ઈરાને હોર્મુઝ સ્ટ્રેટ સંપૂર્ણપણે બંધ કર્યું: કોઈ પણ જહાજ પસાર થઈ શકશે નહીં, અમેરિકાને આપી કડક ચેતવણી

પશ્ચિમ એશિયામાં વધી રહેલા ભારે તણાવ વચ્ચે ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC) એ એક અત્યંત મોટો અને સખત નિર્ણય લીધો છે. ઈરાને વ્યૂહાત્મક રીતે અત્યંત મહત્વપૂર્ણ ગણાતા હોર્મુઝ સ્ટ્રેટ (Strait of Hormuz) જળમાર્ગને આગામી આદેશ સુધી તમામ પ્રકારના જહાજો માટે સંપૂર્ણપણે બંધ કરી દીધો છે. ઈરાને સ્પષ્ટ કર્યું છે કે જ્યાં સુધી અમેરિકા પશ્ચિમ એશિયા ક્ષેત્રમાં તેની દખલગીરી બંધ નહીં કરે, ત્યાં સુધી આ આંતરરાષ્ટ્રીય જળમાર્ગ બંધ જ રહેશે.ઈરાની મીડિયા ‘પ્રેસ ટીવી’ દ્વારા જાહેર કરાયેલા IRGCના સત્તાવાર નિવેદન અનુસાર, આ નિર્ણય વિદેશી દળોની ગેરકાયદેસર દખલગીરીને કારણે ઉભી થયેલી સુરક્ષા સ્થિતિને ધ્યાનમાં રાખીને લેવામાં આવ્યો છે. નિવેદનમાં જણાવાયું છે કે, “હોર્મુઝ સ્ટ્રેટને આગામી આદેશ સુધી બંધ કરવામાં આવે છે. હવે કોઈ પણ જહાજને આ સ્ટ્રેટમાંથી પસાર થવાની મંજૂરી આપવામાં આવશે નહીં.” ઈરાનના આ આકરા પગલાને કારણે વૈશ્વિક તેલ સપ્લાય અને દરિયાઈ વ્યાપાર પર બહુ મોટી અસર પડવાની આશંકા સેવાઈ રહી છે.

અમેરિકા અને ઈઝરાયેલને ગંભીર પરિણામોની ચેતવણી

IRGCની નૌસેનાએ અમેરિકાને ખુલ્લી ચેતવણી આપતા કહ્યું છે કે જો આ ઘટનાક્રમનો બહાના તરીકે ઉપયોગ કરીને ઈરાન વિરુદ્ધ કોઈ પણ સૈન્ય કાર્યવાહી કરવામાં આવશે, તો તેનો ખૂબ જ આકરો અને જડબાતોડ જવાબ આપવામાં આવશે. ઈરાને ધમકી આપી છે કે તેઓ આ ક્ષેત્રમાં આવેલા અમેરિકાના સૈન્ય મથકોને નિશાન બનાવશે. આ સ્થિતિથી ઉભા થનારા કોઈ પણ ગંભીર પરિણામોની સંપૂર્ણ જવાબદારી અમેરિકા, ઈઝરાયેલ અને ઈરાન વિરુદ્ધ ઓપરેશન માટે પોતાના મિલિટરી બેઝનો ઉપયોગ કરવા દેનારા દેશોની રહેશે.

તણાવ ઘટાડવાના પ્રયાસો વચ્ચે મોટો ઝટકો

આ ચોંકાવનારી ઘટના એવા સમયે સામે આવી છે જ્યારે બંને દેશો વચ્ચે તણાવ ઓછો કરવા માટે રાજદ્વારી સ્તરે વાતચીત ચાલી રહી હતી. આ જાહેરાતના થોડા સમય પહેલા જ ઈરાનના વિદેશ મંત્રી સૈયદ અબ્બાસ અરાગચીએ મસ્કાટમાં ઓમાનના વિદેશ મંત્રી સૈયદ બદ્ર અલ-બુસૈદી સાથે પ્રાદેશિક ઘટનાક્રમ અને હોર્મુઝ સ્ટ્રેટમાં દરિયાઈ સુરક્ષા અંગે સકારાત્મક ચર્ચા કરી હતી. જોકે, ઈરાનના આ આક્રમક વલણથી હવે ખાડી દેશો સહિત સમગ્ર વિશ્વમાં યુદ્ધનો ખતરો વધુ ઘેરો બન્યો છે.