ખેડા પાસે પામોલિન ઓઇલ ભરેલું ટેન્કર પલટી જવાની ઘટના સામે આવી છે. ટેન્કર પલટી જતાં 32 ટન પામોલિન ઓઇલની હાઇવે પર રેલમછેલ થતાં આજુબાજુના લોકો ડોલ-કેરબા સહિત જે હાથમાં આવ્યું એ લઇને ભરવા દોડ્યા હતા, જોકે અકસ્માતની આ ઘટનામાં સદનસીબે કોઇ જાનહાનિ થઇ નથી. મળતી માહિતી મુજબ કચ્છના ગાંધીધામથી પામોલિન ઓઇલ ભરીને ટેન્કર નડિયાદ જઇ રહ્યું હતું. આ દરમિયાન ખેડા પાસે કોઇ પશુ આડે આવી જતાં ડ્રાઇવરે સ્ટીયરિંગ પરથી કાબૂ ગુમાવતાં ટેન્કર ગુલાંટ મારી ગયું હતું. ટેન્કર પલટ્યાની જાણ થતાં આજુબાજુના મોટી સંખ્યામાં લોકો જે વાસણ હાથમાં આવ્યું એ લઇને તેલ ભરવા માટે દોડ્યા હતા અને જોતજોતાંમાં હજારો લિટર ઢોળાયેલું પામોલિન ઓઇલ લોકોએ ભરી લીધું હતું. આ ઘટનાને પગલે રસ્તા પર ટ્રાફિકજામની સ્થિતિ સર્જાઈ હતી, સ્થાનિક પોલીસ અને ફાયર વિભાગની ટીમ ઘટનાસ્થળે પહોંચીને કાયદેસરની કાર્યવાહી તેમજ ટ્રાફિક વ્યવસ્થાપન હાથ ધર્યું હતું.
ટેન્કરના ડ્રાઇવર ભજનલાલે જણાવ્યું હતું કે હું મારી રીતે ટેન્કર ચલાવીને આવતો હતો, એ દરમિયાન અચાનક ઢોર આવી જતાં ગાડી અનબેલેન્સ થઇને ગ્રિલને ટકરાઇને પલટી મારી ગઇ હતી. આ ટેન્કરમાં 32 ટન પામોલિન ઓઇલ ભરેલું હતું, જે નડિયાદમાં ખાલી કરવાનું હતું. ખેડા ફાયર વિભાગના ક્લાર્ક મહેન્દ્રસિંહ પરમારના જણાવ્યા અનુસાર, માતર પોલીસ ટાઉન સ્ટેશન તરફથી અમને ખેડા હાઇવે પર ઓઇલનું ટેન્કર પલટી ખાઈ ગયું હોવાની જાણ મળી હતી. તરત જ અમે અમારી ટીમ સાથે ઘટનાસ્થળે પહોંચ્યા હતા. મહેન્દ્રસિંહ પરમારે વધુમાં જણાવ્યું હતું કે ટેન્કર પલટી મારી જતાં એમાંથી પામોલિન ઓઇલ મોટા પ્રમાણમાં રસ્તા પર ઢોળાયું હતું. રસ્તા પર ઢોળાયેલા આ ઓઇલને કારણે કોઈ મોટી દુર્ઘટના, ખાસ કરીને આગ કે લપસી જવાનો અકસ્માત ન સર્જાય, એને ધ્યાનમાં રાખીને અમે સુરક્ષાનાં પગલાં ભર્યાં હતાં અને સ્થળ પર હાજર રહ્યા હતા. ફાયર વિભાગની હાજરીને કારણે ઓઇલ ઢોળાયા બાદની પરિસ્થિતિમાં વધુ જોખમ સર્જાતું અટકાવી શકાયું હતું.