રાજ્યના દરિયાકાંઠાના વિસ્તારોમાં આગામી પાંચ દિવસ ગરમી અને બફારા સાથે યલો એલર્ટ

આગામી 24 કલાક ગુજરાતનું મહત્તમ તાપમાન યથાવત્ રહેશે ત્યાર બાદ બેથી ત્રણ ડિગ્રી સેલ્સિયસ તાપમાનમાં વધારો થવાની શક્યતા છે. લઘુતમ તાપમાન આગામી ત્રણ દિવસ દરમિયાન બેથી ત્રણ ડિગ્રી સેલ્સિયસ વધી શકે છે, એટલે કે ગુજરાતમાં હવે શિયાળાની અસર વર્તાય એની શક્યતા જણાતી નથી.  છેલ્લા 24 કલાક દરમિયાન ગુજરાતમાં સૌથી વધુ મહત્તમ તાપમાન રાજકોટમાં 37.5 ડિગ્રી સેલ્સિયસ નોંધાયું હતું તથા અમદાવાદનું મહત્તમ તાપમાન 35 ડિગ્રી સેલ્સિયસ અને લઘુતમ તાપમાન ગત સપ્તાહની સરખામણી બે ડિગ્રી સેલ્સિયસ સુધી ઘટ્યું છે, હજુ પણ અમદાવાદ અને આસપાસના વિસ્તારનું લઘુતમ તાપમાન સામાન્ય કરતાં ત્રણ ડિગ્રી સેલ્સિયસ જેટલું વધુ નોંધાઈ રહ્યું છે. ગત વર્ષોની સરખામણીએ અમદાવાદ શહેરનું લઘુતમ તાપમાન આ સમય દરમિયાન 15થી 16 ડિગ્રી સેલ્સિયસની આસપાસ રહેતું હોય છે, પરંતુ આ વર્ષે ફેબ્રુઆરી માસમાં કાળઝાળ ગરમીનો અનુભવ થઈ રહ્યો છે. છેલ્લા 24 કલાક દરમિયાન અમદાવાદ શહેરનું લઘુતમ તાપમાન 18.5 ડિગ્રી હતું, પરંતુ આગામી ત્રણ દિવસમાં લઘુતમ તાપમાનમાં પણ બેથી ત્રણ ડિગ્રી સેલ્સિયસના વધારાની શક્યતા હવામાન વિભાગે વ્યક્ત કરી છે. આગામી 24 કલાક દરમિયાન અમદાવાદ અને આસપાસના વિસ્તારોનું વાતાવરણ શુષ્ક રહેવાની સાથે મહત્તમ તાપમાન 35 ડિગ્રી સેલ્સિયસ, જ્યારે લઘુતમ તાપમાન 19 ડિગ્રી સેલ્સિયસની આસપાસ રહેવાની શક્યતા છે.