અમદાવાદના ચાંદખેડા વિસ્તારમાં બાળક ચોરીની એક સનસનાટીભરી ઘટના સામે આવી છે. ધોળા દિવસે ભરચક વિસ્તારમાં એક યુવાને 7 વર્ષના બાળકનું અપહરણ કરવાનો પ્રયાસ કર્યો હતો, પરંતુ આસપાસના લોકોની સતર્કતાને કારણે મોટી હોનારત ટળી હતી. ONGC અને GSC કો-ઓપરેટિવ બેંક પાસે બનેલી આ ઘટનાએ સ્થાનિક રહીશોમાં ફાળ પાડી દીધી છે. લોકોએ શંકાસ્પદ યુવાનને પકડી પાડી તેને મેથીપાક ચખાડ્યો હતો અને ત્યારબાદ પોલીસના હવાલે કર્યો હતો.
બપોરના સમયે માસૂમને નિશાન બનાવ્યોઆ ઘટના ચાંદખેડામાં બપોરે અંદાજે 1 વાગ્યાની આસપાસ બની હતી. 7 વર્ષનો માસૂમ બાળક ઘરની નજીક છાશ લેવા માટે નીકળ્યો હતો. આ સમયે એક અજાણ્યા યુવાને તેની એકલતાનો લાભ ઉઠાવી તેને પોતાની સાથે લઈ જવાનો પ્રયાસ કર્યો હતો. GSC બેંક પાસેની સોસાયટીના માર્ગ પર જ્યારે યુવાન બાળકને શંકાસ્પદ રીતે લઈ જઈ રહ્યો હતો, ત્યારે સ્થાનિક લોકોની નજર તેના પર પડી હતી.
લોકોની સતર્કતા અને ‘મેથીપાક’બાળકને અજાણ્યા શખ્સ સાથે જોઈને આસપાસના લોકોને શંકા ગઈ હતી. જ્યારે લોકોએ પૂછપરછ કરી ત્યારે યુવાન ગભરાઈ ગયો હતો અને સાચા જવાબ આપી શક્યો નહોતો. આ જોઈને લોકોનું ટોળું એકઠું થઈ ગયું હતું અને બાળકને તેના ચુંગાલમાંથી મુક્ત કરાવ્યો હતો. ગુસ્સે ભરાયેલા લોકોએ આરોપી યુવાનને પકડીને બરાબરનો મેથીપાક ચખાડ્યો હતો. આ ઘટનાના વીડિયો પણ સોશિયલ મીડિયા પર વાયરલ થયા છે, જેમાં લોકો આરોપીને મેથીપાક આપી રહ્યા છે.
આરોપીની ઓળખ અને પૂછપરછઝડપાયેલા આરોપીની પ્રાથમિક પૂછપરછ કરતા તેનું નામ શિવમ યાદવ હોવાનું સામે આવ્યું છે. તે મૂળ ઉત્તર પ્રદેશનો રહેવાસી છે અને ભાવનગરમાં મજૂરી કામ કરતો હતો. આરોપીએ જણાવ્યું હતું કે તે ભાવનગરથી ટ્રેન મારફતે અમદાવાદ આવ્યો હતો. જોકે, તે અમદાવાદ શા માટે આવ્યો હતો અને બાળકને કયા ઈરાદે લઈ જતો હતો, તે દિશામાં હજુ તપાસ ચાલી રહી છે.
પોલીસ કાર્યવાહી અને તકેદારીઘટનાની જાણ થતા જ ચાંદખેડા પોલીસનો કાફલો સ્થળ પર પહોંચી ગયો હતો. પોલીસે આરોપી શિવમ યાદવની અટકાયત કરી તેને પોલીસ સ્ટેશન લઈ ગઈ છે. હાલમાં તેની વિરુદ્ધ અપહરણના પ્રયાસ અને અન્ય કાયદેસરની કલમો હેઠળ ફરિયાદ નોંધવાની તજવીજ હાથ ધરવામાં આવી છે. આ ઘટનાએ ફરી એકવાર વાલીઓ માટે લાલબત્તી સમાન કિસ્સો પૂરો પાડ્યો છે કે પોતાના બાળકોને એકલા બહાર મોકલતી વખતે સાવચેતી રાખવી અનિવાર્ય છે.