સુરેન્દ્રનગર શહેરમાં સભ્ય સમાજને હચમચાવી નાખતી એક અત્યંત શરમજનક ઘટના સામે આવી છે. દુધરેજ રોડ અને 80 ફૂટ રોડ (Surendranagar Gym Scandal) પર ધમધમતા ‘ક્લબ 71’ નામના જીમમાં આવતી મહિલાઓ અને યુવતીઓના ગુપ્ત વીડિયો અને ફોટા બનાવીને તેમને બ્લેકમેલ કરવામાં આવતી હોવાનું એક મોટું કૌભાંડ પ્રકાશમાં આવ્યું છે.આઘાતજનક બાબત એ છે કે આ સમગ્ર કાવતરું ખુદ જીમના સંચાલક દ્વારા જ રચવામાં આવ્યું હતું.
ગુનાખોરીનું મોડેલ અને બ્લેકમેલિંગનો ખેલ
પોલીસ સૂત્રોના જણાવ્યા અનુસાર, આમીન મુલતાની નામના યુવાન દ્વારા સંચાલિત આ જીમમાં અંદાજે ૩૫૦થી વધુ સભ્યો કસરત માટે આવતા હતા, જેમાં અનેક સુખી-સંપન્ન પરિવારની મહિલાઓ અને યુવતીઓ સામેલ હતી. આરોપીએ આ સભ્યોની મજબૂરી અને ભરોસાનો ગેરલાભ ઉઠાવીને જીમમાં છૂપા કેમેરા ગોઠવ્યા હતા અને મહિલાઓના અંગત વીડિયો-ફોટા રેકોર્ડ કર્યા હતા. આ ડિજિટલ સામગ્રીનો ઉપયોગ કરીને તે મહિલાઓ પાસે લાખો રૂપિયા પડાવતો હતો અને આ રીતે ભેગા કરેલા નાણાંનો ઉપયોગ ગેરકાયદેસર વ્યાજવટાવના ધંધામાં કરતો હતો.
પીડિત મહિલાની હિમ્મત અને પોલીસ કાર્યવાહી
સામાજિક બદનામીના ડરથી અનેક પીડિત મહિલાઓ ચૂપચાપ આ ત્રાસ સહન કરી રહી હતી અને પોલીસમાં જવાનું ટાળતી હતી. પરંતુ, આમાંથી એક મહિલાએ હિંમત દાખવીને સીધી જિલ્લા પોલીસ વડાને આ મામલાની વિગતવાર રજૂઆત કરી હતી. ફરિયાદ મળતા જ પોલીસ તંત્ર તાત્કાલિક એક્શન મોડમાં આવ્યું હતું અને ઘટનાની ગંભીરતાને ધ્યાને લઈ ASP વેદિકા બિહાની સહિતની પોલીસ ટીમે ખાનગી ડ્રેસમાં જીમ પર દરોડો પાડ્યો હતો.
ડિજિટલ પુરાવા જપ્ત અને મુખ્ય આરોપીની ધરપકડ
દરોડા દરમિયાન પોલીસે જીમ સંચાલકના મોબાઈલની વોટ્સએપ ચેટ, પેન ડ્રાઈવ અને સીસીટીવી કેમેરા સહિતના મહત્વપૂર્ણ ડિજિટલ પુરાવાઓ કબજે કર્યા છે. આ પુરાવાઓના આધારે મુખ્ય આરોપી આમીન મુલતાનીની ધરપકડ કરવામાં આવી છે. આ ઉપરાંત, જીમના ટ્રેનર અને અન્ય બે મહિલા કર્મચારીઓની સંડોવણી અંગે પણ પોલીસ દ્વારા સઘન પૂછપરછ હાથ ધરવામાં આવી રહી છે.
તંત્ર દ્વારા કડક પગલાં અને લોકઆક્રોશ
આ ગંભીર ઘટના સામે આવ્યા બાદ સ્થાનિક વહીવટી તંત્ર દ્વારા ત્વરિત અને કડક પગલાં લેવામાં આવ્યા છે. મહાનગરપાલિકાની ટીમે સ્થળ પર પહોંચીને બંને ‘ક્લબ 71’ જીમને તાત્કાલિક અસરથી સીલ કરી દીધા છે, જ્યારે PGVCL દ્વારા બંને સ્થળોના વીજ કનેક્શન પણ કાપી નાખવામાં આવ્યા છે. આ ઘટનાને કારણે સ્થાનિક હિન્દુ સંગઠનો અને મહિલાઓમાં ભારે રોષ જોવા મળી રહ્યો છે, અને સૌકોઈ આરોપી સામે કડકમાં કડક દાખલારૂપ કાર્યવાહી કરવાની માંગ કરી રહ્યા છે. પોલીસની આગળની તપાસમાં હજુ પણ મોટા ખુલાસા થવાની પૂરી શક્યતા છે.