ગાંધીનગરના અડાલજ વિસ્તારમાં શ્રીનાથ પેટ્રોલ પંપ નજીક ગઈકાલે ગમખ્વાર અકસ્માત થયો હતો. લગ્નના ઓર્ડર માટે અમદાવાદથી ભાડે કેમેરા લઈને પાલનપુર જઈ રહેલા બે મિત્રની કાર ડિવાઈડર સાથે અથડાયા બાદ કાર પલટી ગઈ હતી. આ ઘટનામાં એક યુવકને બેભાન અવસ્થામાં અમદાવાદ સિવિલમાં ખસેડાયો હતો, જ્યાં તેનું સારવાર દરમિયાન મોત નીપજતા પોલીસે ગુનો નોંધી કાર્યવાહી હાથ ધરી છે. આ ઘટનામાં બીજા મિત્રને પણ સામાન્ય ઈજાઓ પહોંચી છે.
આણંદ જિલ્લાના નાપા ગામના વતની અને ફોટોગ્રાફીના વ્યવસાય સાથે સંકળાયેલા જયેશ તળપદાએ નોંધાવેલી ફરિયાદ મુજબ, તેઓ છેલ્લા એક વર્ષથી પાલનપુરના કિરણ રાજેશભાઈ શર્મા સાથે ફોટોગ્રાફીનું કામ કરે છે. ગઈકાલે 21 જાન્યુઆરીના રોજ પાલનપુર ખાતે લગ્નનો ઓર્ડર હોવાથી તેમને કેમેરાની જરૂર હતી. આ માટે બંને મિત્રો હોન્ડા સિટી કાર લઈને રાત્રિના સમયે અમદાવાદના ચાંદખેડા સ્થિત યુનિક કેમેરા રેન્ટલ ખાતે કેમેરા લેવા આવ્યા હતા.
બાદમાં રાત્રે આશરે 4 વાગે ચાંદખેડાથી કેમેરા લઈને બંને મિત્રો પરત પાલનપુર જવા નીકળ્યા હતા, ત્યારે કાર કરણ શર્મા ચલાવી રહ્યો હતો. એ દરમિયાન અડાલજ ગામ પાસે શ્રીનાથ પેટ્રોલ પંપ સામે સ્વાગત સિટી સોસાયટી નજીક પહોંચતા જ કરણે અચાનક ગાડી પરનો કાબૂ ગુમાવી દીધો હતો. જેના લીધે પૂરઝડપે કાર રોડ વચ્ચેના ડિવાઈડર સાથે અથડાઈને પલટી મારી ગઈ હતી.
આ અકસ્માતના પગલે બંને મિત્રો ગાડીમાં દબાઈ ગયા હતા. જોકે, જયેશ કોઈ રીતે ગાડીની બહાર નીકળી ગયો હતો અને રાહદારીઓની મદદથી ગાડી સીધી કરી કરણને બહાર કાઢ્યો હતો. જોકે કરણના માથાના ભાગે ગંભીર ઈજાઓ થતા તે સ્થળ પર જ બેભાન થઈ ગયો હતો.બાદમાં 108 એમ્બ્યુલન્સ મારફતે બંનેને તાત્કાલિક ગાંધીનગર સિવિલ હોસ્પિટલ ખસેડવામાં આવ્યા હતા.
જોકે, કરણની હાલત વધુ નાજુક જણાતા તેને અમદાવાદ સિવિલ હોસ્પિટલ ટ્રાન્સફર કરવામાં આવ્યો હતો. જ્યાં સારવાર દરમિયાન તેનું મોત નીપજ્યું હતું. 23 વર્ષીય મૃતક કરણ શર્મા પાલનપુરના અંબિકાનગરનો રહેવાસી હતો. આ ઘટનાથી પાલનપુરના ફોટોગ્રાફર આલમમાં અને મૃતક યુવાનના પરિવારમાં શોકનું મોજું ફરી વળ્યું છે.