નવરાત્રિની પ્રથમ રાત્રિએ ગાંધીનગરમાં એક મોટી આગ દુર્ઘટના સર્જાઈ હતી, જેમાં જાનહાનિ ટળી છે. રાયસણ બિઝનેસ પાર્ક નજીક આવેલા એક ફ્રેન્કી સ્ટેશનમાં એકસાથે બે ગેસ સિલિન્ડરોમાં ભીષણ આગ લાગી હતી. જોકે, ફ્રેન્કી સ્ટેશનનો કારીગર સમયસર કૂદીને ભાગી જતા તેનો જીવ બચી ગયો હતો પરંતુ, ગાડીને મોડીફાઇડ કરીને બનાવેલ ફ્રેન્કી સ્ટેશન બળીને ખાખ થઈ ગયું હતું. આ ઘટનાથી જીવતા બોમ્બ સમાન ગેસ સિલિન્ડર રાખીને અનરજિસ્ટર્ડ અને ગેરકાયદેસર ધંધા કરતા વેપારીઓ સામે કડક કાર્યવાહીની માંગ નાગરિકોમાં પ્રબળ બની છે.
ગાંધીનગરના સેક્ટર-14માં રહેતા કલ્પેશ મકવાણાએ એક ગાડીને મોડિફાઈડ કરીને રાયસણ બિઝનેસ પાર્ક નજીક ‘ફ્રેન્કી સ્ટેશન’ શરૂ કર્યું છે, જે અનરજિસ્ટર્ડ હોવાનું જાણવા મળ્યું છે. આ ફ્રેન્કી સ્ટેશનમાં રાજસ્થાનનો રાહુલ મસાર નામનો કારીગર કામ કરતો હતો. આજે રાત્રે લગભગ 9 વાગ્યાના અરસામાં કારીગરે ધંધો શરૂ કરવા માટે ગેસ સિલિન્ડરને સગડી સાથે જોડ્યા હતા. તેણે લાઈટર વડે સગડી ચાલુ કરી કે તરત જ આગ ભભૂકી ઉઠી હતી.જોતજોતામાં આગે વિકરાળ સ્વરૂપ ધારણ કરી લીધું અને આખું ફ્રેન્કી સ્ટેશન ભડભડ સળગવા લાગ્યું હતું .આ જોઈને કારીગર ગભરાઈને “બચાવો, બચાવો”ની બૂમો પાડતા ગાડીમાંથી કૂદીને બિઝનેસ પાર્કમાં ભાગી ગયો, જેના કારણે તેનો જીવ બચી ગયો હતો.
આ ઘટનાની જાણ થતા જ આસપાસના લોકો એકઠા થઈ ગયા હતા. પોલીસ અને ગાંધીનગર ફાયર બ્રિગેડની ટીમ તાત્કાલિક ઘટનાસ્થળે દોડી આવી ગઈ હતી. ફ્રેન્કી સ્ટેશનમાં બે ગેસ સિલિન્ડર હોવાથી બ્લાસ્ટ થવાની શક્યતા હતી. આ સંભાવનાને ધ્યાનમાં રાખીને ફાયરબ્રિગેડે બીજું ટેન્કર પણ મંગાવ્યું અને આસપાસના લોકોને પોલીસની મદદથી સલામત સ્થળે દૂર ખસેડ્યા હતા. બાદમાં બંને ટેન્કરો દ્વારા એકસાથે પાણીનો મારો ચલાવીને ભારે જહેમત પછી આગ પર કાબૂ મેળવવામાં આવ્યો હતો .આ કામગિરી દોઢેક કલાક ચાલી હતી.જો સિલિન્ડરો ફાટ્યા હોત તો મોટી જાનહાની થવાની સાથે નજીકના કોમ્પ્લેક્સમાં પણ આગ ફેલાઈ શકયતા હતી.
આ ઘટનાના પગલે સ્થાનિક લોકોમાં રોષ જોવા મળ્યો છે. તેમણે જણાવ્યું કે, આવા ગેરકાયદેસર વાહનોમાં ખાણી-પીણીનો ધંધો કરતા વેપારીઓ સામે કડક કાર્યવાહી થવી જોઈએ. આવા ધંધાદારીઓ જીવતા બોમ્બ સમાન ગેસ સિલિન્ડરો રાખીને બેફિકરપણે વેપાર કરી રહ્યા છે. ભવિષ્યમાં શહેરમાં કોઈ મોટી દુર્ઘટના ન સર્જાય તે માટે આવી ગેરકાયદેસર હાટડીઓ તાત્કાલિક બંધ કરાવવી જરૂરી છે.