ગુજરાતમાં વાહન નોંધણીની સ્પર્ધામાં લાંબા સમયથી આગળ રહેતું અમદાવાદ હવે સુરતની પાછળ રહી ગયું છે. 15 સપ્ટેમ્બર સુધીમાં સુરતમાં 1.80 લાખ વાહનો નોંધાયાં છે, જે 2025ના આખા વર્ષમાં નોંધાયેલા 2.20 લાખ વાહનોના લગભગ 80 ટકા છે. તે જ સમયગાળામાં અમદાવાદ (જીજે-01 સુભાષ બ્રિજ સિરીઝ)માં 1.40 લાખ વાહનો નોંધાયાં, જે 2025ના 1.80 લાખના 76 ટકા છે.સુરતની વૃદ્ધિ પણ વધુ ઝડપી રહી છે. 2024માં 6 ટકાથી વધુ અને 2025માં 9 ટકા વૃદ્ધિ થઈ, જ્યારે અમદાવાદમાં આ આંકડો અનુક્રમે 3 ટકા અને 5.6 ટકા હતો.
સુરતના પ્રાદેશિક પરિવહન અધિકારી એચ. એમ. પટેલે જણાવ્યું કે શહેરમાં ઝડપી વિકાસ અને વસ્તી વધવાથી લોકો નવા વિકસતા વિસ્તારોમાં વસવાટ કરી રહ્યા છે. જ્યાં સુધી ત્યાં જાહેર પરિવહન વ્યવસ્થા વિકસે નહીં ત્યાં સુધી કામ પર જવા માટે લોકો વ્યક્તિગત વાહન ખરીદે છે.પૂર બાદનો પરિબળ પણ મહત્ત્વનું છે. છેલ્લા બે મહિનામાં 4,516 વાહન વીમા દાવાઓમાં આશરે 80 કરોડ રૂૂપિયાની ચુકવણી થઈ છે. પટેલે કહ્યું કે ઘણા લોકોએ નવાં વાહનો ખરીદ્યાં છે અને વીમા પ્રક્રિયા હજુ ચાલુ હોવાથી નવી ખરીદી ચાલુ રહેશે.પરિવહન નિષ્ણાતોના મતે સુરતમાં જાહેર પરિવહનની અછતને કારણે ખાનગી વાહનો પર નિર્ભરતા વધુ છે.
એસવીએનઆઈટીના પરિવહન વિભાગના પ્રોફેસર ગૌરાંગ જોશીએ જણાવ્યું કે અમદાવાદમાં 12 ટકા લોકો જાહેર પરિવહનનો ઉપયોગ કરે છે, જ્યારે સુરતમાં આ આંકડો માત્ર 3 ટકા છે. તેમણે ઉમેર્યું કે સુરતમાં આવક વધુ હોવાથી કેટલાક ઘરોમાં પરિવારના દરેક સભ્ય પાસે અલગ વાહન હોય છે.
અમદાવાદની નોંધણી ત્રણ આરટીઓમાં વહેંચાયેલી છેવસ્ત્રાલ, સુભાષ બ્રિજ અને બાવળા. અધિકારીઓના જણાવ્યા અનુસાર નવો વિકાસ મુખ્યત્વે શહેરની બહાર સાણંદ, ગોધાવી અને મણીપુર તરફ થઈ રહ્યો છે, જે બાવળા આરટીઓ હેઠળ આવે છે. પૂર્વ અમદાવાદમાં પણ વિકાસ થતાં વસ્ત્રાલ આરટીઓમાં નોંધણી વધી છે. સુભાષ બ્રિજ આરટીઓમાં 2 થી 4 ટકાની વૃદ્ધિ નોંધાઈ છે, જેમાં જૂનાં વાહનો સ્ક્રેપ કરીને નવાં ખરીદવાનો પણ ફાળો છે. બાવળા હાઈ-એન્ડ વાહનો (15-20 લાખ અને તેથી વધુ કિંમતનાં)ની નોંધણી માટે મહત્ત્વનું કેન્દ્ર બન્યું છે. સ્ત્રોતોના જણાવ્યા અનુસાર કેટલાક ખરીદદારો અમદાવાદની અમુક મ્યુનિસિપલ કરવેરા ટાળવા માટે બાવળામાં નોંધણી કરાવે છે.