રાજકોટની પાયલ હોસ્પિટલમાં મહિલાઓના સારવાર દરમિયાનના ચેકઅપના આપત્તિજનક સીસીટીવી ફૂટેજ વેચવાના કૌભાંડમાં અમદાવાદ સાયબર ક્રાઇમે ગઈકાલે (19 ફેબ્રુઆરી) મહારાષ્ટ્રથી બે અને પ્રયાગરાજથી એક આરોપીને ઝડપી પાડ્યો છે. આ ત્રણેય આરોપી યુટ્યૂબ અને ટેલિગ્રામ ચેનલમાં આ પ્રકારનાં દૃશ્યો વેચતાં હતાં. આ માટે તેઓ લોકો પાસેથી મોટી રકમ લેતા હોવાની વિગતો પણ અમદાવાદ સાયબર ક્રાઈમ બ્રાન્ચ પાસે આવી છે. બીજી તરફ રાજકોટની પાયલ હોસ્પિટલમાંથી સીસીટીવી આઇપીના આધારે હેક થયા હોવાની પણ સ્પષ્ટતા અમદાવાદ સાયબર ક્રાઇમ પાસેથી થઈ રહી છે.
આજે (20 ફેબ્રુઆરી) ત્રણેય આરોપીને લઈ સાયબર ક્રાઇમની ટીમ અમદાવાદ પહોંચશે. સાયબર ક્રાઈમની પ્રાથમિક તપાસમાં આરોપીઓ દ્વારા એક યુટ્યૂબ ચેનલ અને ટેલિગ્રામ ચેનલ ચલાવવામાં આવતી હોવાનું સામે આવ્યું છે. એક ચેનલને આરોપી પ્રયાગરાજથી ઓપરેટ કરતો હતો. હાલમાં પ્રયાગરાજમાં મહાકુંભનો મેળો ચાલી રહ્યો છે, તેમાં કોઇ મહિલાના સ્નાન કરતા આપત્તિજનક ફોટો- વીડિયો ક્લિક થયાની શંકાના આધારે પણ સાયબર ક્રાઈમ આરોપીઓની આકરી પૂછપરછ કરશે. હાલ આરોપીઓના ફોન સાયબર ક્રાઈમે કબજે કરી લીધા છે અને તેનો ડિલીટ થયેલો ડેટા ભેગો કરવામાં આવશે.
આ મામલે વિધાનસભામાં ચર્ચા દરમિયાન રાજ્ય ગૃહમંત્રી હર્ષ સંઘવીએ મહિલા આઈપીએસને અભિનંદન આપતાં જણાવ્યું હતું કે રાજ્યની મહિલા આઇપીએસ દ્વારા 3000 કિમીથી દૂરથી આરોપીઓ પકડી લેવામાં લાવ્યા છે. સાયબર ટેરરિઝમ પર રોક લગાવનારી પહેલી મહિલા આઇપીએસ લવિના સિન્હા છે. મહિલા આઈપીએસને અભિનંદન આપું છું. પોલીસની ભરતી પ્રક્રિયા પણ એક મહિલા આઇપીએસ નીરજા ગોત્રુ કરે છે. હાલની મહિલા પોલીસની સંખ્યા ડબલ કરીશું. ગુજરાતમાં મહિલા IPS 34 છે, 22 નવા અને 8 સીધી ભરતીથી IAS મળશે.
મહિલાઓની સારવાર દરમિયાન ચેકઅપના સીસીટીવી વેચવાના કૌભાંડ મામલે JCP શરદ સિંઘલ દ્વારા પ્રેસ-કોન્ફરન્સ યોજવામાં આવી હતી. એમાં તેમણે જણાવ્યું હતું કે રાજકોટ ક્રાઇમ દ્વારા મહત્ત્વની મદદ મળી છે. 3 મહિનાના સીસીટીવી IP ચેક કરવામાં આવ્યા છે. આ ટેલિગ્રામ ચેનલ મહારાષ્ટ્રના સાંગલી અને લાતુરથી ઓપરેટ થતી હતી. મહારાષ્ટ્ર અને પ્રયાગરાજમાં ટીમ દ્વારા તપાસ કરવામાં આવી હતી. ફૂલચંદ્ર નામની બીજી વ્યક્તિ ટેલિગ્રામ ચેનલ ચલાવતો હતો. રોમાનિયા અને એટલાન્ટાના હેકર સાથે પ્રજ્વલ સંપર્કમાં હતો.
તેમણે વધુમાં જણાવ્યું હતું કે દેશની અલગ અલગ જગ્યાએ હોસ્પિટલમાં સીસીટીવી હેક થયાની શક્યતા છે. હજી સુધી કોઇ હોસ્પિટલ સ્ટાફની મદદગારી સામે આવી નથી. એક વર્ષથી આ પ્રકારની ચેનલ ચાલતી હતી. બે આરોપી 12 પાસ હતા. કુલ ત્રણ આરોપી છે, જેમાંથી બેને ઝડપી પાડવામાં આવ્યા છે. તેમને લાવવામાં આવી રહ્યા છે. આવ્યા બાદ ડિટેઇલ મળશે. રાજકોટની હોસ્પિટલના CCTV મેળવવા ડિસેમ્બરથી પ્રયાસ કરતા હતા. જાન્યુઆરીના પ્રથમ સપ્તાહમાં સીસીટીવી મેળવ્યા હતા.