👆 ચા ની કેટલી વાળાને 49 કરોડની નોટિસ, ચાય પે ચર્ચા, ઇન્કમટેક્સ કા ખર્ચા? વાંચો ક્યાં

પાટણ શહેરમાં એક અજીબ ઘટના સામે આવી છે. જેમાં ચાની લારી ધરાવતા યુવાનને IT વિભાગે નોટીસ ફટકારી છે. ચા વેચીને પરિવારનું ગુજરાન ચલાવનાર ચા વાળાને 49 કરોડ રૂપિયાની નોટિસ ફટકારી છે. ખેમરાજ દવે નામના શખ્સને બાકી રહેલો ટેક્સ અને પેનલ્ટીની IT વિભાગે નોટીસ ફટકારતા પરિવાર ચિંતામાં આવ્યા છે. જોકે આ મામલે છેતરપિંડીની ફરિયાદ નોંધાઈ છે.

પાટણ ખાતે નવાગંજ બજારમાં ચાની લારી ચલાવતા યુવકને બેન્ક એકાઉન્ટ સાથે લિંક કરવા પાનકાર્ડની જરૂર હતી. જેને લઈ વેપારીએ ડોક્યુમેન્ટ લઇને પાનકાર્ડ તો કઢાવી આપ્યું પણ તેની જાણ બહાર તેના પાનકાર્ડ સહિત અન્ય ડોક્યુમેન્ટનો દુરુપયોગ કરીને તેના નામના જુદા જુદા બેંક એકાઉન્ટ ખોલાવી તેમાં અપ્રમાણસર કરોડો રૂપિયાના નાણાકીય વ્યવહાર કરી દીધા હતા. હવે હાલમાં જ ઇન્કમટેક્સ વિભાગ તરફથી રૂ. 49,06,59,280 ની પેનલ્ટી સહિત ટેક્સ ભરવા માટે નોટિસ અપાતાં તેં ચોંકી ઉઠ્યો હતો અને તપાસ કરતાં તેની સાથે છેતરપિંડી થઇ હોવાનો ભાંડો ફુટતા યુવકે બંને ભાઈઓ સામે છેતરપિંડીની ફરિયાદ નોંધાવતા પોલીસે તપાસ શરૂ કરી છે.

આજથી દસેક વર્ષ પહેલાં પાટણ ખાતે રહેતા અને મૂળ કાંકરેજ તાલુકાના રણાવાડા ગામના ખેમરાજભાઈ વજેરામભાઈ દવેએ પાટણ નવાગંજ બજાર ખાતે ચાની લારી શરૂ કરી હતી. તે વખતે ગંજ બજારમાં અનાજ ખરીદી લે વેચ અને કમિશન એજન્ટ તરીકે ધંધો કરતા પાટણના અલ્પેશકુમાર મણિલાલ પટેલ સાથે તેને પરિચય થયો હતો. અલ્પેશ પટેલ લારી પર ચા પીવા માટે આવતા જતા હતા અને ખેમરાજ દવે પણ તેમની ઓફિસમાં ચા આપવા માટે જતો આવતો હતો. જેથી બંને વચ્ચે સારો પરિચય બંધાયો હતો. તે વખતે બેંક એકાઉન્ટ સાથે પાનકાર્ડ લિંક કરાવવાનો નિયમ આવ્યો હોવાથી તેમણે અલ્પેશ પટેલને નવું પાનકાર્ડ કેવી રીતે કઢાવવું તે અંગે વાત કરતા અલ્પેશ પટેલે તેની પાસેથી આધારકાર્ડ, રેશનકાર્ડ, ફોટા સહિતના દસ્તાવેજો મેળવી પાનકાર્ડ કઢાવી આપ્યું હતું. પણ પછી તેના દસ્તાવેજનો દુરુપયોગ કરીને ખેમરાજ ભાઈના પાનકાર્ડ આધારે તેની જાણ બહાર જુદા જુદા બેન્ક એકાઉન્ટ ખોલાવ્યા હતા.જેમાં વર્ષ 2014-15માં અને વર્ષ 2015-16માં અપ્રમાણસર રીતે કરોડો રૂપિયાના નાણાકીય વ્યવહારો કર્યા હતા.જેને પગલે 11 ઓગસ્ટ 2023ના રોજ ઇન્કમટેક્સ તરફથી રૂ.49,06,59,280ની પેનલ્ટી સહિત ટેક્સ ભરવા માટે ખેમરાજભાઈ દવેને નોટિસ મળતાં ચોંકી ઉઠ્યા હતા.

આ અંગે પાટણ શહેર બી ડિવિઝનમાં પાટણમાં રહેતા અલ્પેશકુમાર મણીલાલ પટેલ અને ઊંઝામાં રહેતા તેમના ભાઈ વિપુલકુમાર મણીલાલ પટેલ સામે છેતરપિંડી અને ખોટા કેસમાં ફસાવી દેવાની ધમકી આપ્યાની ફરિયાદ નોંધાવી છે જેની તપાસ એલસીબી પોલીસને સોંપતા એલસીબી ઇન્ચાર્જ પીઅાઇ વી આર ચૌધરીએ તપાસના ચક્રો ગતિમાન કર્યા હતા.
બેંકમાં એકાઉન્ટ સાથે પાનકાર્ડ લિંક કરાવવા માટે ખેમરાજ દવેએ નવું પાનકાર્ડ લેવા માટે કેવી રીતે કઢાવવું તે અંગે અલ્પેશ પટેલને વાત કરતા તેણે કહ્યું હતું કે તમે ફક્ત આધારકાર્ડ, રેશનકાર્ડ અને ફોટા આપો. હું તમને પાનકાર્ડ કઢાવી આપીશ તેવી વાત કરતા તેના પર વિશ્વાસ રાખી આધારકાર્ડપ રેશનકાર્ડ અને 8 ફોટા આપ્યા હતા,બીજા દિવસે અલ્પેશ ચાની લારી પર કેટલાક કાગળો લઈને આવ્યો હતો જે કાગળો અંગ્રેજીમાં હતા તે પાનકાર્ડ કઢાવવા માટેના ફોર્મ હોવાનું જણાવી જુદી જુદી જગ્યાએ સહીઓ કરાવી હતી ત્યારબાદ પાનકાર્ડ આવી ગયું હતું અને તે પાનકાર્ડ આવ્યા બાદ અલ્પેશે તેની ઝેરોક્ષ ઇન્કમટેક્સ ઓફિસમાં જમા કરાવવી પડશે તેમ કહીં પાનકાર્ડ લઈ ગયો હતો અને થોડા દિવસ બાદ પરત આપી દીધું હતું.

ઓગસ્ટ 2023માં ઇન્કમટેક્સ તરફથી નોટિસો મળતાં વકીલ મિત્ર મારફતે ઇન્કમટેક્સ ઓફિસમાં જઈ તપાસ કરતાં તેમના પાનકાર્ડ ઉપર ચાલતા બેંક એકાઉન્ટમાં એસેસમેન્ટ વર્ષ 2014-15માં અને 2015-16માં નાણાકીય વ્યવહારો થયા હોવાનું જાણવા મળ્યું હતું. તેમણે અલ્પેશ પટેલને પાનકાર્ડ કઢાવવા ડોક્યુમેન્ટ આપેલા હોવાથી તેનો મોબાઈલથી સંપર્ક કરી ઇન્કમટેક્સની નોટિસ બાબતે પૂછતાં તેણે પાનકાર્ડ ઉપર જુદા જુદા બેંક એકાઉન્ટ ખોલાવી તેમાં તેમના હવાલાના નાણાનો નાણાકીય વ્યવહાર કરેલો છે તે બાબતે તેમણે મહેસાણા વકીલ રોકેલ છે. બધી મેટર પતાવી દેશે. અને જો તમે આ બાબતે કોઈ કેસ કરશો તો હું તમને ખોટા કેસમાં ફસાવી દઈશ એવી ધમકી આપી હતી.