અંકલેશ્વર
અંકલેશ્વર-સુરત સ્ટેટ હાઇવે પર ગમખ્વાર અકસ્માત સર્જાયો હતો. જેમાં 3 લોકોના ઘટના સ્થળે મોત નિપજ્યા હતા. એક જ પરિવારના ત્રણ લોકોના મોત થતા શોકનું મોજું ફરી વળ્યું હતુ. રાજ્યમાં દિવસે દિવસે અકસ્માતની ઘટનાઓ વધી રહી છે.
અંકલેશ્વરથી સુરતને જોડતા સ્ટેટ હાઇવે પર ફરી એક ગમખ્વાર માર્ગ અકસ્માત સર્જાયો હતો. જેમાં હાંસોટ તાલુકાના શેરા ગામ નજીકથી પૂરઝડપે પસાર થઈ રહેલ કાર ધડાકાભેર વૃક્ષ સાથે ભટકાતા અકસ્માત સર્જાયો હતો. અંકલેશ્વર સુરતના હાઇવે પર ગંભીર અકસ્માત સર્જાયો હતો. જેમાં ગાડી ઝાડ સાથે ભટકાઇ હતી. ત્યારે આ ઘટનામાં કારમાં સવાર બે લોકોના ઘટના સ્થળે જ મોત નિપજ્યા હતા. જ્યારે અન્ય એક વ્યક્તિને ઈજા પહોંચતા સારવાર અર્થે ખસેડવામાં આવ્યો હતો. જેનું સારવાર દરમિયાન મોત નિપજ્યું હતું.
મળતી માહિતી અનુસાર ભાવનગરનો પરિવાર કારમાં વહેલી સવારે સુરત જઈ રહ્યો હતો. તે દરમિયાન સમગ્ર ઘટના સર્જાઇ હતી. ત્યારે આ ઘટનાને લઇ હાંસોટ પોલીસનો કાફલો ઘટના સ્થળે પહોંચ્યો હતો. જે બાદ મૃતકોના મૃતદેહને પોસ્ટમોર્ટમ માટે ભરૂચ સિવિલ હોસ્પિટલ ખસેડવામાં આવ્યો હતો. સૂત્રોના જણાવ્યા અનુસાર વહેલી સવારના સમયે કારચાલકને ઝોકું આવી જતા અકસ્માત સર્જાયો હોવાનું લોકોમાં ચર્ચાયું હતું, ત્યારે સમગ્ર ઘટનાને લઇ પોલીસે વધુ તપાસ હાથ ધરી છે.