રાજકોટમાં ડેપ્યુટી મેયર દક્ષા વસાણીના સરકારી આવાસને લઈને વિવાદ વધુ વકર્યો છે. દક્ષા વસાણીના આવાસ સંબંધિત એક સોગંદનામું સામે આવ્યું છે, જેમાં તેમણે પોતાની પાસે કોઈ મિલકત ન હોવાનું અને ફાળવવામાં આવનાર સરકારી આવાસમાં રહેવા જવાના હોવાનો ઉલ્લેખ કર્યો હોવાનું સામે આવ્યું છે. આ સોગંદનામું સામે આવ્યા બાદ હવે સમગ્ર મામલે અનેક સવાલો ઊભા થયાસોગંદનામામાં સરકારી આવાસમાં પોતે વસવાટ કરશે તેવો પણ ઉલ્લેખ કરવામાં આવ્યો હોવાનું સામે આવ્યું છે. ત્યારે સવાલ એ છે કે દક્ષા વસાણીને દુકાનના બદલામાં આવાસ ફાળવવામાં આવ્યો હતો કે પછી આવાસ મેળવવા માટે વહીવટી પ્રક્રિયાના ભાગરૂપે સોગંદનામું રજૂ કરવામાં આવ્યું હતું?
અધિકારીઓના આગ્રહ બાદ દક્ષા વસાણીને આવાસ ફાળવવામાં આવ્યો
આ મામલે એવી પણ ચર્ચા છે કે દુકાનના બદલામાં કેટલાક અધિકારીઓના આગ્રહ બાદ દક્ષા વસાણીને આવાસ ફાળવવામાં આવ્યો હતો. જોકે, આ અંગે સત્તાવાર રીતે કોઈ સ્પષ્ટતા સામે આવી નથી. સમગ્ર મામલે આવાસ ફાળવણીની પ્રક્રિયા અને તેના માટે લાગુ પડતા નિયમો શું હતા તે મહત્વનું બની રહ્યું છે.
સરકારી આવાસ કયા નિયમો હેઠળ ફાળવવામાં આવ્યો
ખાસ વાત એ છે કે સામાન્ય નાગરિકને સરકારી આવાસ મેળવવા માટે વિવિધ દસ્તાવેજો અને પ્રક્રિયામાંથી પસાર થવું પડતું હોય છે. ત્યારે દક્ષા વસાણીને સરકારી આવાસ કયા નિયમો હેઠળ અને કઈ પ્રક્રિયા અંતર્ગત ફાળવવામાં આવ્યો તે અંગે સ્પષ્ટતા જરૂરી બની છે.
આ ઉપરાંત, જો કોઈ વ્યક્તિની દુકાન મહાનગરપાલિકાની કાર્યવાહી દરમિયાન કપાતમાં ગઈ હોય અથવા તેનું ડિમોલેશન થયું હોય તો તેના બદલામાં સરકારી આવાસ ફાળવી શકાય છે કે નહીં, તે અંગે પણ રાજકોટ મહાનગરપાલિકાના સત્તાવાર નિયમો અને પ્રક્રિયા સ્પષ્ટ થવી જરૂરી છે.