ગુજરાત સરકાર દ્વારા કર્મચારીલક્ષી મહત્વના નિર્ણયો લેવામાં આવ્યા છે, જેનાથી રાજ્યના લાખો કર્મચારીઓમાં ખુશીની લહેર ફેલાઈ ગઈ છે. ખાસ કરીને શિક્ષણ જગત સાથે જોડાયેલા કર્મચારીઓ અને ગુજરાત રાજ્ય માર્ગ વાહનવ્યવહાર નિગમ (GSRTC)ના કર્મચારીઓ માટે આ નિર્ણયો ખૂબ જ રાહતરૂપ સાબિત થશે. સરકાર દ્વારા કર્મચારીઓની લાંબા સમયથી ચાલી આવતી રજૂઆતો અને મુશ્કેલીઓને ધ્યાનમાં રાખીને આ સકારાત્મક પગલાં ભરવામાં આવ્યા છે.શિક્ષણ વિભાગમાં વિદ્યાસહાયકો, પ્રાથમિક અને માધ્યમિક વર્ગ 3 ના શિક્ષકો માટે જિલ્લા ફેરબદલી તેમજ કક્ષા બદલી પ્રક્રિયાને વધુ સરળ બનાવવામાં આવી છે. તબીબી (મેડિકલ) કારણોસર જિલ્લા ફેરબદલી માટે અરજી કરનાર કર્મચારીઓ માટે હવે સત્તાવાર મેડિકલ સર્ટિફિકેટ મેળવવાની પ્રક્રિયાને સરળ અને ઝડપી બનાવવામાં આવી છે. આ માટે GMERS (ગુજરાત મેડિકલ એજ્યુકેશન એન્ડ રિસર્ચ સોસાયટી) અંતર્ગત એક નવા અને સ્થાયી તબીબી મંડળની રચના કરવાનો મહત્વનો નિર્ણય લેવામાં આવ્યો છે.
આ નવા સ્થાયી તબીબી મંડળની રચના થવાથી મેડિકલ તપાસ અને સર્ટિફિકેટ સંબંધિત કામગીરીમાં વિલંબ નહીં થાય અને અરજીઓ પર ઝડપથી નિર્ણયો લઈ શકાશે. આ નિર્ણયનો સીધો લાભ શિક્ષકોની સાથે-સાથે GSRTC ના વર્ગ 3 અને વર્ગ 4 ના કર્મચારીઓને પણ મળશે. અગાઉ મેડિકલ દસ્તાવેજો મેળવવામાં પડતી જટિલતાઓ અને લાંબી પ્રક્રિયાના કારણે કર્મચારીઓને માનસિક અને શારીરિક મુશ્કેલીઓનો સામનો કરવો પડતો હતો, જે હવે દૂર થશે.
સરકારના આ પ્રશંસનીય પગલાથી કર્મચારીઓ સમયસર પોતાના વતન કે પસંદગીના સ્થળે બદલી મેળવી શકશે, જેનાથી તેમના પારિવારિક અને વ્યાવસાયિક જીવનમાં સંતુલન જળવાઈ રહેશે. રાજ્ય સરકારના આ કર્મચારી-કેન્દ્રી અભિગમથી વહીવટી પારદર્શિતા વધશે અને સરકારી કામગીરીમાં વધુ વેગ આવશે.