અમદાવાદ, 4 માર્ચ 2026: અમદાવાદ શહેરને ટૂંક સમયમાં તેનો અત્યાર સુધીનો સૌથી મોંઘો જાહેર બગીચો મળવાનો છે. શેલા વિસ્તારમાં ક્લબ O7 રોડ પાસે બનાવાનાર આ ગાર્ડન કમળના આકારમાં તૈયાર કરવામાં આવશે. દરેક પાંખડીમાં ભારતના અલગ-અલગ રાજ્યોના રાજ્યપુષ્પનું પ્રદર્શન કરવામાં આવશે. પ્રોજેક્ટનો અંદાજિત ખર્ચ હવે ₹120 કરોડ સુધી પહોંચી ગયો છે, જે શરૂઆતમાં નક્કી કરાયેલા ₹20 કરોડ કરતાં છ ગણો વધુ છે.
શરૂઆતમાં SG હાઇવે પર, હવે શેલામાં
અમદાવાદ મ્યુનિસિપલ કોર્પોરેશન (AMC)એ 2024-25ના બજેટમાં SG હાઇવે પર ‘લોટસ પાર્ક’ અથવા ‘ગારલેન્ડ ઑફ ઇન્ડિયા’ નામથી ₹20 કરોડ ફાળવ્યા હતા. 6 ફેબ્રુઆરી 2024ના રોજ સ્ટેન્ડિંગ કમિટીએ આ બજેટને મંજૂરી આપી હતી. ત્યારબાદ 2025-26ના બજેટમાં વધુ ₹20 કરોડ ફાળવાયા હતા.
પરંતુ પ્રોજેક્ટનું સ્થળ બદલાઈને શેલા ખાતે ધાતલા તળાવડી નજીક 37,033 ચો.મી. જમીન પર નક્કી થયું છે. હવે પ્રોજેક્ટનું નામ અને ડિઝાઇન બંનેમાં ફેરફાર સાથે કુલ ખર્ચ ₹120 કરોડ સુધી વધ્યો છે.
શું હશે ખાસ?
ગાર્ડનનો મુખ્ય પ્રવેશ ક્લબ O7 રોડ પરથી 30 મીટર પહોળો રહેશે. કુલ જમીનના 40% ભાગ પર એસેમ્બલી પ્રકારની ઇમારત બનાવાશે, જેની મહત્તમ ઊંચાઈ 45 મીટર રહેશે.
અંદર મુલાકાતીઓ માટે નીચેની સુવિધાઓ ઉપલબ્ધ રહેશે:
- ફ્લાવર મ્યુઝિયમ
- સ્પા
- સોવેનિર શોપ
- મલ્ટીમીડિયા થિયેટર
- ખુલ્લી બેઠક વ્યવસ્થા
ગાર્ડનમાં પ્રવેશ માટે એન્ટ્રી ફી વસૂલવામાં આવશે. નજીકના પ્લોટમાં ‘ગ્લો ગાર્ડન’ બનાવવાની યોજના પણ છે, જેથી આ સ્થળ ડબલ આકર્ષણ કેન્દ્ર બની શકે.
ટેન્ડર પ્રક્રિયા પર સવાલો
પ્રોજેક્ટને લઈને પ્રક્રિયા પણ ચર્ચામાં રહી છે. સૂત્રોના જણાવ્યા મુજબ, AMC સામાન્ય રીતે 5 વર્ષ માટે એમ્પેનલ્ડ આર્કિટેક્ટ્સની પેનલ રાખે છે, છતાં આ પ્રોજેક્ટ માટે પેનલ બહારના એક કન્સલ્ટન્ટની નિમણૂક કરવામાં આવી હોવાનો આક્ષેપ છે. સાથે જ, ઉપલબ્ધ એમ્પેનલ્ડ કન્સલ્ટન્ટ્સ કરતાં વધુ ફી પર તેમની પસંદગી કરવામાં આવી હોવાનું પણ કહેવાય છે.
બાંધકામ માટેનો પહેલો ટેન્ડર 14 નવેમ્બર 2025ના રોજ બહાર પાડાયો હતો અને 8 ડિસેમ્બર 2025 અંતિમ તારીખ નક્કી કરવામાં આવી હતી. માત્ર બે કંપનીઓએ રસ દર્શાવ્યો, જેમાંથી એક ટેક્નિકલ રીતે અયોગ્ય ઠરી, જેના કારણે ફરી ટેન્ડર પ્રક્રિયા હાથ ધરાઈ.
બીજો ટેન્ડર 9 ફેબ્રુઆરી 2026ના રોજ બહાર પાડવામાં આવ્યો અને 20 ફેબ્રુઆરી સુધીની 12 દિવસની મર્યાદા રાખવામાં આવી. ₹120 કરોડના મોટા પ્રોજેક્ટ માટે આ સમયગાળો ઓછો હોવાની ચર્ચા છે. પ્રી-બિડ મીટિંગ દરમિયાન સમયવધારાની માંગ કરવામાં આવી હોવા છતાં તે નામંજૂર કરવામાં આવી હતી. પ્રોજેક્ટના રિટર્ન ઑન ઇન્વેસ્ટમેન્ટ (ROI) અંગે પણ સત્તાવાર પુષ્ટિ થયેલી નથી.
આ પ્રોજેક્ટને મંજૂરી આપવા માટેનો પ્રસ્તાવ AMCની આગામી સ્ટેન્ડિંગ કમિટી બેઠકમાં રજૂ થવાની શક્યતા છે.