હાઇકોર્ટમાં લેન્ડ ગ્રેબિંગ કાયદા-2020ને પડકારતી અરજી કરનાર અરજદારને ચીફ જસ્ટિસ સુનિતા અગરવાલ અને જસ્ટિસ ડી.એન. રેની બેંચે 5 લાખનો દંડ ફટકાર્યો છે. હાઈકોરે અરજદારની અરજીને સંપૂર્ણપણે ખોટી રીતે કલ્પના આધારિત અરજી ગણાવી હતી અને દાખલારૂપ દંડ ફટકારતાં આકરું વલણ અપનાવ્યું હતું. હાઇકોર્ટે એમ પણ નોંધ્યું કે ગત વર્ષે હાઇકોર્ટે લેન્ડ ગ્રેબિંગ કાયદાની માન્યતાને યોગ્ય ઠરાવ્યો હતો. હાઇકોર્ટે કહ્યું હતું કે, અરજદારે 2024માં કાયદા હેઠળ તેમની સામે કથિત ગુનાઓને રદ કરવા માટેની અરજી પાછી ખેંચી લીધા પછી, કાયદાની જોગવાઈઓની માન્યતાને પડકારતી હાલની અરજી દાખલ કરી હતી. આ એક સંપૂર્ણપણે ખોટી કલ્પનાવાળી અરજી છે જે વકીલની ખોટી સલાહ પર દાખલ કરવામાં આવી હોય તેવું લાગે છે, જેઓ 26 મે, 2025ના સુપ્રીમ કોર્ટના નિર્ણયનો ટેકો લઈ રહ્યા છે. જેમાં અરજદાર દ્વારા સુપ્રીમ કોર્ટ સમક્ષ ભારતના બંધારણની કલમ 32 હેઠળ દાખલ કરવામાં આવેલી અરજીનો નિકાલ કરવામાં આવ્યો હતો. જેમાં અરજદારોને કાયદા અનુસાર ઉપાયો મેળવવાની સ્વતંત્રતા અનામત રાખવામાં આવી હતી.
આ અરજીમાં માંગવામાં આવેલી દાદની નોંધ લેતા કોર્ટે આદેશમાં આગળ કહ્યું હતું કે, આપણે નોંધ લઈ શકીએ છીએ કે આ કોર્ટ સમક્ષ FIR રદ કરવાની માંગ કરતી રિટ અરજીનો આ બીજો રાઉન્ડ છે. પહેલાં રાઉન્ડમાં અરજદારે કાયદા અનુસાર ઉપલબ્ધ અન્ય ઉપાયો મેળવવા માટે તેની અરજી પાછી ખેંચવાની પરવાનગી માંગી હતી, અને કોર્ટે 19 નવેમ્બર, 2024 ના તેના આદેશમાં તેને મંજૂરી આપી હતી. હાઇકોર્ટે નોંધ્યું હતું કે, લેન્ડ ગ્રેબિંગ અધિનિયમ 2020ને ભારતના બંધારણની વિરુદ્ધ જાહેર કરવાની માંગ કરતી અરજી કરી હતી. જોકે, આ મુદ્દાનો હાઇકોર્ટે અનેક અરજીઓમાં નિર્ણય કરી લીધો છે. ઉલ્લેખનીય છે ગયા વર્ષે મે મહિનામાં હાઈકોર્ટે 150 અરજીઓના એક સમૂહમાં કાયદાની બંધારણીય માન્યતા અને તેના સંલગ્ન નિયમોને સમર્થન આપ્યું હતું. જમીન પચાવી પાડવા બદલ ઓછામાં ઓછી 10 વર્ષની સજા લાદવા અંગે કોર્ટે વિધાનસભાના વિવેકને સમર્થન આપ્યું હતું, અને કહ્યું હતું કે લોકોના શ્રેષ્ઠ હિતમાં શું છે તે નક્કી કરવાનો ચૂંટાયેલા પ્રતિનિધિઓનો વિશેષાધિકાર છે.