રોજ 1 ઈંડું ખાવાથી હૃદય પર શું અસર થાય? 185 દેશોના ડેટામાંથી સામે આવ્યું સત્ય
આપણા રોજિંદા નાસ્તામાં ઈંડાંનું સ્થાન હંમેશાં ચર્ચાનો વિષય રહ્યું છે. એક દાયકામાં તેને પ્રોટીનનો સૌથી ઉત્તમ સ્ત્રોત ગણાવીને ખાવાની સલાહ આપવામાં આવે છે, તો બીજા દાયકામાં એવી ચેતવણી આપવામાં આવે છે કે ઈંડાંનું પીળું દળ (જર્દી/Yolk) ખાવાથી લોહીની ધમનીઓ રૂંધાઈ જશે અને હાર્ટ એટેકનું જોખમ વધી જશે.પરિણામે, લાખો લોકો વર્ષોથી હૃદયરોગના ડરથી માત્ર ઈંડાંનો સફેદ ભાગ (Egg Whites) ખાવાનું પસંદ કરે છે.
જોકે, વિજ્ઞાન અને તબીબી સંશોધનો સમય સાથે બદલાયા છે. તાજેતરમાં જ દેશ-વિદેશના અગ્રણી તબીબોએ ઈંડાં વિશે વર્ષોથી ચાલી આવતી ગેરસમજો અને અફવાઓનો અંત આણ્યો છે. હૈદરાબાદના સિનિયર ન્યુરોલોજિસ્ટ અને કેલિફોર્નિયાના પ્રખ્યાત ગેસ્ટ્રોએન્ટેરોલોજિસ્ટે વૈજ્ઞાનિક પુરાવાઓ સાથે સ્પષ્ટ કર્યું છે કે ઈંડાંથી ગભરાવાની કોઈ જરૂર નથી.
હૃદય સ્વાસ્થ્ય અને ઈંડાં અંગેનો મોટો ભ્રમ
દાયકાઓથી ઈંડાં વિરૂદ્ધ એક સરળ તર્ક આપવામાં આવતો હતો: ઈંડાંના પીળા ભાગમાં કોલેસ્ટ્રોલ હોય છે, લોહીમાં કોલેસ્ટ્રોલ વધવાથી હૃદયરોગ થાય છે, તેથી ઈંડાં ખાવા હૃદય માટે ખરાબ છે.
પરંતુ ઓગસ્ટ 2026 માં હૈદરાબાદની અપોલો હોસ્પિટલ્સના સિનિયર ન્યુરોલોજિસ્ટ ડૉ. સુધીર કુમારે સોશિયલ મીડિયા પર આ ભ્રમનો છેદ ઉડાડ્યો હતો. તેમણે લખ્યું, “શું ઈંડાં તમારા હૃદય માટે ખરાબ છે? વિજ્ઞાન આનાથી સાવ ઊલટું જ કહે છે.”
ડૉ. કુમારે એક વિશાળ વૈશ્વિક અભ્યાસનો હવાલો આપતાં જણાવ્યું કે:
28 વર્ષનો ડેટા: આ સંશોધનમાં 185 દેશોના 28 વર્ષના ડેટાનું ઊંડું વિશ્લેષણ કરવામાં આવ્યું હતું.
હાર્ટ એટેકમાં ઘટાડો: રિસર્ચમાં જાણવા મળ્યું કે જે વસ્તીમાં ઈંડાંનો વપરાશ વધુ હતો, ત્યાં ઇસ્કેમિક હાર્ટ ડિસીઝ (IHD) નો દર અને તેનાથી થતા મૃત્યુનો દર નોંધપાત્ર રીતે ઓછો હતો.
સરળ શબ્દોમાં: વધુ ઈંડાં ખાનારા લોકોમાં હાર્ટ એટેક અને હૃદય સંબંધિત મૃત્યુનું જોખમ ઓછું જોવા મળ્યું હતું.