🔥 માણસામાં પુરવઠા વિભાગનો ધડાકેબાજ દરોડો: ગેરકાયદે ગેસ ભરવાની કામગીરીનો પર્દાફાશ!

માણસા શહેરમાં ગેરકાયદે રીતે ગેસ રિફિલિંગ કરવાની કામગીરી સામે પુરવઠા વિભાગે કાર્યવાહી કરી છે.

ચોક્કસ બાતમીના આધારે પુરવઠા વિભાગની ટીમે રસિકલાલ પાર્કની સામે આવેલા ભાગ્યોદય કોમ્પ્લેક્ષમાં આવેલી ‘શિવશક્તિ મોટર્સ’ નામની દુકાનમાં આકસ્મિક તપાસ કરી હતી.

તપાસ દરમિયાન દુકાનમાં કોમર્શિયલ ગેસ સિલિન્ડરમાંથી ઘરગથ્થુ ઉપયોગના સિલિન્ડરમાં ગેસ ભરવાની કામગીરી થતી હોવાનું સામે આવ્યું હતું. નિયમો વિરુદ્ધ આ રીતે ગેસ ટ્રાન્સફર કરવાની કામગીરી કરવામાં આવતી હોવાની જાણ થતાં ટીમે સ્થળ પર જ કાર્યવાહી હાથ ધરી હતી.

દરોડા દરમિયાન દુકાનમાંથી કુલ 12 ગેસ સિલિન્ડર મળી આવ્યા હતા. પુરવઠા વિભાગની ટીમે તમામ 12 સિલિન્ડર કબજે કર્યા હતા. ત્યારબાદ માણસા મામલતદાર દ્વારા કાયદેસરની કાર્યવાહી હાથ ધરી તમામ સિલિન્ડર સીઝ કરવાનો હુકમ કરવામાં આવ્યો હતો. આ અંગે પંચનામું પણ કરવામાં આવ્યું છે.

કોમર્શિયલ સિલિન્ડરમાંથી ઘરેલુ સિલિન્ડરમાં ગેસ ભરવાની પ્રક્રિયા નિયમ વિરુદ્ધ હોવાની સાથે જોખમી પણ બની શકે છે. આવી કામગીરી દરમિયાન ગેસ લીકેજ થવાથી આગ લાગવા સહિતની ઘટના બનવાની શક્યતા રહે છે. આથી તંત્ર દ્વારા સ્થળ પર તાત્કાલિક કાર્યવાહી કરાઈ હતી.

આ મામલે ગેરકાયદે ગેસ રિફિલિંગની કામગીરીમાં સંડોવાયેલા ઇસમો સામે નિયમ મુજબની કાયદેસરની કાર્યવાહી શરૂ કરવામાં આવી છે. સાથે જ તંત્ર દ્વારા સ્પષ્ટ કરવામાં આવ્યું છે કે, શહેર કે જિલ્લામાં આવી રીતે ગેસનું ગેરકાયદે રિફિલિંગ અથવા અન્ય અનધિકૃત પ્રવૃત્તિ કરવામાં આવશે તો આગામી સમયમાં પણ કાર્યવાહી કરવામાં આવશે.