પ્રેમી સાથે મળી પતિના પગ પકડી છાતી ચીરી નાખી! પછી એ જ આશિકને લાત મારી ત્રીજા સાથે કર્યા નિકાહ: બાગપતની ‘ખૂની હસીના’ આખરે જેલભેગી

ક્રાઇમ થ્રિલર ફિલ્મોની વાર્તાને પણ ટક્કર મારે તેવો એક અત્યંત સનસનાટીભર્યો અને રૂંવાડાં ઊભાં કરી દેતો કિસ્સો ઉત્તર પ્રદેશના બાગપતમાંથી પ્રકાશમાં આવ્યો છે. જે સ્ત્રીએ પોતાના પ્રેમીના ઈશ્કમાં આંધળી બનીને પતિની ક્રૂર હત્યા કરાવી, તેણે હત્યા બાદ એ જ પ્રેમીનો સાથ છોડી દીધો અને ત્રીજા જ વ્યક્તિ સાથે નવો સંસાર માંડી લીધો!પોલીસથી બચવા માટે સતત 11 મહિના સુધી નાસતી ફરતી અને રૂ. 25 હજારનું ઇનામ ધરાવતી આ શાતિર મહિલા સાઇન ઉર્ફે સાઇનાને આખરે ખાખી વર્દીએ સકંજામાં લઈ જેલના સળિયા પાછળ ધકેલી દીધી છે.

 

પડોશી સાથે બંધાયા અનૈતિક સંબંધો અને ખેલાયો ખૂની ખેલ

 

આ આખી ઘટના બાગપત કોતવાલી વિસ્તારના મોહલ્લા કેતીપુરાની નવી વસ્તીની છે. મૂળ હાપુડ જિલ્લાના ભાટિયાના ગામનો રહેવાસી રિયાસત પોતાની પત્ની સાઇન અને પરિવાર સાથે અહીં રહેતો હતો. રિયાસત સામાન્ય પરિવારનો સીધોસાદો માણસ હતો, પરંતુ તેની પત્ની સાઇનનું દિલ પડોશમાં જ રહેતા સારિમ ઉર્ફે કટા નામના યુવક પર આવી ગયું. બંને વચ્ચેની નિકટતા ધીમે-ધીમે ગેરકાયદે સંબંધોમાં બદલાઈ ગઈ.

 

થોડા સમય પછી રિયાસતને પત્નીના આ ગેરકાયદે પ્રણય સંબંધોની જાણ થઈ ગઈ. તેણે સાઇનને વારંવાર સમજાવી અને આ સંબંધનો સખત વિરોધ કર્યો. પરંતુ સાઇન પર તો સારિમના પ્રેમનો એવો નશો ચડ્યો હતો કે તેને પતિ નડતરરૂપ લાગવા માંડ્યો. આ બાબતે ઘરમાં સતત ઝઘડા થવા લાગ્યા. અંતે, સાઇન અને તેના આશિક સારિમે રિયાસતને હંમેશ માટે રસ્તામાંથી હટાવી દેવાનું કાવતરું ઘડી કાઢ્યું.

 

પતિના પગ પકડી રાખ્યા અને પ્રેમીએ છાતી પર છરીના ઘા ઝીંક્યા

 

25 નવેમ્બર 2025ની એ સાંજે ઘરમાં જે લોહિયાળ ખેલ ખેલાયો, તેણે સૌના કાળજાં કંપાવી દીધાં. રિયાસતે સારિમને પોતાના જ ઘરમાં જોઈ લીધો. રિયાસતે તેનો ઉગ્ર વિરોધ કર્યો અને બંને વચ્ચે જોરદાર બોલાચાલી થઈ. એ જ વખતે સારિમે કમરમાંથી તીક્ષ્‍ણ છરી કાઢી લીધી. રિયાસત પોતાનો જીવ બચાવીને ભાગવા જાય તે પહેલાં જ તેની સગી પત્ની સાઇને તેના બંને પગ મજબૂતીથી પકડી લીધા, જેથી તે હલી પણ ન શકે.

 

પતિ લાચાર થઈ ગયો અને પત્નીએ પગ પકડી રાખ્યા હતા તે દરમિયાન પ્રેમી સારિમે રિયાસતની છાતી પર ઉપરાઉપરી છરીના અસંખ્ય ઘા ઝીંકી દીધા. રિયાસત લોહીના ખાબોચિયામાં તરફડિયાં મારતો રહ્યો અને ક્ષણભરમાં તેનો પ્રાણપંખેરુ ઊડી ગયું. આ નિર્દય હત્યા બાદ સાઇન અને સારિમ બંને ઘર છોડીને રાતોરાત ફરાર થઈ ગયા. ઘટના બાદ મૃતકના ભાઈ ઇસરારે બાગપત કોતવાલીમાં સાઇન અને સારિમ સામે હત્યાનો ગુનો નોંધાવ્યો હતો.

 

જેના માટે પતિની હત્યા કરી, તેને પણ દગો આપ્યો!

 

આ કેસમાં સૌથી મોટો વળાંક હત્યા પછી આવ્યો. પોલીસ બંનેની પાછળ પડી હતી અને બંને પર 25-25 હજાર રૂપિયાનું ઇનામ પણ જાહેર કરવામાં આવ્યું હતું. થોડા સમય નાસતા ફર્યા બાદ કાયદાના સકંજાથી ગભરાઈને પ્રેમી સારિમે અદાલતમાં શરણાગતિ સ્વીકારી લીધી.

 

પરંતુ સાઇનનું વલણ ચોંકાવનારું હતું. જે પ્રેમી માટે તેણે પોતાના સુખી સંસારની બલિ ચડાવી અને પતિનું ગળું કપાવ્યું, એ જ સારિમને તેણે દૂધમાંથી માખીની જેમ ફેંકી દીધો! સાઇને સારિમ સાથેના તમામ સંબંધો તોડી નાખ્યા અને પોલીસ તપાસમાં સામે આવ્યું કે તે મુઝફ્ફરનગર જિલ્લાના બુઢાના વિસ્તારના એક ગામમાં પહોંચી ગઈ હતી. ત્યાં તેણે એક ત્રીજા જ યુવકને પોતાની જાળમાં ફસાવી તેની સાથે બીજો નિકાહ કરી લીધો અને તેની સાથે રહેવા લાગી.

 

11 મહિના બાદ બાતમી મળી અને ‘હત્યારી દુલ્હન’ ઝડપાઈ

 

પોલીસ છેલ્લા 11 મહિનાથી સાઇનની સઘન શોધખોળ કરી રહી હતી. બાગપત પોલીસને બાતમીદાર મારફતે ચોક્કસ માહિતી મળી કે 25 હજારની ઇનામી ભાગેડુ સાઇન એક હોટલ નજીક હાજર છે. પોલીસે તાત્કાલિક ઘેરાબંધી કરી અને તેને દબોચી લીધી. બાગપતના સીઓ ડૉ. સુકન્યા શર્માના જણાવ્યા અનુસાર, મહિલાએ પોતાના પ્રેમી સાથે મળીને ગેરકાયદે સંબંધોના કારણે પતિની હત્યા કરી હતી. ધરપકડ બાદ તેને કોર્ટમાં રજૂ કરી સીધી જેલ હવાલે કરી દેવામાં આવી છે.

 

પરિવાર હજુ પણ ભયના ઓથાર હેઠળ

 

સાઇન જેલમાં ગઈ હોવા છતાં મૃતક રિયાસતના પરિવારની મુશ્કેલીઓનો અંત આવ્યો નથી. રિયાસતના ભાઈ ઇસરારે ગંભીર આક્ષેપ કર્યો છે કે સાઇનના પરિવારજનો તેમના પર કેસ પાછો ખેંચવા અને સમાધાન કરવા માટે સતત દબાણ કરી રહ્યા છે તેમજ જાનથી મારી નાખવાની ધમકીઓ આપી રહ્યા છે. પરિવારે પોલીસ પાસે રક્ષણની અને ધમકી આપનારાઓ સામે કડક કાનૂની કાર્યવાહી કરવાની માંગ કરી છે. પ્રેમ, હત્યા, દગો અને બીજી વાર નિકાહની આ અજીબોગરીબ દાસ્તાન હાલ સમગ્ર પંથકમાં ચર્ચાનો વિષય બની છે.