તાજેતરમાં પુડુચેરીના કરાઈકલ જિલ્લામાંથી એક એવી ઘટના સામે આવી છે જેણે સમગ્ર દેશનું ધ્યાન ખેંચ્યું છે. અહીંના સબ-કલેક્ટર અને સબ-ડિવિઝનલ મેજિસ્ટ્રેટ, IAS અધિકારી એમ. પૂજાએ વૃદ્ધ પિતાને તરછોડનારા ત્રણ પુત્રોને જેલની સજા ફટકારીને કાયદાનું કડક પાલન કરાવ્યું છે. આ નિર્ણય દ્વારા તેમણે સમાજને એક મજબૂત સંદેશ આપ્યો છે કે માતાપિતાની જવાબદારીમાંથી કોઈ બચી શકે નહીં.કરાઈકલના કોટુચેરી વિસ્તારમાં રહેતા 84 વર્ષીય મુનુસામી નામના વૃદ્ધ વ્યક્તિએ પોતાની વેદના સબ-કલેક્ટર એમ. પૂજા સમક્ષ રજૂ કરી હતી. મુનુસામીની ફરિયાદ મુજબ, તેમના ત્રણેય પુત્રો છેલ્લા 71 મહિના (આશરે 6 વર્ષ) થી તેમને કોઈ પણ પ્રકારની આર્થિક સહાય આપતા ન હતા અને તેમની અવગણના કરતા હતા. વૃદ્ધાવસ્થામાં પોતાની મૂળભૂત જરૂરિયાતો પૂરી કરવા માટે પણ તેઓ લાચાર હતા. આ ફરિયાદને ગંભીરતાથી લઈને IAS પૂજાએ વરિષ્ઠ નાગરિક અધિનિયમ, 2007 હેઠળ તપાસ કરી અને દોષિત પુત્રોને તત્કાલ જેલની સજાનો આદેશ આપ્યોમેજિસ્ટ્રેટ પૂજાએ સ્પષ્ટ કર્યું છે કે જ્યાં સુધી પુત્રો તેમના પિતાના ભરણપોષણ માટેની તમામ બાકી રકમ ચૂકવશે નહીં, ત્યાં સુધી તેમને જેલમાંથી મુક્તિ મળશે નહીં. આ નિર્ણય દ્વારા તેમણે ‘માતાપિતા અને વરિષ્ઠ નાગરિકોના ભરણપોષણ અને કલ્યાણ અધિનિયમ’ની તાકાતનું પ્રદર્શન કર્યું છે. આ કાયદો 60 વર્ષથી વધુ ઉંમરના કોઈપણ નાગરિકને તેમના બાળકો કે કાનૂની વારસદારો પાસેથી આર્થિક સહાય મેળવવાનો કાયદેસરનો અધિકાર આપે છે.
કોણ છે IAS એમ. પૂજા?
AGMUT કેડરના 2023 બેચના IAS અધિકારી એમ. પૂજા મૂળ કર્ણાટકના વતની છે. ઇલેક્ટ્રોનિક્સ અને ટેલિકોમ્યુનિકેશન એન્જિનિયરિંગનો અભ્યાસ પૂર્ણ કર્યા બાદ, તેઓ જુલાઈ 2025 માં કરાઈકલના સબ-કલેક્ટર તરીકે જોડાયા હતા. માત્ર થોડા સમયના કાર્યકાળમાં જ, પોતાની કડક વહીવટી શૈલી અને સંવેદનશીલતા માટે તેઓ ચર્ચામાં આવ્યા છે. આ નિર્ણયે માત્ર કરાઈકલ જિલ્લામાં જ નહીં પરંતુ સમગ્ર દેશમાં એવા બાળકો માટે એક ચેતવણી સમાન કામ કર્યું છે જેઓ પોતાના વૃદ્ધ માતાપિતાને બોજ સમજે છે. IAS પૂજાની આ પહેલથી વૃદ્ધોને ન્યાય મળવાની આશા બંધાઈ છે અને સાબિત કર્યું છે કે કાયદો દરેકના ગૌરવપૂર્ણ જીવન માટે પ્રતિબદ્ધ છે.