દેશભરમાં ઓનલાઇન છેતરપિંડીના બનાવો વધ્યા છે, ત્યારે આવી છેતરપિંડીનો રેલો દેશના છેવાડાના કચ્છ જિલ્લાના ભુજ સુધી પહોંચ્યો છે. સમન્વય પોર્ટલની મદદથી મ્યુલ એકાઉન્ટની છાનબીન દરમ્યાન વધુ એક મોટો ધડાકો સામે આવ્યો છે, જેમાં ભુજનાં એક બેન્ક ખાતાંમાં એક વર્ષ દરમ્યાન અલગ-અલગ રાજ્યની અનેક છેતરપિંડીની અધધધ રકમ રૂા. 1.05 અબજ જમા થઇ અને ઊપડીએ ગઇ.
આ અંગે એલસીબીએ ત્રણ વિરુદ્ધ નામજોગ તથા તપાસમાં નીકળે તેની સામે ફરિયાદ નોંધાવી છે. અત્યંત મહત્ત્વના અને ચોંકાવનારા આ બનાવ અંગે નોંધાયેલી ફરિયાદની રસપ્રદ વિગતો એવી છે કે, આરોપી 29 વર્ષીય શુભમ હરિહર ડાભી (રહે. સાગરસિટી, મુંદરા રોડ, ભુજ) અને જિગર મહેન્દ્રભાઇ પરગડુ (રહે. છાડુરા, તા.
અબડાસા)એ ક્રિષ્ના ટ્રેડર્સ નામની ખોટી પેઢી ઊભી કરી તેનું સરનામું સવાયા ફળિયાં ભુજ બનાવી, તેનો સિક્કો બનાવી, ઉદ્યમમાંથી સર્ટિ. મેળવી ભુજની આરટીઓવાળી એચડીએફસી બેન્કની બ્રાન્ચમાં ત્યાં નોકરી કરતા ભાવિક પાસેથી પેઢીનું ખાતું તા. 9/12/24ના ખોલાવ્યું હતું. ખાતું ખોલ્યાના માત્ર બાવીસ દિવસમાં જ એટલે તા.
31/12/24 સુધી આ ખાતાંમાં કુલે રૂા. 13,49,46,781 તથા વર્ષ 2025માં 4/9/25 સુધીમાં કુલે રૂા. 91,63,06,045 જેટલી માતબર રકમનું ટ્રાન્ઝેકશન થયું. આમ ખાતાંમાં કુલ રૂા.
1,05,12,52,826 જમા થયા, જે પૈકી મહત્તમ રકમનો ઉપાડ પણ થઇ ગયો હતો. જિગરે સહી કરેલા ચેકથી ઉપાડ થયો હતો અને તેને કમિશન પેટે રૂા. 30,000 મળ્યા હોવાનું ફરિયાદમાં લખાવાયું છે. પશ્ચિમ કચ્છ જિલ્લાની એલસીબીના સાયબર સેલે સમન્વય પોર્ટલ પર મ્યુલ બેન્ક એકાઉન્ટની તપાસ કરતાં ઉપરોકત એકાઉન્ટ સામે આવતાં ડિજિટલ ફૂટપ્રિન્ટથી પગેરું દબાવ્યું હતું.
આ એકાઉન્ટ સામે દેશભરના અલગ-અલગ રાજ્યમાં કુલ 40 જેટલી ઓનલાઇન છેતરપિંડીની ફરિયાદ દાખલ થયેલી છે, જેની વિગતો પણ એલસીબીએ આજે બી-ડિવિઝન પોલીસ મથકે નોંધાવેલી ફરિયાદમાં સામેલ કરી છે. આરોપી શુભમ, જિગર અને ભાવિક તથા તપાસમાં જે નીકળે તે તમામ સામે બી-ડિવિઝન પોલીસે આઇ.ટી. એક્ટ તથા અન્ય કલમો તળે ગુનો દાખલ કર્યો હતો. દરમ્યાન આરોપી શુભમને એલસીબીએ ઝડપીને બી-ડિવિઝન પોલીસને સોંપ્યો હતો.