દિલ્હી
હિન્દુસ્તાન એરોનોટિક્સ લિમિટેડ (HAL) ૧૮ સપ્ટેમ્બર ૨૦૨૬ના રોજ કર્ણાટકના બેંગલુરુ ખાતે રક્ષા મંત્રી શ્રી રાજનાથ સિંહ અને નાગરિક ઉડ્ડયન મંત્રી શ્રી કે. રામમોહન નાયડુની ઉપસ્થિતિમાં ભારતીય વાયુસેના (IAF) ને ‘લાઇટ કોમ્બેટ એરક્રાફ્ટ’ (LCA) તેજસ ‘ફાઇનલ ઓપરેશનલ ક્લિયરન્સ’ (FOC) ટ્વિન-સીટર ટ્રેનર્સ અને HTT-40 બેઝિક ટ્રેનર એરક્રાફ્ટ તથા પવન હંસ લિમિટેડ (PHL) ને ધ્રુવ ‘નેક્સ્ટ જનરેશન’ (NG) હેલિકોપ્ટર સોંપશે. આ સોંપણી દેશની આત્મનિર્ભરતાની યાત્રામાં એક મહત્વપૂર્ણ સીમાચિહ્નરૂપ છે, કારણ કે આ કાર્યક્રમ સ્થાનિક એરોસ્પેસ ઇકોસિસ્ટમને મજબૂત બનાવવામાં HAL અને તેના ઉદ્યોગ ભાગીદારો દ્વારા ભજવવામાં આવતી ભૂમિકાને ઉજાગર કરશે. તે નાગરિક અને લશ્કરી એમ બંને ઉપયોગો માટે અદ્યતન પ્લેટફોર્મની ડિઝાઇન, વિકાસ અને ઉત્પાદન કરવાની ઉદ્યોગની વિસ્તરતી ક્ષમતાનું પણ પ્રદર્શન કરશે.આ પ્રસંગે ચીફ ઓફ ધ એર સ્ટાફ એર ચીફ માર્શલ એ.પી. સિંહ; સચિવ (રક્ષા ઉત્પાદન) શ્રી સંજીવ કુમાર; સચિવ, નાગરિક ઉડ્ડયન મંત્રાલય શ્રી સમીર કુમાર સિંહા; HALના સીએમડી (CMD) શ્રી રવિ કે. તથા રક્ષા મંત્રાલય, નાગરિક ઉડ્ડયન મંત્રાલય, IAF, PHL, નિયમનકારી એજન્સીઓ અને એરોસ્પેસ તથા સંરક્ષણ ક્ષેત્રના હિતધારકોના અન્ય વરિષ્ઠ અધિકારીઓ ઉપસ્થિત રહેશે.
સરકારે એરોસ્પેસ અને સંરક્ષણ ક્ષેત્રોમાં સ્વદેશી ડિઝાઇન, વિકાસ અને ઉત્પાદનને પ્રોત્સાહન આપવાને ઉચ્ચ અગ્રતા આપી છે. આ પ્લેટફોર્મ્સનો સમાવેશ એ સ્વદેશી ક્ષમતાઓને મજબૂત કરવા અને વિદેશી સ્ત્રોતો પરની નિર્ભરતા ઘટાડવાની દિશામાં લેવાયેલું વધુ એક પગલું છે.