સુરત
સુરતના ભેસ્તાન વિસ્તારમાં ઇન્સ્ટાગ્રામ પર ફેમસ થવા માટે ભાઈગીરીનો વીડિયો બનાવનારા પાંચ યુવકોને ભેસ્તાન પોલીસે ઝડપી કાયદાનું ભાન કરાવ્યું છે. પાંચ યુવકોએ ફિલ્મી સ્ટાઈલમાં એન્ટ્રી કરીને જાહેરમાં સિગારેટ અને દારૂની બોટલ લઈ ડાન્સ કરી રહ્યાં હતાં. આ સાથે જ એક યુવકે તલવાર વડે કેક કાપી ભાઈગીરી બતાવવા મર્ડરનો સીન ક્રિએટ કર્યો હતો. આ વાઈરલ વીડિયોના આધારે પોલીસે તમામ આરોપીને ઝડપી કાયદેસર કાર્યવાહી કરી છે. ઈન્સ્ટાગ્રામ પર વાઇરલ થયેલા વીડિયોમાં જોઈ શકાઈ છે કે, યુવકો ફિલ્મી સ્ટાઇલમાં ટુ-વ્હીલર પર એન્ટ્રી લે છે. પોતે ભાઈલોગ હોય તે પ્રકારે પોતાને પ્રદર્શિત કરતા દેખાયા હતા. આ સાથે જ તલવાર વડે કેક કાપી અન્ય યુવકનું છરી મારી મર્ડરનો સિન ક્રિએટ કર્યો હતો. આ સાથે અન્ય યુવકના ગળા પર તલવાર રાખી હતી. આ વીડિયો મે, ૨૦૨૨માં બનાવાયો હતો, પરંતુ હાલમાં સોશિયલ મીડિયા પર ફરી વાઇરલ થતા પોલીસે કાયદેસરની કાર્યવાહી શરૂ કરી છે.વીડિયોને ધ્યાનમાં લઈ ભેસ્તાન પોલીસ સ્ટેશનના અધિકારીઓએ તરત જ યુવકોને શોધવાની કામગીરી શરૂ કરી હતી. વીડિયો અનુસંધાને તપાસ કરતા જાણવા મળ્યું કે, આ યુવકો ભેસ્તાનના ઉનપાટિયા વિસ્તારમાં રહે છે. પોલીસે તેમના સરનામા પર તપાસ કરી અને તમામ આરોપીઓને પકડી પાડયા હતાં. ધરપકડ કરાયેલા યુવકો ૧. અઝહર ઉર્ફે સોનુ ગુલાબ પિંજારી (ઉ.વ. ૨૧), ધંધોઃ નોકરી, રહેઃ બિસ્મિલ્લા નગર, ઉનપાટિયા ૨. જુનેદ ઇરફાન પિંજારી (ઉં.વ. ૧૯), ધંધોઃ નોકરી, રહેઃ બિલાલ નગર, ઉનપાટિયા ૩. આફતાબ સુપડુ પિંજારી (ઉં.વ. ૧૯), ધંધો: મજૂરી, રહેઃ બિલાલ નગર, ઉનપાટિયા ૪. રીઝવાન યુસુફ પિંજારી (ઉ.વ. ૨૨), ધંધો: મજૂરી, રહેઃ બિસ્મિલ્લા નગર, ઉનપાટિયા ૫. શોયેબ શમસુદ્દીન પિંજારી (ઉં.વ. ૨૩), ધંધોઃ ટેલર, રહેઃ રેશ્મા નગર, ઉનપાટિયાની ધરપકડ કરાઈ છે. આરોપી અઝહર અને જુનેદ વિરુદ્ધ હથિયારબંધ જાહેરનામા ભંગના ગુનાના કેસ નોંધવામાં આવ્યા છે. જ્યારે અન્ય ત્રણ યુવકો પર શાંતિ ભંગ કરવા માટે કાયદેસરની કાર્યવાહી કરવામાં આવી છે.ધરપકડ બાદ તમામ યુવકોએ પોતાની ભૂલ માટે માફી માંગી હતી અને કહ્યું કે, આ વીડિયો જૂનો હતો. તેમણે પોલીસને વચન આપ્યું કે, તેઓ ફરી ક્યારેય આવા જોખમી વીડિયો બનાવી લોકોને ગુમરાહ કરશે નહીં. ભેસ્તાન પોલીસે આ પ્રસંગે તમામ યુવાનોથી સોશિયલ મીડિયા પર યોગ્ય અને કાયદેસર રીતે વર્તન કરવાનો આગ્રહ રાખ્યો. ભવિષ્યમાં આવા વીડિયો બનાવતા પકડાશે તો કડક પગલાં લેવામાં આવશે તેવો આદેશ પણ જાહેર કર્યો છે. આ ઘટનાથી સુરતના યુવાનો માટે સાબિત થાય છે કે, સોશિયલ મીડિયા પર ફેમસ થવા માટે જોખમી હિલચાલો કરવી ભવિષ્યને દાવ પર મૂકવા સમાન છે.
૨૦૨૨માં રીલ બનાવી, ૨૦૨૫માં ધરપકડ, સુરતમાં યુવકોએ મર્ડરનો સીન ક્રિએટ કરી તલવારથી કેક કાપી; ફિલ્મી સ્ટાઈલમાં એન્ટ્રી લઈ સિગારેટ-દારૂની બોટલ સાથે રીલ બનાવી હતી