ગાંધીનગર જિલ્લાના કલોલ તાલુકાના જામળા ગામમાં ગૌવંશની ગેરકાયદેસર કતલ અને ગૌમાંસના વેપારના કેસમાં (Cow Slaughter Case) કલોલની ત્રીજી એડિશનલ સેશન્સ કોર્ટે મહત્ત્વનો ચુકાદો આપ્યો છે. જજ બી. આર. રાજપુતની અદાલતે ત્રણ આરોપીઓને દોષિત ઠેરવી આજીવન સખત કેદની સજા ફટકારી (Kalol Court Verdict) છે. આ ઉપરાંત ત્રણેય આરોપીઓ પર કુલ રૂ.9 લાખનો દંડ પણ ફટકારવામાં આવ્યો છે.આ કેસમાં પોલીસે અગાઉ 277 કિલો ગૌમાંસ સહિત કતલમાં વપરાતાં હથિયારો અને વાહનો જપ્ત કર્યાં હતાં.
Cow Slaughter Case: 277 કિલો ગૌમાંસ સહિત રૂ.3.61 લાખનો મુદ્દામાલ જપ્ત થયો હતો
આ કેસની વિગતો મુજબ, 22 ઓગસ્ટ, 2024ના રોજ કલોલ તાલુકાના જામળા ગામના ઢાંકણીવાસ વિસ્તારમાં આરોપી લાલભાઈ મણીલાલ સેનમાના ઘરે ગેરકાયદેસરરીતે ગાયોની કતલ થતી હોવાની બાતમી પોલીસને મળી હતી. આ બાતમીના આધારે કલોલ તાલુકા પોલીસે સ્થળ પર દરોડો પાડ્યો હતો.
દરોડા દરમિયાન પોલીસે આશરે 277 કિલો ગૌમાંસ જપ્ત કર્યું હતું, જેની કિંમત રૂ.55,400 આંકવામાં આવી હતી. આ ઉપરાંત કતલમાં ઉપયોગમાં લેવાતાં તીક્ષ્ણ છરા, કુહાડી, વજનકાંટો અને દોરડાં સહિતની વસ્તુઓ પણ કબજે કરવામાં આવી હતી. પરિવહન માટે ઉપયોગમાં લેવાતી લોડિંગ રિક્ષા, પીકઅપ ડાલું અને એક્ટિવા સહિત કુલ રૂ.3,61,540નો મુદ્દામાલ જપ્ત કરવામાં આવ્યો હતો.
આ કાર્યવાહી દરમિયાન વસીમ સાહબુદ્દીન કુરેશી, મહંમદ રફીક કુરેશી અને અસ્ફાક ઉર્ફે સલમાન અબ્દુલ બહેલીમની ધરપકડ કરવામાં આવી હતી. ત્યારબાદ કેસની કાયદાકીય કાર્યવાહી હાથ ધરવામાં આવી હતી.
સરકારી વકીલે મહત્તમ સજાની માગ કરી
કલોલ સેશન્સ કોર્ટમાં કેસની સુનાવણી દરમિયાન સરકાર પક્ષે એડિશનલ પબ્લિક પ્રોસિક્યુટર જિગ્નેશ એચ. જોષીએ દલીલો રજૂ કરી હતી. તેમણે આરોપીઓ સામેના આક્ષેપોની ગંભીરતા અને કેસમાં રજૂ કરાયેલા પુરાવાઓના આધારે કડક સજાની માગ કરી હતી.
સરકાર પક્ષે દલીલ કરી હતી કે આવા ગુનાઓ સામે કડક કાર્યવાહીથવી જોઈએ, જેથી સમાજમાં કાયદાનું પાલન થાય અને ભવિષ્યમાં આવી ઘટનાઓ અટકાવી શકાય. બંને પક્ષોની દલીલો અને રજૂ કરાયેલા પુરાવાઓની સમીક્ષા કર્યા બાદ અદાલતે પોતાનો ચુકાદો સંભળાવ્યો હતો.
ચુકાદામાં વેદ અને પુરાણોનો ઉલ્લેખ
ચુકાદા દરમિયાન ન્યાયાધીશે ભારતીય સંસ્કૃતિમાં ગાયના મહત્ત્વ અને જીવમાત્રના રક્ષણ અંગેના વિચારોનો ઉલ્લેખ કર્યો હતો. ચુકાદાની શરૂઆતમાં વેદ, પુરાણ અને મનુસ્મૃતિ સાથે સંકળાયેલા ‘ગાવો વિશ્વસ્ય માતરઃ’ શ્લોકનો ઉલ્લેખ કરવામાં આવ્યો હતો.
અદાલતે ગૌવંશની કતલના આ કેસમાં ગુનાની ગંભીરતાને ધ્યાનમાં રાખીને ત્રણેય આરોપીઓને દોષિત ઠેરવ્યા હતા. અદાલતે દરેક આરોપીને આજીવન સખત કેદની સજા ફટકારી (Life Imprisonment Gujarat) હતી અને કુલ રૂ.9 લાખનો દંડ વસૂલવાનો આદેશ આપ્યો હતો.
જામળા ગામના આ કેસમાં આવેલા ચુકાદા બાદ ગૌવંશની ગેરકાયદેસર કતલ સામેની કાયદાકીય કાર્યવાહી ફરી ચર્ચામાં આવી છે. જોકે, સજાની ચોક્કસ કાયદાકીય જોગવાઈઓ અને ત્રણેય આરોપીઓ પર વ્યક્તિગત રીતે કેટલો દંડ ફટકારાયો તેની વિગતો ઉપલબ્ધ માહિતીમાં સ્પષ્ટ કરવામાં આવી નથી.