વિક્કી જોષી, ભરૂચભરૂચ જિલ્લાના પાનોલી પોલીસ સ્ટેશનમાં ફરજ બજાવતા ત્રણ પોલીસકર્મીઓ દ્વારા લાંચ માંગવાનો કિસ્સો સામે આવતા ભારે ચકચાર મચી ગઈ છે. એન્ટી કરપ્શન બ્યુરોએ છટકું ગોઠવીને 1 લાખ રૂપિયાની લાંચ લેતા બે હેડ કૉન્સ્ટેબલ અને એક LRD જવાનને રંગેહાથ ઝડપી પાડ્યા છે. આ કિસ્સાની સૌથી ચોંકાવનારી બાબત એ છે કે પોલીસકર્મીઓએ લાંચની રકમ ચૂકવવા માટે બુટલેગરને ‘EMI’ની સુવિધા પણ આપી હતી.શું છે સમગ્ર મામલો?પ્રાપ્ત માહિતી અનુસાર, એક બુટલેગર જેલમાંથી મુક્ત થયો હતો. પોલીસ સ્ટેશનના ડી-સ્ટાફમાં ફરજ બજાવતા પોલીસકર્મીઓએ કબજે કરેલો મોબાઈલ પરત આપવાના બદલામાં બુટલેગર પાસે કુલ 3 લાખ રૂપિયાની લાંચની માંગણી કરી હતી.
લાંચ માટે ‘EMI’ની વિચિત્ર ઓફરપોલીસકર્મીઓની લાલચ એટલી હદે વધી ગઈ હતી કે તેમણે 3 લાખ રૂપિયાની મોટી રકમ એકસાથે ચૂકવવામાં મુશ્કેલી અનુભવતા બુટલેગરને આ રકમ હપ્તામાં ચૂકવવાની સુવિધા આપી હતી. નક્કી થયા મુજબ, 1-1 લાખના ત્રણ હપ્તામાં લાંચની રકમ ચૂકવવાની હતી. આ પૈકી પ્રથમ હપ્તો એટલે કે 1 લાખ રૂપિયા લેવા માટે પોલીસકર્મીઓએ બુટલેગરને પોલીસ સ્ટેશન બોલાવ્યો હતો.
ACBનું સફળ ઓપરેશનબુટલેગરે આ અંગે એન્ટી કરપ્શન બ્યુરોમાં ફરિયાદ નોંધાવી હતી. ફરિયાદના આધારે ACBની ટીમે પાનોલી પોલીસ સ્ટેશનમાં છટકું ગોઠવ્યું હતું. જેવું બુટલેગર દ્વારા 1 લાખ રૂપિયાનું પેકેટ ડી-સ્ટાફની ચેમ્બરમાં પોલીસકર્મીઓને આપવામાં આવ્યું, તે જ સમયે ACBની ટીમે ત્રાટકીને ત્રણેય કર્મચારીઓને રંગેહાથ ઝડપી લીધા હતા.
આ ઘટનાથી સમગ્ર ભરૂચ પોલીસ બેડામાં ખળભળાટ મચી ગયો છે. હાલ ACB દ્વારા ત્રણેય આરોપી પોલીસકર્મીઓની અટકાયત કરી આગળની કાયદેસરની કાર્યવાહી હાથ ધરવામાં આવી છે.