અમદાવાદના કાલુપુર રેલવે સ્ટેશનની આસપાસ મુસાફરો સાથે લૂંટફાટ, અભદ્ર વ્યવહાર અને ટ્રાફિકની સમસ્યાઓને ધ્યાનમાં રાખીને શહેર પોલીસ કમિશનર જી.એસ. મલિક દ્વારા રેલવે અને મ્યુનિસિપલ કોર્પોરેશનના ઉચ્ચ અધિકારીઓ સાથે કાલુપુર રેલવે સ્ટેશનની મુલાકાત લેવામાં આવી હતી અને સંકલન બેઠક યોજવામાં આવી હતી.
કાલુપુર રેલવે સ્ટેશન પાસે કેટલાક રીક્ષાચાલકો દ્વારા મુસાફરોને ડરાવી-ધમકાવીને બેસાડવામાં આવતા હોવા અને તેમની સાથે લૂંટફાટના કિસ્સાઓ સામે આવ્યા હતા. આ ઉપરાંત, રેલવે સ્ટેશનના રીડેવલપમેન્ટની કામગીરી ચાલી રહી હોવાથી ટ્રાફિકની પણ ભારે સમસ્યા સર્જાતી હોય છે, જેમાં રીક્ષાચાલકો દ્વારા પેસેન્જર લેવા માટે રોડ પર ટ્રાફિક કરવામાં આવતો હોવાનું પણ નોંધાયું હતું. આ તમામ બાબતોને લઈને પોલીસ કમિશનરે ટ્રાફિક વ્યવસ્થાને યોગ્ય રીતે ગોઠવવા સૂચના આપી હતી.
શહેર પોલીસ કમિશનર જી.એસ. મલિકના અધ્યક્ષસ્થાને શહેર વિસ્તારના મુસાફર પરિવહન સ્થળોની સુરક્ષા અંગેની સંકલન બેઠક યોજવામાં આવી હતી. આ બેઠક બાદ પોલીસ કમિશનર સહિતના અધિકારીઓ દ્વારા કાલુપુર રેલવે સ્ટેશનની મુલાકાત લેવામાં આવી હતી. અમદાવાદના કાલુપુર રેલવે સ્ટેશન ખાતે આવતા મુસાફરોને પડતી અગવડતાને ધ્યાનમાં રાખીને રેલવેના અધિકારીઓ અને મ્યુનિસિપલ કોર્પોરેશનના અધિકારીઓ સાથે વાહન પાર્કિંગ, નવા વિકસી રહેલા રેલવે સ્ટેશનના સરસપુર તરફના વિસ્તાર, તથા ભવિષ્યમાં ટ્રાફિકની અગવડતા ઓછી થાય તે રીતના આયોજન અંગે ચર્ચા કરવામાં આવી હતી.
સૂત્રોના જણાવ્યા મુજબ, કાલુપુર રેલવે સ્ટેશનના ઇન ગેટ, રેલવે સ્ટેશનનું પરિસર અને આઉટ ગેટ પાસે મુસાફરોને લાવવા-લઈ જવામાં આવતી ટેક્સીઓ અને ઓટોરિક્ષાના ડ્રાઇવરો દ્વારા યોગ્ય રીતે પેસેન્જર લઈને ટ્રાફિક ન થાય તે રીતનું આયોજન ગોઠવવા માટે જણાવવામાં આવ્યું હતું. ખાસ કરીને આઉટ ગેટની બહારના ભાગે તેમજ ઇન ગેટ પાસે લારીઓ અને ગલ્લાના દબાણો હોવાથી તેને દૂર કરવા માટેની પણ સૂચના આપવામાં આવી છે. આઉટ ગેટની બહારના ભાગે કેટલાક રિક્ષાવાળાઓ રોડ પર ટ્રાફિક થાય તે રીતે ઊભા રહેતા હોય છે, જેથી ટ્રાફિક પોલીસને આવા રીક્ષાચાલકોને ત્યાંથી દૂર કરવા પણ જણાવ્યું હતું.
આ સમગ્ર બાબતને લઈ રેલવેના ડિવિઝનલ મેનેજર, રેલવેના એડીઆરએમ, આરપીએફના ડિવિઝનલ સિક્યોરિટી અધિકારીઓ, સ્ટેશન ડાયરેક્ટર, અમદાવાદ મ્યુનિસિપલ કોર્પોરેશનના ડેપ્યુટી મ્યુનિસિપલ કમિશનર, વેસ્ટર્ન રેલવેના નાયબ પોલીસ અધિક્ષક, આરટીઓના ઇન્સ્પેક્ટર, અમદાવાદ શહેરના નાયબ પોલીસ કમિશનર અને સ્થાનિક પોલીસ ઇન્સ્પેક્ટર હાજર રહ્યા હતા.