પેથાપુરમાં આવેલા શુભ બિઝનેશ પાર્કના ભોયરામાં બે કારમાં દારૂ રાખવામાં આવ્યો હોવાની બાતમી પોલીસને મળતા રેડ કરી હતી. બંને કારની તપાસ કરતા તેમાં દારૂ જોવા મળ્યો હતો. જેથી કારના કાચ તોડી તપાસ કરતા અલગ અલગ બ્રાન્ડની વિદેશી દારૂની 252 બોટલ મળી આવી હતી. જ્યારે દારૂ રાખનાર બુટલેગર ફરાર થઇ ગયો હતો. આ બાબતે પેથાપુર પોલીસે પ્રોહિબિશન એક્ટ હેઠળ ગુનો નોંધી કાર્યવાહી હાથ ધરી હતી.
પેથાપુર પોલીસની ટીમને બાતમી મળી હતી કે, ગામમાં આવેલા શુભ બિઝનેશ પાર્કના ભોયરામાં બે કાર પાર્ક કરવામાં આવી છે. જેમાં એક ઇટીયોસ અને બીજી ઇનોવા કાર છે. તેમાં પેથાપુરના હિતેષજી ગાંડાજી ઠાકોર દ્વારા વિદેશી દારૂ ભરી લાવી મુકવામાં આવેલો છે. જેને પોલીસ બાતમી મુજબ બિઝનેશ પાર્કના ભોયરામાં પહોંચી હતી. તે દરમિયાન એક ઇટીયોસ કાર નંબર જીજે 01 સીવાય 2578 અને ઇનોવા કાર નંબર જીજે 16 એએ 8201 જોવા મળી હતી.
કારના કાચમાંથી તપાસ કરતા અંદર દારૂ હોવાનુ જોવા મળ્યો હતો. જેથી કાર ખોલવાનો પ્રયાસ કરતા લોક મારેલુ હતુ. જ્યારે દારૂ મંગાવનાર હિતેષ ઠાકોર જોવા મળ્યો ન હતો. જેથી કારના કાચ તોડી તેમા રહેલો દારૂ તપાસાતા અલગ અલગ બ્રાન્ડની 252 વિદેશી દારૂની બોટલ કિંમત 71460 પકડી લીધો હતો. જ્યારે પોલીસે દારૂ અને કાર સહિત 9,16,808ની કિંમતનો મુદ્દામાલ જપ્ત કરી બુટલેગર સામે ગુનો નોંધી તપાસ હાથ ધરી હતી.