અમદાવાદ શહેરમાં ધોધમાર વરસાદ અને ઠેર-ઠેર ભરાયેલા પાણી વચ્ચે નાગરિકોને અનેક પ્રકારની મુશ્કેલીઓનો સામનો કરવો પડ્યો હતો. આ વિકટ પરિસ્થિતિમાં પણ શહેરની ટ્રાફિક પોલીસે પોતાની ફરજથી ઉપર ઉઠીને એક ખૂબ જ પ્રશંસનીય અને માનવીય અભિગમ દાખવ્યો છે. ભારે પાણી ભરાવાના કારણે રસ્તા પરથી પસાર થતી ગાડીઓની નંબર પ્લેટ તૂટીને પાણીમાં પડી ગઈ હતી અને ખોવાઈ ગઈ હતી.
પશ્ચિમ ટ્રાફિક પોલીસ દ્વારા અલગ-અલગ વિસ્તારોમાંથી આવી લાવારિસ અને ખોવાયેલી નંબર પ્લેટ શોધીને એકત્રિત કરવામાં આવી હતી.
પશ્ચિમ ટ્રાફિક પોલીસે પરત કરી નંબર પ્લેટપોલીસ માત્ર કાયદો અને વ્યવસ્થા જાળવવાનું જ કામ નથી કરતી, પરંતુ જરૂર પડે ત્યારે જનતાની પડખે પણ ઊભી રહે છે તેનું ઉત્તમ ઉદાહરણ પશ્ચિમ ટ્રાફિક પોલીસે પૂરું પાડ્યું છે. શહેરમાંથી મળી આવેલી વિવિધ વાહનોની નંબર પ્લેટને સુરક્ષિત રીતે સાચવીને તેમના સાચા માલિકો સુધી પહોંચાડવાની વિશેષ ઝુંબેશ હાથ ધરવામાં આવી હતી. પશ્ચિમ ટ્રાફિક પોલીસે કુશળતા પૂર્વક કામગીરી કરીને અંદાજે 90 થી વધુ નંબર પ્લેટ વાહન ચાલકોને હેમખેમ પરત કરી દીધી હતી. પોલીસની આ સરાહનીય પહેલથી વાહનચાલકોની મોટી ચિંતા દૂર થઈ ગઈ હતી.
વાહનચાલકોએ પોલીસનો માન્યો હૃદયપૂર્વક આભારઅચાનક ગાડીની નંબર પ્લેટ ખોવાઈ જવાથી વાહનચાલકો સરકારી દફતર અને આરટીઓ કચેરીના ધક્કા ખાવાની ચિંતામાં મૂકાયા હતા. પરંતુ ટ્રાફિક પોલીસની આ અણધારી અને સમયસૂચક મદદથી નાગરિકોને મોટી રાહત અનુભવવા મળી હતી. પોતાની ખોવાયેલી નંબર પ્લેટ સહેલાઈથી અને સુરક્ષિત રીતે પાછી મળતા વાહનચાલકોમાં ખુશીની લહેર છવાઈ ગઈ હતી. નાગરિકોએ મુશ્કેલ સમયમાં સાથ આપવા બદલ અમદાવાદ પશ્ચિમ ટ્રાફિક પોલીસનો હૃદયપૂર્વક આભાર વ્યક્ત કર્યો હતો અને પોલીસની આ ઉમદા કામગીરીના મુક્તકંઠે વખાણ કર્યા હતા.