દેશમાં ફરી એકવાર હવામાનનો મિજાજ બગડવાનો છે. હવામાન વિભાગ (IMD) એ 4 મે, 2026 ના રોજ દિલ્હી અને ઉત્તર પ્રદેશ સહિત દેશના 19 રાજ્યોમાં ભારે વરસાદ અને વાવાઝોડાની ગંભીર ચેતવણી (એલર્ટ) જારી કરી છે. આ દરમિયાન ઘણા વિસ્તારોમાં 70 થી 80 કિલોમીટર પ્રતિ કલાકની પ્રચંડ ઝડપે પવન ફૂંકાઈ શકે છે. પૂર્વ ભારતમાં વીજળી પડવાની પણ શક્યતા છે.
નદી-ડેમ નજીક રહેતા ખેડૂતો, માછીમારો અને ખાસ કરીને પહાડી વિસ્તારોમાં પ્રવાસનું આયોજન કરી રહેલા લોકોને ઘરેથી નીકળતા પહેલા હવામાનની માહિતી મેળવી લેવાની સલાહ આપવામાં આવે છે, જેથી મુશ્કેલીમાં ન મુકાવું પડે.
હવામાન કેમ પલટાયું? કયા રાજ્યો પર છે ખતરો?
હરિયાણા અને તેની આસપાસના વિસ્તારોમાં વાતાવરણના નીચલા સ્તરમાં એક સાયક્લોનિક સર્ક્યુલેશન (ચક્રવાતી પરિભ્રમણ) સર્જાયું છે, જેના કારણે હવામાન ખરાબ થવાની શક્યતા વધી છે.
આ 19 રાજ્યો માટે છે એલર્ટ: ઉત્તર પ્રદેશ, દિલ્હી, બિહાર, ઝારખંડ, હરિયાણા, રાજસ્થાન, પંજાબ, ઉત્તરાખંડ, હિમાચલ પ્રદેશ, જમ્મુ-કાશ્મીર, મધ્ય પ્રદેશ, છત્તીસગઢ, પશ્ચિમ બંગાળ, ઓડિશા, આસામ, મેઘાલય, તમિલનાડુ, કર્ણાટક અને આંધ્ર પ્રદેશ.
રાજ્યવાર અને જિલ્લાવાર આવતીકાલનું (4 મે) હવામાન:
દિલ્હી (ભારે વરસાદ અને વાવાઝોડું): દિલ્હીમાં ભારે વરસાદ અને વાવાઝોડાની પ્રબળ શક્યતા છે. 30 થી 40 km/h ની ઝડપે પવન ફૂંકાઈ શકે છે. મહત્તમ તાપમાન 32°C અને લઘુત્તમ 22°C રહેવાની ધારણા છે.
ઉત્તર પ્રદેશ (તોફાનની ચેતવણી): સહારનપુર, મેરઠ, અલીગઢ, વારાણસી, પ્રયાગરાજ, લખનૌ સહિતના 20 થી વધુ જિલ્લાઓમાં 50 થી 60 km/h ની ઝડપે પવન ફૂંકાશે. લખનૌનું તાપમાન 29°C (મહત્તમ) અને 23°C (લઘુત્તમ) રહેશે.
બિહાર (ભારે વરસાદ): પટના, ગયા, મુઝફ્ફરપુર, પૂર્ણિયા સહિતના ઘણા જિલ્લાઓમાં ભારે વરસાદની ચેતવણી છે. પટનામાં મહત્તમ તાપમાન 32°C અને લઘુત્તમ 24°C રહેશે.
ઝારખંડ (મધ્યમથી ભારે વરસાદ): રાંચી, ધનબાદ, બોકારો સહિતના વિસ્તારોમાં 50-60 km/h ની ઝડપે વાવાઝોડાની શક્યતા. રાંચીનું તાપમાન 31°C (મહત્તમ) અને 21°C (લઘુત્તમ) રહેશે.
ઉત્તરાખંડ (વાવાઝોડાની શક્યતા): નૈનિતાલ, અલ્મોડા, રુદ્રપ્રયાગ સહિતના પહાડી જિલ્લાઓમાં 60 થી 70 km/h ની ઝડપે પવન અને વરસાદ ખાબકી શકે છે. દહેરાદૂનનું તાપમાન 26°C / 18°C રહેશે.
હિમાચલ પ્રદેશ (ભારે વરસાદ અને તોફાન): શિમલા, કુલ્લુ, મંડી સહિતના વિસ્તારોમાં 40-50 km/h ની ઝડપે પવન ફૂંકાશે. મનાલીમાં કડકડતી ઠંડી પડશે (મહત્તમ 5°C, લઘુત્તમ -1°C).
પંજાબ (ભારે વરસાદ અને પવન): અમૃતસર, પટિયાલા, મોહાલી સહિતના વિસ્તારોમાં 70 થી 80 km/h ની ઝડપે પવન ફૂંકાશે. ખેડૂતોને ખુલ્લામાં ન જવાની સલાહ છે.
રાજસ્થાન (વરસાદ અને તોફાન): જયપુર, જોધપુર, કોટા, અજમેર સહિતના વિસ્તારોમાં 60-70 km/h ની ઝડપે વાવાઝોડાની ચેતવણી. જયપુરનું તાપમાન 34°C / 22°C રહેશે.
મધ્ય પ્રદેશ (ભારે વરસાદનું એલર્ટ): ભોપાલ, જબલપુર, રેવા સહિતના વિસ્તારોમાં તોફાનની ચેતવણી. ભોપાલમાં મહત્તમ તાપમાન 37°C અને લઘુત્તમ 23°C રહેવાની ધારણા છે.