🌧️ દક્ષિણ ગુજરાતમાં મેઘતાંડવથી હાહાકાર: ભિલાડમાં 24 કલાકથી લોકો છત પર, વલસાડમાં પુલ ધરાશાયી; નવસારીમાં 2 હજારનું સ્થળાંતર

દક્ષિણ ગુજરાતમાં મેઘરાજાએ ધમાકેદાર બેટિંગ કરી છે. સવારના 6થી બપોરના 2 વાગ્યા સુધીમાં 182 તાલુકામાં સૌથી વધુ વરસાદ સુરતના ઉપરપાડામાં 13 ઇંચ નોંધાયો છે. તો નવસારીના ખેરગામમાં 11 ઇંચ, વલસાડના પારડીમાં 11, વલસાડના ઉમરગામમાં 10, ભરૂચના નેત્રગમાં 10 ઇંચ વરસાદ ખાબક્યો છે. નવસારીમાં ભારે વરસાદથી પૂર્ણા નદી ગાંડીતૂર બનતા પૂરને લઈને શહેરનો 30 ટકા વિસ્તાર પાણીમાં ગરકાવ થયો છે. વલસાડના ઉમરગામમાં છેલ્લા 24 કલાલમાં 36 ઈંચથી વધુ વરસાદથી લોકોને છત પર રહેવાની ફરજ પડી છે.

 

હાલ દક્ષિણ ગુજરાતમાં NDRF અને SDRFની ટીમો તૈનાત છે. સુરત જિલ્લામાં 3 NDRF અને 5 SDRF, જ્યારે વલસાડ જિલ્લામાં 3 NDRF અને 1 SDRF ટીમ કાર્યરત છે. અત્યાર સુધીમાં વલસાડમાં આશરે 1200 લોકોનું રેસ્ક્યુ, જ્યારે સુરત શહેરમાં 1500 લોકોને સુરક્ષિત સ્થળે ખસેડવામાં આવ્યા છે. નવસારીમાં કાવેરી નદીના કાંઠે 11 ગામમાંથી આશરે 200 લોકોને રેસ્ક્યુ કરીને સલામત સ્થળે ખસેડવામાં આવ્યા છે. તો ઉમરગામ તાલુકામાં છેલ્લા 28 કલાકમાં આશરે 43 ઈંચ વરસાદ નોંધાયો છે.

સૌરાષ્ટ્રના અમરેલી, જુનાગઢ અને ભાવનગર સહિતના જિલ્લાઓમાં પણ બચાવ ટુકડીઓને સ્ટેન્ડબાય રાખવામાં આવી છે.

 

23 અને 24 જુલાઈએ રાજ્યમાં ભારે વરસાદની આગાહી છે, જેમાં આજે 11 જિલ્લામાં અત્યંત ભારે વરસાદની આગાહી સાથે રેડ એલર્ટ જારી કરાયું છે. તો અમદાવાદ-ગાંધીનગર સહિત આઠ જિલ્લામાં ભારેથી અતિભારેની આગાહી સાથે ઓરેન્જ એલર્ટ અપાયું છે. તો ગીર સોમનાથ સહિત સાત જિલ્લામાં ભારે વરસાદની આગાહી સાથે યલો એલર્ટ અપાયું છે.અમદાવાદમાં મેઘરાજાનું રૌદ્ર સ્વરૂપ, 1 કલાકમાં 2 ઈંચથી બોપલના ઘરોમાં પાણી ઘૂસ્યા, અંડરબ્રિજ બંધ અમદાવાદમાં વહેલી સવારે 3.30 વાગ્યાથી શરૂ થયેલા ધીમીધારના વરસાદ બાદ સવારે 9 વાગ્યા પછી મેઘરાજાએ તોફાની બેટિંગ શરૂ કરી હતી. પશ્ચિમ વિસ્તારના બોપલ, જોધપુર, સેટેલાઈટ, એસજી હાઈવે અને આંબાવાડીમાં માત્ર 1 કલાકમાં 2 ઈંચ જેટલો ભારે વરસાદ ખાબક્યો હતો. ધોધમાર વરસાદના કારણે બોપલમાં ઢીંચણસમા પાણી ભરાઈ જતાં અને સ્ટર્લિંગ સિટી સોસાયટીના ઘરોમાં પાણી ઘૂસી જતાં રહીશો મુશ્કેલીમાં મુકાયા છે. આ ઉપરાંત, પીપળેશ્વર સોસાયટી બહાર રોડ જળમગ્ન થવાની સાથે ડી કેબિન અને અખબારનગર અંડરબ્રિજમાં પાણી ભરાતાં વાહનવ્યવહાર માટે બંધ કરી દેવાયા છે, જેનાથી સમગ્ર શહેરમાં વિઝિબિલિટી ઘટી ગઈ છે અને વાહનચાલકો તથા સ્થાનિકોને ભારે હાલાકીનો સામનો કરવો પડી રહ્યો છે.

દક્ષિણ ગુજરાતમાં મેઘતાંડવ, CMની ઈમરજન્સી બેઠક, મંત્રીઓ-સિનિયર IAS અધિકારીઓ મેદાનમાં દક્ષિણ ગુજરાતમાં ભારે વરસાદ અને હવામાન વિભાગના રેડ એલર્ટને પગલે મુખ્યમંત્રી ભૂપેન્દ્ર પટેલે ગાંધીનગર સ્થિત સ્ટેટ ઇમરજન્સી ઓપરેશન સેન્ટર (SEOC) ખાતે ઉચ્ચસ્તરીય બેઠક યોજી રાહત-બચાવ કામગીરીની સમીક્ષા કરી હતી. તેમણે સુરત, વલસાડ અને નવસારીના કલેક્ટરો સાથે સીધી વાતચીત કરી વહીવટી તંત્રને એલર્ટ રહેવા સૂચના આપી છે.

 

પરિસ્થિતિની ગંભીરતાને ધ્યાનમાં રાખીને મંત્રી નરેશ પટેલને અસરગ્રસ્ત વિસ્તારોમાં રવાના કરાયા છે. આ સાથે કમિશનર રેમ્યા મોહન, ડિઝાસ્ટર મેનેજમેન્ટ કમિશનર આલોક પાંડે અને રેડ એલર્ટ વાળા જિલ્લાના પ્રભારી સચિવોને તાત્કાલિક સ્થળ પર પહોંચી કામગીરીનું સંકલન કરવા મેદાનમાં ઉતારી દેવામાં આવ્યા છે.

આકાશી આફતથી રેલવે વ્યવહાર ઠપ્પ, અમદાવાદ-મુંબઈ રૂટની 7 ટ્રેનો રદ, નવસારીમાં 50 હજારથી વધુ મુસાફરો અટવાયા

 

દક્ષિણ ગુજરાતમાં અવિરત વરસી રહેલા ભારે વરસાદને કારણે રેલવે ટ્રેક પર પાણી ભરાતાં વેસ્ટર્ન રેલવેનો વ્યવહાર ગંભીર રીતે ખોરવાઈ ગયો છે.

 

સ્થિતિને ધ્યાનમાં રાખીને અમદાવાદ-મુંબઈ રૂટની 7 મુખ્ય ટ્રેનો રદ કરવામાં આવી છે, જ્યારે અનેક ટ્રેનો મોડી ચાલી રહી છે. ટ્રેન સેવાઓ ખોરવાતાં નવસારીથી સુરત અને વાપી તરફ રોજગારી માટે અપડાઉન કરતા 50 હજારથી વધુ પાસ હોલ્ડરો અને નોકરિયાતો સ્ટેશન પર અટવાઈ પડ્યા છે. તંત્ર કે એસ.ટી. નિગમ દ્વારા કોઈ વૈકલ્પિક બસ વ્યવસ્થા ન કરાતાં મુસાફરોમાં ભારે આક્રોશ જોવા મળી રહ્યો છે. બીજી તરફ, રેલવે પ્રશાસન દ્વારા પરિસ્થિતિ પર કાબૂ મેળવવા વિશેષ હેલ્પ ડેસ્ક શરૂ કરી રદ થયેલી ટ્રેનોનું રિફંડ આપવાની પ્રક્રિયા હાથ ધરવામાં આવી છે.

 

હેલ્પ ડેસ્ક શરૂ કરાયા

 

1. અમદાવાદ રેલવે સ્ટેશન (પ્લેટફોર્મ નં.1): 079-22147997

2. સાબરમતી રેલવે સ્ટેશનઃ 7043028680

 

3. પાલનપુર રેલવે સ્ટેશનઃ 9484698141

 

4. વીરમગામ રેલવે સ્ટેશનઃ 9213527587

 

ટ્રેન સંબંધિત માહિતી, સહાય અને માર્ગદર્શન માટે મુસાફરો આ હેલ્પ ડેસ્કનો સંપર્ક કરી શકે છે. પશ્ચિમ રેલવેએ મુસાફરોને મુસાફરી પહેલાં પોતાની ટ્રેનની નવીનતમ સ્થિતિ તપાસવાની પણ અપીલ કરી છે.

ગુજરાતને પવન સાથે મેઘરાજા ધમરોળશે, દક્ષિણ અને ઉત્તર ગુજરાતમાં એલર્ટ

 

હવામાન વિભાગ દ્વારા આગામી દિવસોમાં રાજ્યના વિવિધ વિસ્તારોમાં ભારેથી અતિભારે વરસાદની આગાહી કરવામાં આવી છે. 24 જુલાઈ દરમિયાન પંચમહાલ, દાહોદ અને મહીસાગરમાં ભારેથી અતિભારે વરસાદ, જ્યારે વલસાડ, નવસારી, તાપી, ગાંધીનગર, સાબરકાંઠા સહિતના વિસ્તારોમાં અતિભારે અને અમદાવાદ, સુરતમાં ભારે વરસાદની ભીતિ સેવવામાં આવી છે. ત્યારબાદ 25 અને 26 જુલાઈ દરમિયાન સાબરકાંઠા, બનાસકાંઠા અને અરવલ્લી સહિત ઉત્તર ગુજરાતના વિસ્તારોમાં અતિભારે વરસાદ પડે તેવી શક્યતા છે. વરસાદની સાથે 30થી 40 કિમી પ્રતિ કલાકની ઝડપે પવન ફૂંકાવાની પણ આગાહી કરાઈ છે. ઉલ્લેખનીય છે કે, છેલ્લા 24 કલાકમાં દક્ષિણ ગુજરાતના વલસાડ, નવસારી અને દમણ-દાદરા નગર હવેલીમાં અત્યંત ભારે વરસાદ નોંધાયો છે.