🔥 સમિટ પહેલાં પાટનગરનાં 26 સર્કલનો થશે કાયાપલટ: લાંબા સમયથી પડતર દરખાસ્તને મંજૂરી, નવી સંસ્થાઓને સોંપાશે જવાબદારી

લાંબા સમયથી પડતર દરખાસ્તને પાટનગર યોજના વિભાગની મંજૂરી: સમિટ પહેલાં શહેરનાં 26 સર્કલ ‘વાઇબ્રન્ટ’ થશે : નવી સંસ્થાઓને જવાબદારી સોંપાશેગાંધીનગરની ઓળખ સમાન સર્કલ હવે વાઇબ્રન્ટ સમિટ પહેલાં નવા રંગરૂપમાં જોવા મળશે. મુખ્ય માર્ગો પર આવેલા 26 જેટલાં સર્કલની સુંદરતા વધારવા અને જાળવણી માટેની લાંબા સમયથી પડતર દરખાસ્તને આખરે મંજૂરી મળી છે.પાયોવિ દ્વારા અગાઉ વિવિધ સરકારી અને ખાનગી સંસ્થાઓને સોંપાયેલાં સર્કલોની મુદત પૂર્ણ થયા બાદ જાળવણીનો પ્રશ્ન ઊભો થયો હતો. હવે માર્ગ અને મકાન વિભાગની મંજૂરી બાદ 5 વર્ષ માટે સર્કલોની જાળવણી અને સુશોભનની જવાબદારી ફરી નવી સંસ્થાઓને સોંપવાની પ્રક્રિયા શરૂ કરાઈ છે.ગાંધીનગરમાં શહેરના માર્ગોની વચ્ચે આવેલા સર્કલો માત્ર ટ્રાફિક વ્યવસ્થાનો ભાગ નહીં પરંતુ પાટનગરની આગવી ઓળખ પણ છે. અગાઉ વિવિધ સંસ્થાઓને થીમ આધારિત નામાભિધાન, સુશોભન અને જાળવણી માટે સર્કલો આપવામાં આવ્યા હતા.જોકે, સમયગાળો પૂર્ણ થતાં કેટલીક સંસ્થાઓએ સર્કલોની જવાબદારી પરત કરી દીધી હતી. પરિણામે અનેક સર્કલોની નિયમિત જાળવણી અને સુશોભનનો મુદ્દો લાંબા સમયથી પેન્ડિંગ હતો.

આગામી સમયમાં યોજાનારી વૈશ્વિક કક્ષાની વાઇબ્રન્ટ ગુજરાત ગ્લોબલ સમિટને ધ્યાનમાં રાખીને પાટનગર યોજના વિભાગે સર્કલોને ફરી સજાવવા માટે કાર્યવાહી હાથ ધરી હતી. જે સંસ્થાઓની અગાઉની જવાબદારીની મુદત પૂર્ણ થઈ ગઈ હતી તેમને ફરી જવાબદારી સોંપવા તેમજ કેટલાક સર્કલો માટે નવી સંસ્થાઓ નક્કી કરવા દરખાસ્ત તૈયાર કરવામાં આવી હતી.

આ દરખાસ્તને માર્ગ અને મકાન વિભાગે 5 વર્ષ માટે મંજૂરી આપતાં હવે કામગીરીનો માર્ગ ખુલ્યો છે. મંજૂરી બાદ પાટનગર યોજના વિભાગે સંબંધિત સંસ્થાઓને જાણ કરી દીધી છે. હવે સર્કલો પર જરૂરી મરામત, બ્યુટિફિકેશન અને જાળવણીની કામગીરી હાથ ધરાશે.

વાઇબ્રન્ટ સમિટ પહેલાં કામગીરી પૂર્ણ કરવાની દિશામાં તંત્ર આગળ વધી રહ્યું છે. આગામી દિવસોમાં મુખ્ય 26 સર્કલો પર વધુ હરિયાળી, આકર્ષક સુશોભન, આધુનિક લાઇટિંગ અને થીમ આધારિત ડિઝાઇન જોવા મળે તેવી શક્યતા છે.મનપાએ 2, કોસ્ટગાર્ડે 1 સર્કલ વિકસાવ્યું

શહેરમાં મેટ્રો રૂટમાં ખંડિત થયેલા સર્કલો પૈકી વિવિધ સર્કલોના ડેવલપમેન્ટનું કામ શરૂઆતી તબક્કામાં જ હાથ ધરી દેવાયું હતું. જેમાં મહાનગરપાલિકા દ્વારા ચ-2 ન્યાય સર્કલ અને ચ-3 સુશાસન સર્કલ તરીકે વિકસાવવામાં આવ્યું છે. જ્યારે સચિવાલય પાસે સેક્ટર-19ના કોર્નર પરનું છ-4 સર્કલ કોસ્ટગાર્ડ દ્વારા સુરક્ષા થીમ પર વિકસાવવામાં આવ્યું છે. હવે અન્ય સંસ્થાઓ દ્વારા પણ વિવિધ સર્કલોના રીડેવલપમેન્ટની કામગીરી કરવામાં આવશે.