ગુજરાતમાં ફરી એકવાર પેપર ફૂટ્યાની ચર્ચાએ જોર પકડ્યું છે. ગુજરાત આયુર્વેદ યુનિવર્સિટીમાં ત્રીજા વર્ષની સર્જરી (Surgical System-1) ની પરીક્ષાનું પેપર વોટ્સએપ પર લીક થયું હોવાના ચોંકાવનારા અહેવાલો સામે આવ્યા છે. પરીક્ષા શરૂ થાય તે પહેલાં જ સોશિયલ મીડિયા પર ‘મહત્વપૂર્ણ પ્રશ્નો’ ના નામે એક મેસેજ વાયરલ થયો હતો, જેમાં આશ્ચર્યજનક રીતે પરીક્ષામાં પૂછાયેલા 12 માંથી 11 પ્રશ્નો હૂબહૂ મળી આવ્યા હતા.આ ઘટનાને પગલે કોલેજ પ્રશાસન અને યુનિવર્સિટી તાત્કાલિક હરકતમાં આવી છે. ઇન્ચાર્જ પરીક્ષા નિયામક એચ.પી. ઝાલાએ સ્પષ્ટ કર્યું છે કે આ સમગ્ર મામલાની નિષ્પક્ષ તપાસ માટે એક ખાસ સમિતિની રચના કરવામાં આવી છે, અને જો પેપર લીકના નક્કર પુરાવા મળશે તો કડકમાં કડક કાનૂની કાર્યવાહી કરવામાં આવશે.
શું છે સમગ્ર મામલો?
અહેવાલો અનુસાર, આયુર્વેદ યુનિવર્સિટીની ‘સર્જિકલ સિસ્ટમ-1’ પરીક્ષાનું પ્રશ્નપત્ર પરીક્ષા શરૂ થાય તે પહેલા જ કથિત રીતે લીક થઈ ગયું હતું. વોટ્સએપ પર ફરતા થયેલા કેટલાક ‘મહત્વપૂર્ણ વિષયો’ ના મેસેજ અને અસલી પ્રશ્નપત્ર વચ્ચે એક મોટી અને આશ્ચર્યજનક સમાનતા જોવા મળી હતી. વિદ્યાર્થીઓ અને પ્રોફેસરો ત્યારે ચોંકી ગયા જ્યારે ખબર પડી કે ફાઇનલ પ્રશ્નપત્રમાં પૂછાયેલા 12 માંથી 11 પ્રશ્નો એ જ હતા જે વાયરલ મેસેજમાં ફરતા હતા!આ અંગે વાત કરતા જૂનાગઢ આયુર્વેદિક કોલેજના પ્રોફેસર અને યુનિવર્સિટી સ્ક્વોડના સભ્ય ડૉ. અલ્પેશ જરસાણિયાએ જણાવ્યું હતું કે, “ગઈ 20 જુલાઈના રોજ યુનિવર્સિટી દ્વારા મને સ્ક્વોડમાં ડ્યૂટી સોંપવામાં આવી હતી. બપોરના સમયે જ્યારે હું કોલેજમાં નિરીક્ષણ માટે રાઉન્ડ પર હતો, ત્યારે એક ફેકલ્ટી સભ્યએ મારું ધ્યાન દોર્યું કે વોટ્સએપ પર પરીક્ષાના કેટલાક પ્રશ્નો પહેલેથી જ વાયરલ થઈ રહ્યા છે. મેં તરત જ એ પ્રશ્નોની ચકાસણી કરી અને સમય ન બગાડતા તાત્કાલિક અમારી યુનિવર્સિટીના પરીક્ષા નિયંત્રક (કંટ્રોલર) ને આ બાબતની જાણ કરી દીધી.”
શું ખરેખર 12 માંથી 11 પ્રશ્નો મેચ થતા હતા?
વાયરલ પ્રશ્નો અંગે વધુ સ્પષ્ટતા કરતા ડૉ. જરસાણિયાએ ઉમેર્યું કે, “આ બાબતની અમારા સ્તરે પણ ચકાસણી થવી જરૂરી છે. જોકે, પ્રથમ નજરે જોતાં એવું સ્પષ્ટ લાગે છે કે ફાઇનલ પેપરના 12 માંથી 11 પ્રશ્નો વાયરલ થયેલા પ્રશ્નો સાથે હૂબહૂ મળતા આવે છે. પરંતુ, આ અંગેની વધુ વિગતવાર અને ટેકનિકલ માહિતી વિષયના નિષ્ણાતો અને યુનિવર્સિટી દ્વારા જ પૂરી પાડવામાં આવશે.”
ટેકનોલોજીથી રોકાશે પેપર લીક! PM મોદીએ આઈટી નિષ્ણાંત નંદન નીલેકણીને સોંપી મોટી જવાબદારી
તથ્યો મળશે તો કડક કાર્યવાહી થશે: એચ.પી. ઝાલા
આ સમગ્ર વિવાદ અંગે ગુજરાત આયુર્વેદ યુનિવર્સિટીના ઇન્ચાર્જ પરીક્ષા નિયામક એચ.પી. ઝાલાને પૂછવામાં આવતા તેમણે જણાવ્યું કે, “રાજ્યની 26 કોલેજોમાં અંદાજે 1200 ઉમેદવારોએ સર્જિકલ સિસ્ટમની આ પરીક્ષા આપી હતી. હાલ આખો મામલો તપાસ હેઠળ છે. પરીક્ષા પૂર્ણ થયા બાદ જ આ વાત અમારા ધ્યાનમાં આવી હતી. જો તપાસ દરમિયાન અમને પેપર લીક થયાના નક્કર પુરાવા કે તથ્યો મળશે, તો અમે ચોક્કસથી આગળની કડક કાર્યવાહી કરીશું.”
નિષ્પક્ષ તપાસ માટે સ્પેશિયલ કમિટીની રચના
એચ.પી. ઝાલાએ સમગ્ર ઘટનાક્રમ જણાવતા કહ્યું કે, 20 જુલાઈની સવારે ‘સર્જિકલ સિસ્ટમ-1’ ની પરીક્ષા તેના નિર્ધારિત સમયે શાંતિપૂર્ણ રીતે પૂર્ણ થઈ હતી. પરંતુ, તે જ દિવસે સાંજે તેમને પોતાના મોબાઇલ પર માહિતી મળી કે પરીક્ષા પહેલાં જ વોટ્સએપ પર કેટલાક મહત્વપૂર્ણ પ્રશ્નો ફરતા થઈ ગયા હતા. આ ગંભીર માહિતી મળતાં જ યુનિવર્સિટીનું વહીવટીતંત્ર દોડતું થઈ ગયું હતું. કુલપતિ સાથે તાત્કાલિક ચર્ચા કર્યા બાદ, સમગ્ર મામલાની ઊંડાણપૂર્વક અને નિષ્પક્ષ તપાસ કરવા માટે એક ‘વિશેષ તપાસ સમિતિ’ બનાવવાનો મોટો નિર્ણય લેવામાં આવ્યો છે. હવે આ કમિટી વાયરલ થયેલા મેસેજ, પ્રશ્નપત્ર અને અન્ય તમામ હકીકતોની ઝીણવટભરી તપાસ કરીને પોતાનો ફાઇનલ રિપોર્ટ રજૂ કરશે.