વર્ષ 2026ના અંતિમ મહિનાઓમાં એટલે કે ઓક્ટોબરથી ડિસેમ્બર દરમિયાન દેશમાં ચક્રવાતી સિસ્ટમની પ્રવૃત્તિ વધવાની શક્યતા અંગે ચર્ચા શરૂ થઈ છે. કેટલાક અહેવાલોમાં આ સમયગાળા દરમિયાન બંગાળની ખાડી અને અરબ સાગરમાં અનેક મજબૂત સિસ્ટમ બનવાની શક્યતા વ્યક્ત કરવામાં આવી છે. જોકે, હાલ કોઈ ચોક્કસ ચક્રવાતની તારીખ, માર્ગ કે લેન્ડફોલની સત્તાવાર આગાહી કરવામાં આવી નથી.ભારતીય હવામાન વિભાગ (IMD) મુજબ ઓક્ટોબરથી ડિસેમ્બર ઉત્તર હિંદ મહાસાગર વિસ્તારમાં ચક્રવાતની મહત્વપૂર્ણ સિઝન છે. સામાન્ય રીતે બંગાળની ખાડીમાં ચક્રવાતી પ્રવૃત્તિ વધુ જોવા મળે છે, જ્યારે અરબ સાગરમાં બનેલી મજબૂત સિસ્ટમ ગુજરાત અને મહારાષ્ટ્ર સહિત પશ્ચિમ કાંઠાના વિસ્તારોને અસર કરી શકે છે.
સામાન્ય કરતા વધુ રહેવાની શક્યતા
કેટલાક દાવાઓમાં 1982થી 2025 સુધીના હવામાન ડેટાના વિશ્લેષણના આધારે 2026ના પોસ્ટ-મોન્સૂન સમયગાળામાં ચક્રવાતની શક્તિ સામાન્ય કરતા વધુ રહેવાની શક્યતા દર્શાવવામાં આવી છે. જોકે, આ દાવાની સત્તાવાર પુષ્ટિ થવી જરૂરી છે. જો અરબ સાગરમાં કોઈ મજબૂત સિસ્ટમ વિકસે તો ભારે વરસાદ, તેજ પવન અને ઊંચા મોજાંની અસર પશ્ચિમ કાંઠે થઈ શકે છે. IMDના સત્તાવાર બુલેટિન અને ચક્રવાતી આઉટલુક પર નજર રાખવી મહત્વપૂર્ણ રહેશે.