કેનેડાના વડા પ્રધાન માર્ક કાર્નેએ મંગળવારે તેમના મંત્રીમંડળમાં ફેરબદલની જાહેરાત કરી, જેમાં ભારતીય મૂળની અનિતા આનંદને વિદેશ પ્રધાન તરીકે નિયુક્ત કરવામાં આવ્યા. તાજેતરમાં ફરીથી ચૂંટાયેલી લિબરલ સરકારની રચના હેઠળ તેમણે આ પગલું ભર્યું છે. મંગળવારે ગીતા પર હાથ રાખીને અનિતા આનંદે નવા વિદેશ મંત્રી તરીકે શપથ લીધા. તે કેનેડાના વિદેશ મંત્રી બનનાર પ્રથમ હિન્દુ મહિલા પણ છે. કેનેડા અનેક વિદેશી બાબતોના પડકારોનો સામનો કરી રહ્યું છે. આ વર્ષની શરૂઆતમાં જસ્ટિન ટુડોના સ્થાને આવેલા અને ગયા મહિને ચૂંટણી જીતનારા કાર્નેએ મેલાની જોલીના સ્થાને અનિતા આનંદને વિદેશ -ધાન તરીકે નિયુક્ત કર્યા. મેલાની જોલીને ઉદ્યોગ મંત્રી બનાવવામાં આવ્યા છે. અનિતા આનંદે અગાઉ સંરક્ષણ પ્રધાન સહિત અનેક ભૂમિકાઓ સંભાળી છે. કેનેડા અને યુનાઇટેડ સ્ટેટ્સ વચ્ચેના વેપાર યુદ્ધ દરમિયાન ફ્રાન્કોઇસ-ફિલિપ શેમ્પેન નાણામંત્રી તરીકે પોતાનું પદ જાળવી રાખે છે, જ્યારે ડોમિનિક લેબ્લેન્ક વેપાર મંત્રી રહે છે. કાર્નેએ કેનેડા પ્રત્યે યુએસ રાષ્ટ્રપતિ ડોનાલ્ડ ટ્રમ્પ દ્વારા દર્શાવવામાં આવેલા આક્રમકતાનો સામનો કરવાનું વચન આપીને વડા પ્રધાન પદ જીત્યું. કાર્નેએ જણાવ્યું હતું કે કેનેડિયનોએ આ નવી સરકારને યુનાઇટેડ સ્ટેટ્સ સાથે નવા આર્થિક અને સુરક્ષા સંબંધોને વ્યાખ્યાયિત કરવા અને બધા કેનેડિયનો માટે મજબૂત અર્થતંત્ર બનાવવા માટે મજબૂત જનાદેશ સાથે ચૂંટયા છે. કાર્નેએ જણાવ્યું હતું કે ૨૭ મેના રોજ સંસદ ફરી શરૂ થશે ત્યારે કિંગ ચાર્લ્સ III કેનેડિયન સરકારની પ્રાથમિકતાઓની રૂપરેખા આપતું ભાષણ આપશે. અનિતા આનંદનો જન્મ નોવા સ્કોટીયાના કેન્ટવિલેમાં થયો હતો. તેમના માતાપિતા ભારતીય ચિકિત્સકો હતા. તેમના પિતા તમિલનાડુના હતા અને માતા પંજાબના હતા. અનિતાને બે બહેનો છે, ગીતા આનંદ, જે ટોરોન્ટોમાં વકીલ છે, અને સોનિયા આનંદ, જે મેકમાસ્ટર યુનિવર્સિટીમાં ચિકિત્સક અને સંશોધક છે.