ગાંધીનગર તાલુકા પંચાયતે ગુરુવારે નાણાકીય વર્ષ 2026-27 માટેનું ડ્રાફ્ટ બજેટ રજૂ કર્યું, જેમાં કુલ રૂ. 21.16 કરોડના ખર્ચની જોગવાઇ કરાઈ છે. આ રકમ 2025-26માં મંજૂર થયેલા રૂ. 22.76 કરોડની સરખામણીએ અંદાજે રૂ. 1.60 કરોડ ઓછી છે. આવનારા વર્ષ માટે અંદાજિત આવક રૂ. 53.55 કરોડ દર્શાવાઈ છે, જે ગયા વર્ષના રૂ. 59.23 કરોડ કરતાં ઓછી છે. અધિકારીઓએ સંભવિત આવક મર્યાદાને ધ્યાનમાં રાખીને સાવચેતીપૂર્વક બજેટ તૈયાર કર્યું હોવાનું જણાવ્યું છે. બજેટમાં સૌથી મોટો ફાળો રૂ. 14.36 કરોડ પંચાયત વિકાસ કામો માટે ફાળવાયો છે. તેમાં ગ્રામ્ય રસ્તાઓ, પાણી પુરવઠો, સ્વચ્છતા અને અન્ય આધારભૂત સુવિધાઓના પ્રોજેક્ટનો સમાવેશ થાય છે. સામાજિક કલ્યાણ યોજનાઓ માટે રૂ. 1.72 કરોડ અને કર્મચારી કલ્યાણ નિધિ માટે 15 લાખ ફાળવાયા છે. શિક્ષણ માટે કુલ બજેટમાંથી અંદાજે રૂ. 1.16 કરોડની જોગવાઇ કરવામાં આવી છે. શિક્ષણ ક્ષેત્રે ગયા વર્ષની સરખામણીએ ઘટાડો નોંધાયો છે. 2025-26માં શિક્ષણ માટે રૂ. 1.50 કરોડ ફાળવાયા હતા, જ્યારે 2026-27 માટે રૂ. 1.16 કરોડનો પ્રસ્તાવ છે. સાંસ્કૃતિક પ્રવૃત્તિઓ, રમતગમત અને આર્થિક રીતે નબળા વિદ્યાર્થીઓને પુસ્તકો માટે અગાઉ દરેક હેડ હેઠળ રૂ. 10 લાખ ફાળવાતા હતા, જે હવે ઘટાડીને 1 લાખ કરવામાં આવ્યા છે. મધ્યાહન ભોજન શેડ અને સ્માર્ટ ક્લાસ માટેનું બજેટ પણ રૂ. 1.00 કરોડમાંથી ઘટાડીને 70 લાખ કરવામાં આવ્યું છે.
વિરોધ પક્ષના નેતા વિરેન્દ્રસિંહ વાઘેલાએ જણાવ્યું કે ખેતી માટેનું બજેટ ગયા વર્ષે રુ 1.27 કરોડ હતું, જે હવે 79 લાખ પ્રસ્તાવિત કરાયું છે. તેમના મત મુજબ આ ઘટાડો ખેડૂતોના વિકાસ પર નકારાત્મક અસર કરી શકે છે.