની ઇન્વેન્ટરીની જરૂરિયાતો અનુસાર વધુ માત્રામાં હેજ કરી શકે છે અથવા ડિલિવરી લઈ શકે છે. આનાથી વધુ મૂડી રોકવાની અથવા વાસ્તવિક વ્યવસાયિક જરૂરિયાતો કરતાં વધુ એક્સપોઝર લેવાની જરૂરિયાત ઘટી જાય છે.” રાયે જણાવ્યું હતું કે, આ કોન્ટ્રેક્ટ રિટેલ સહભાગીઓને સમય જતાં ઓછી માત્રામાં ચાંદીમાં રોકાણ કરવામાં પણ મદદ કરશે, જ્યારે તેઓ એક સુરક્ષિત રેગ્યુલેટેડ એક્સચેન્જ ફ્રેમવર્ક દ્વારા ટ્રેડિંગ કરશે.
સિલ્વર 100 કોન્ટ્રેક્ટમાં 100 ગ્રામનું ટ્રેડિંગ યુનિટ હશે, જેમાં પ્રાઇઝ કોટેશન 10 ગ્રામ પર આધારિત હશે અને અમદાવાદથી કોટ કરવામાં આવશે, જેમાં ઇમ્પોર્ટ ડ્યુટી અને કસ્ટમ્સ લેવી (Customs Levy)નો પણ સમાવેશ કરવામાં આવેલ છે. ખાસ વાત એ છે કે, GST અને અન્ય સ્થાનિક વેરા આમાં જોડાયેલ નથી. કોન્ટ્રેક્ટ સિમ્બોલ “SILVER100” હશે અને કોન્ટ્રેક્ટ્સ એક્સચેન્જના ‘કોન્ટ્રેક્ટ લોન્ચ’ કેલેન્ડરને ફોલો કરશે.
ટ્રેડિંગ સોમવારથી શુક્રવાર સવારે 9:00 વાગ્યાથી રાત્રે 11:30 વાગ્યા/રાત્રે 11:55 વાગ્યા વચ્ચે થશે, જે કોમોડિટી માર્કેટના સમય અનુસાર છે. નવો MCX સિલ્વર 100 ફ્યુચર્સ કોન્ટ્રેક્ટ કોન્ટ્રેક્ટ લોન્ચ મહિનાના પ્રથમ દિવસે શરૂ થશે. જો પ્રથમ દિવસે રજા હશે તો તે આગામી વર્કિંગ ડે (કામકાજના દિવસે) થી શરૂ થશે. છેલ્લો ટ્રેડિંગ દિવસ કોન્ટ્રેક્ટ એક્સપાયરી મહિનાનો છેલ્લો કેલેન્ડર દિવસ રહેશે. જો છેલ્લો કેલેન્ડર દિવસ રજાનો દિવસ હશે, તો તેની અગાઉનો વર્કિંગ ડે છેલ્લો દિવસ રહેશે. મિનિમમ પ્રાઇસ મૂવમેન્ટ અથવા ટિક સાઇઝ, 10 ગ્રામ દીઠ 1 રૂપિયો નક્કી કરવામાં આવી છે.
મેક્સિમમ ઓર્ડર સાઇઝ 600 કિલો છે. MCX એ કોન્ટ્રેક્ટ માટે મલ્ટી-લેયર્ડ ડેઇલી પ્રાઇસ લિમિટ સ્ટ્રક્ચર નક્કી કર્યું છે. શરૂઆતમાં, 4% નો પ્રાઇસ બેન્ડ લાગુ થશે, જેને તોડવા પર કૂલિંગ-ઓફ પીરિયડ વિના 6% સુધી વધારી શકાય છે. જો 6% ની લિમિટ પાર થઈ જશે, તો પ્રાઇસ બેન્ડને 9% સુધી વધારતા પહેલા ટ્રેડિંગ 15 મિનિટ માટે અટકી જશે. જો ઇન્ટરનેશનલ સિલ્વરની કિંમતો આ લિમિટથી આગળ વધશે, તો એક્સચેન્જ 3% ના ઇન્ક્રીમેન્ટમાં લિમિટમાં વધુ છૂટછાટ આપી શકે છે.
કોન્ટ્રેક્ટ માટે મિનિમમ 10% નું ઇનિશિયલ માર્જિન અથવા SPAN માર્જિન, જે પણ વધારે હોય તેની જરૂર પડશે. સાથે જ ઓછામાં ઓછું 1% નું એક્સટ્રીમ લોસ માર્જિન પણ જરૂરી રહેશે. સિલ્વર 100 કોન્ટ્રેક્ટ્સનું સેટલમેન્ટ ફરજિયાતપણે ફિઝિકલ ડિલિવરી દ્વારા કરવામાં આવશે, જેમાં અમદાવાદને MCX ક્લિયરિંગ કોર્પોરેશન દ્વારા માન્યતા પ્રાપ્ત સુવિધાઓ દ્વારા ડિલિવરી સેન્ટર બનાવવામાં આવ્યું છે. ડિલિવરી યુનિટ 100 ગ્રામ નક્કી કરવામાં આવ્યું છે, જેનાથી તે મોટા બુલિયન કોન્ટ્રેક્ટ્સની સરખામણીમાં જ્વેલર્સ અને નાના માર્કેટ પાર્ટિસિપન્ટ્સ માટે વધુ યોગ્ય બને છે.
MCX એ જણાવ્યું કે, માત્ર 999 ફાઇનનેસની શુદ્ધતા ધરાવતા સિલ્વર બાર્સ, જે IS 2112:1981 સ્ટાન્ડર્ડ્સ અનુસાર હોય, તે જ ડિલિવરી માટે ક્વોલિફાય ગણાશે. બાર્સ પર સિરીયલ નંબર હોવો જોઈએ અને તેમને LBMA-એપ્રુવ્ડ સપ્લાયર્સ અથવા એક્સચેન્જ દ્વારા એપ્રુવ્ડ રિફાઇનર્સ પાસેથી લીધેલા હોવા જોઈએ. 999 શુદ્ધતાથી ઓછી કોઈ પણ ચાંદી રિજેક્ટ (અસ્વીકાર) કરવામાં આવશે. સ્ટેગર્ડ ડિલિવરી ટેન્ડર પીરિયડમાં એક્સપાયરી ડે સહિત છેલ્લા ત્રણ ટ્રેડિંગ દિવસો હશે, જે દરમિયાન ખરીદદારો અને વેચનારાઓ ડિલિવરી કરવાનો ઇરાદો જણાવી શકે છે. એક્સપાયરી પર તમામ ઓપન પોઝિશન ફરજિયાતપણે ડિલિવરી સેટલમેન્ટમાં જતી રહેશે. ફાઇનલ સેટલમેન્ટ પ્રાઇસ અથવા ડ્યુ ડેટ રેટ (DDR), 999 પ્યોરિટીવાળી ચાંદી (1 કિલો) માટે અમદાવાદ સ્પોટ પ્રાઇસના આધારે નક્કી કરવામાં આવશે, જેને તે જ હિસાબે 100-ગ્રામ વેલ્યુમાં રૂપાંતરિત કરવામાં આવશે. કોન્ટ્રેક્ટ્સ માટે ક્લિયરિંગ અને સેટલમેન્ટ મલ્ટી કોમોડિટી એક્સચેન્જ ક્લિયરિંગ કોર્પોરેશન લિમિટેડ (MCXCCL) દ્વારા હેન્ડલ કરવામાં આવશે.