વડાપ્રધાન નરેન્દ્ર મોદીની અત્યાર સુધીની 23 વર્ષની સંકલ્પ સિદ્ધિને જનજનમાં ઉજાગર કરવા મુખ્યમંત્રી ભૂપેન્દ્ર પટેલના નેતૃત્વમાં ગુજરાતભરમાં “વિકાસ સપ્તાહ” ની ઉમંગભેર ઉજવણી કરવામાં આવી રહી છે. ભારતભરમાં ગુજરાત આજે મોડેલ સ્ટેટ તરીકે ઉભરી આવ્યું છે, ત્યારે દેશના વડાપ્રધાન અને ગુજરાતના તત્કાલીન મુખ્યમંત્રી નરેન્દ્ર મોદીના ડ્રીમ પ્રોજેક્ટ એવા ગાંધીનગર ખાતે આવેલ ગિફ્ટ સિટી, વિકસિત ભારત@2047 ના સ્વપ્નને સાકાર કરવામાં મહત્વની ભૂમિકા ભજવી રહ્યો છે.
અમદાવાદ અને ગુજરાતના પાટનગર ગાંધીનગર વચ્ચે સાબરમતી નદીના કિનારે ગુજરાત ઇન્ટરનેશનલ ફાઇનાન્સ ટેક સિટી એટલે કે ગિફ્ટ સિટીનું નિર્માણ કરવામાં આવ્યું છે. ગુજરાત સરકારની પહેલ અને ભારત સરકારના સહયોગથી ગાંધીનગર ખાતે આકાર પામેલ ગિફ્ટ સિટી ભારતનું પ્રથમ ઓપરેશનલ સ્માર્ટ સિટી અને ઇન્ટરનેશનલ ફાઇનાન્સિયલ સર્વિસિસ સેન્ટર તરીકે વિકાસ પામ્યું છે. દેશના વડાપ્રધાન અને ગુજરાતના તત્કાલીન મુખ્યમંત્રી નરેન્દ્ર મોદીના વિઝન અને માર્ગદર્શન હેઠળ વર્ષ 2007 માં ગિફ્ટ સિટીની સ્થાપના કરવામાં આવી હતી. વૈશ્વિક સ્તરે નાણાકીય રીતે સમૃદ્ધ એવા ન્યુયોર્ક, લંડન, ટોક્યો, પેરિસ, સિંગાપોર અને દુબઈ જેવા દેશોની જેમ ભારતને પણ ફાઇનાન્સિયલ સેન્ટર તરીકે વિકસાવવાના હેતુસર ગિફ્ટ સિટીની રચના કરવામાં આવી છે.
ગાંધીનગર ખાતે હાલમાં 886 એકર જમીનમાં ફેલાયેલ ગિફ્ટ સિટીને વૈશ્વિક સ્તરની વ્યાપારી, રહેણાંક અને સામાજિક સુવિધાઓ સાથે સુઆયોજિત અને ટેકનોલોજીથી સક્ષમ સ્માર્ટ સિટી તરીકે વિકસાવવામાં આવી રહી છે. ગિફ્ટ સિટી મલ્ટી સર્વિસ સ્પેશિયલ ઇકોનોમિક ઝોન(SEZ) માં આવેલ ભારતની એકમાત્ર ઇન્ટરનેશનલ ફાઇનાન્શિયલ સર્વિસિસ સેન્ટર(IFSC) અને ડોમેસ્ટિક ટેરિફ એરિયા(DTA) ધરાવે છે. ગિફ્ટ સિટીમાં હાલમાં 20 જેટલી બિલ્ડિંગ કાર્યરત છે તથા બીજા વધુ પ્રોજેક્ટ્સ પણ પ્રગતિમાં છે. ગિફ્ટ સિટીની લોકપ્રિયતા અને ગુજરાત સરકારની પ્રોત્સાહક નીતિઓના કારણે વિવિધ રાષ્ટ્રીય અને આંતરરાષ્ટ્રીય કંપનીઓ અહિયાં આવી રહી છે, જેના પરિણામસ્વરૂપ ગિફ્ટ સિટીમાં 700થી વધુ બિઝનેસની સ્થાપના થઇ છે. આ ઉદ્યોગોના કારણે ગિફ્ટ સિટીમાં સીધી અને પરોક્ષ રીતે અંદાજિત 25000 જેટલી રોજગારીનું સર્જન થયું છે.
ગિફ્ટ સિટીમાં અત્યાધુનિક માળખાકીય સુવિધાઓ જેવી કે ડિસ્ટ્રિક્ટ કૂલિંગ સિસ્ટમ, ઓટોમેટેડ વેસ્ટ કલેક્શન સિસ્ટમ, અંડરગ્રાઉન્ડ યુટિલિટી ટનલ અને ગ્રીન ટ્રાન્સપોર્ટેશન તથા સામાજિક સુવિધાઓ જેવી કે સ્કૂલ, મેડિકલ, ઇન્ડોર અને આઉટડોર સ્પોર્ટ્સ સુવિધાઓ સાથેની એક બિઝનેસ ક્લબ, મનોરંજનની સુવિધાઓ, ફાઈવ સ્ટાર હોટેલ, સુપરમાર્કેટ્સ અને મલ્ટિ-ક્યુઝિન રેસ્ટોરન્ટ્સનો સમાવેશ થાય છે. ગિફ્ટ સિટીમાં કામ-ધંધાની સાથે સુનિયોજિત રહેણાંક હાઉસિંગ પ્રોજેક્ટ્સ પણ બની રહ્યા છે, જે ગિફ્ટ સિટીને ખરેખર “વૉક ટુ વર્ક” સિટી બનાવે છે. ગિફ્ટ સિટીમાં મેટ્રો ટ્રેનની કનેક્ટિવિટી, 20 મિનિટના અંતરે આવેલ ડોમેસ્ટિક અને ઇન્ટરનેશનલ એરપોર્ટ, 15 મિનિટના અંતરે આવેલ રેલ્વે સ્ટેશન, નેશનલ હાઇવેની કનેક્ટિવિટી સહિત વિવિધ ટ્રાન્સપોર્ટેશન સુવિધાઓ ઉદ્યોગો માટે સાનુકૂળ વાતાવરણ પૂરું પાડે છે.
ગિફ્ટ સિટી ખાતે આવેલ ભારતની એકમાત્ર ઇન્ટરનેશનલ ફાઇનાન્શિયલ સર્વિસિસ સેન્ટર ટોચના ગ્લોબલ ફાઇનાન્શિયલ સેન્ટરમાં પોતાની આગવી ઓળખ બનાવી રહ્યું હતું, જે આગામી થોડા વર્ષોમાં ગ્લોબલ ફાઇનાન્સિયલ સેન્ટર્સ ઇન્ડેક્સ (લંડન)માં વધુ નોંધપાત્ર સ્થાન પ્રાપ્ત કરશે. વધુમાં ગિફ્ટ સિટી કોર્પોરેટ્સને ગ્લોબલ બેન્ચમાર્ક, વાઇબ્રન્ટ બિઝનેસ ઇકોસિસ્ટમ, સિંગલ વિન્ડો એક્સેસ દ્વારા રોકાણ માટે સુવિધાઓ આપે છે. ગિફ્ટ સિટીને ગ્રીન ફિલ્ડ સ્માર્ટ સિટી માટે ભારતનું પ્રથમ પ્લેટિનમ રેટેડ સિટી તરીકેનું બિરુદ પણ મળ્યું છે. ગિફ્ટ સિટી ખાતે મૂડી બજારો, ઓફશોર ઇન્સ્યોરન્સ, ઓફશોર બેંકિંગ અને એસેટ મેનેજમેન્ટ તેમજ વૈકલ્પિક ઇન્વેસ્ટમેન્ટ ફંડ્સ, એરક્રાફ્ટ, શિપ લીઝિંગ, આનુષંગિક સેવાઓ, બે આંતરરાષ્ટ્રીય સ્ટોક એક્સચેન્જ અને એક આંતરરાષ્ટ્રીય બુલિયન એક્સચેન્જ ઉપરાંત રાષ્ટ્રીય અને આંતરરાષ્ટ્રીય બેંકિંગ એકમો આવેલા છે.
ગિફ્ટ સિટીમાં Bank of America, DBS, Deutsche Bank, HSBC, MUFG Bank, Barclays, JP Morgan Chase, BNP Paribas, Standard Chartered Bank, Citibank, and New Development Bank જેવી વિદેશી બેંકો તેમજ SBI, Federal Bank, IDBI Bank, HDFC Bank, Kotak Mahindra, ICICI, Bank of India, Bank of Baroda, Indian Bank, RBL Bank, IndusInd Bank, Axis Bank and Yes Bank જેવી ભારતીય બેંકો સહિત કુલ 28 જેટલા બેન્કિંગ એકમો આવેલા છે. ગિફ્ટ સિટી ખાતે એલિયાન્ઝ, જનરલ ઇન્સ્યોરન્સ કોર્પોરેશન, ICICI લોમ્બાર્ડ જનરલ ઇન્સ્યોરન્સ, ન્યૂ ઈન્ડિયા એશ્યોરન્સ કંપની, લાઈફ ઈન્સ્યોરન્સ કોર્પોરેશન(LIC), કેનેરા HSBC, HDFC લાઈફ, નેશનલ ઈન્સ્યોરન્સ, આદિત્ય બિરલા કેપિટલ, એલાયન્સ ઈન્સ્યોરન્સ બ્રોકર્સ જેવી કુલ 35 વીમા કંપનીઓ આવેલી છે.
આ ઉપરાંત ગિફ્ટ સિટી ખાતે 24-એરક્રાફ્ટ લીઝિંગ અને ફાઇનાન્સિંગ એન્ટિટીઝ, 12-શિપ લીઝિંગ, 1-બુલિયન એક્સચેન્જ, 55 કરતા વધુ ફિનટેકસ કંપનીઓ, 130થી વધુ વૈકલ્પિક ઇન્વેસ્ટમેન્ટ ફંડ, 124-ફંડ મેનેજમેન્ટ કંપની, 2-આંતરરાષ્ટ્રીય સ્ટોક એક્સચેન્જ તથા 70 કરતા વધુ આનુષંગિક સેવાઓ પૂરી પાડતી કંપનીઓ આવેલી છે. અહીં ડેકિન યુનિવર્સિટી અને વોલોન્ગોંગ યુનિવર્સિટી જેવી વિદેશી યુનિવર્સિટીઓ તથા Google, IBM, Capgemini, Oracle, TCS, Cybage, Maxim Integrated જેવી મોટી કંપનીઓ પણ આવેલી છે. આગામી સમયમાં ગિફ્ટ સિટી ખાતે રિવરફ્રન્ટ, સેન્ટ્રલ પાર્ક, લીલાવતી હોસ્પિટલ જેવા વિવિધ પ્રોજેક્ટ્સ પણ કાર્યરત થશે.