સિંગાપોરમાં ભારતીય મૂળના એક CEO બ્રેકઅપ બાદ પોતાની ગર્લફ્રેન્ડ સામે કોર્ટમાં પહોંચી ગયા હતા. સંબંધ દરમિયાન તેમણે પોતાની ગર્લફ્રેન્ડને ‘પ્રાડા’ અને ‘ડાયો’ જેવી મોંઘી બ્રાન્ડની વસ્તુઓ ભેટમાં આપી હતી. બાદમાં આ ભેટો પાછળ ખર્ચાયેલા પૈસા પરત મેળવવા માટે તેમણે પોતાની પૂર્વ ગર્લફ્રેન્ડ સામે કેસ કર્યો હતો.જોકે, CEO આ કેસ હારી ગયા હતા. કોર્ટે ચુકાદો આપતાં કહ્યું હતું કે તેમણે ગર્લફ્રેન્ડને જે પણ ભેટ આપી હતી, તે પોતાની મરજીથી આપી હતી અને હવે તેના પૈસા પરત માગી શકાય નહીં.
પોતાની મરજીથી આપી હતી ભેટ
કેસ કરનાર વ્યક્તિનું નામ ચંદર અગ્રવાલ છે. તેઓ ભારતીય લોજિસ્ટિક્સ કંપની TCI એક્સપ્રેસના CEO અને મેનેજિંગ ડિરેક્ટર છે.
રિપોર્ટ અનુસાર, આ કેસની સુનાવણી સિંગાપોરની સિનિયર જજ લી સેઉ કાન કરી રહ્યા હતા. જજે પોતાના લેખિત ચુકાદામાં જણાવ્યું હતું કે ચંદર અગ્રવાલે પોતાની પૂર્વ ગર્લફ્રેન્ડને તમામ ભેટ પોતાની મરજીથી આપી હતી, કારણ કે તે સમયે તેઓ તેના પ્રેમમાં હતા.
જજે એમ પણ જણાવ્યું હતું કે સંબંધ દરમિયાન ચંદર પોતાની ગર્લફ્રેન્ડ પર ખૂબ જ ફિદા હતા. આ જ કારણસર તેઓ તેને મોંઘી વસ્તુઓ ભેટમાં આપતા હતા. જોકે, જ્યારે બંનેનું બ્રેકઅપ થયું ત્યારે ચંદર ગુસ્સે થઈ ગયા હતા.
કોર્ટે એ પણ નોંધ્યું હતું કે ફેલિસિયા લી સાથે સંબંધમાં હોવા છતાં ચંદરના અન્ય મહિલાઓ સાથે પણ શારીરિક સંબંધો હતા.
ક્યારે શરૂ થયો હતો મામલો?
ચંદર અગ્રવાલ પોતાની પૂર્વ ગર્લફ્રેન્ડ ફેલિસિયા લી સાથે વર્ષ 2019માં મળ્યા હતા. બંને વચ્ચે સપ્ટેમ્બર 2022થી ડિસેમ્બર 2023 સુધી સંબંધ રહ્યો હતો.
સંબંધ દરમિયાન બંને વચ્ચે કોઈ મુદ્દે વિવાદ થયો હતો અને ત્યારબાદ તેમનું બ્રેકઅપ થઈ ગયું હતું. બ્રેકઅપના થોડા મહિના બાદ, માર્ચ 2024માં ચંદરે ફેલિસિયા લી સામે કોર્ટમાં કેસ દાખલ કર્યો હતો.
ચંદરે પોતાની ફરિયાદમાં દાવો કર્યો હતો કે ફેલિસિયા લી માટે તેમણે જે વસ્તુઓ ખરીદી હતી અથવા જે પૈસા ખર્ચ્યા હતા, તે વાસ્તવમાં ભેટ નહોતા પરંતુ લોન તરીકે આપવામાં આવ્યા હતા.
ચંદરે દાવો કર્યો હતો કે તેમણે ફેલિસીના ક્રેડિટ કાર્ડના ખર્ચ માટે લગભગ 19 કરોડ રૂપિયા, વિદેશ પ્રવાસો માટે લગભગ 12 કરોડ રૂપિયા, ફેલિસિયાના ફ્લેટ માટે 16 લાખ રૂપિયા અને સ્ટેનફોર્ડ-NUS એક્ઝિક્યુટિવ પ્રોગ્રામની ફી માટે લગભગ 28 લાખ રૂપિયા ખર્ચ્યા હતા.
આ ઉપરાંત, ચંદરે વધુ બે મોટી રકમ અંગે પણ દાવો કર્યો હતો. તેમનું કહેવું હતું કે આ પૈસા તેમણે ફેલિસિયાને તેના અગાઉના નોકરીદાતા સાથેનું દેવું ચૂકવવા માટે ઉધાર આપ્યા હતા. જોકે, આ બંને રકમ અંગે તેઓ કોર્ટમાં પોતાનો દાવો સાબિત કરી શક્યા નહોતા.
ચંદરે પોતાના દાવાને સમર્થન આપવા માટે કોર્ટમાં હાથથી લખાયેલો એક કરાર પણ રજૂ કર્યો હતો.
ફેલિસિયાએ કરાર પર સહી કરવાનો ઇનકાર કર્યો
આ કરાર પર કથિત રીતે બંનેના હસ્તાક્ષર હોવાનું જણાવાયું હતું. જોકે, ફેલિસિયા લીએ આવા કોઈ કરાર પર સહી કરી હોવાનો ઇનકાર કર્યો હતો.
કોર્ટને એ પણ જણાવવામાં આવ્યું હતું કે ચંદર અગ્રવાલે પોતાની પૂર્વ ગર્લફ્રેન્ડને પોતાના અમેરિકન એક્સપ્રેસ ક્રેડિટ કાર્ડનો ઉપયોગ કરવાની સુવિધા આપી હતી. તેમણે તેને કથિત રીતે કહ્યું હતું કે, “તમને જે જોઈએ તે લઈ લો.”
કોર્ટને એવી માહિતી પણ આપવામાં આવી હતી કે જ્યારે ફેલિસિયાએ ચંદર પાસે આ પૈસા પરત કરવાની વાત કરી હતી, ત્યારે ચંદરે કથિત રીતે કહ્યું હતું કે પૈસા પરત કરવાની કોઈ જરૂર નથી.
ચંદરે તે સમયે કથિત રીતે કહ્યું હતું કે, “હું કોઈ પૈસા ઉધાર આપનાર વ્યક્તિ નથી.”
આ તમામ બાબતોને ધ્યાનમાં રાખીને કોર્ટે ચંદરના દાવાને સ્વીકાર્યો નહોતો અને તેમને રાહત આપવાનો ઇનકાર કર્યો હતો. કોર્ટે સ્પષ્ટ કર્યું હતું કે સંબંધ દરમિયાન પોતાની મરજીથી આપવામાં આવેલી ભેટોને બાદમાં લોન ગણાવીને તેની રકમ પરત માગી શકાય નહીં.