બોટાદ જિલ્લાના ગઢડા તાલુકાના ઢસા વિસ્તારમાં આવેલી PGVCL કચેરીની કામગીરી સામે સવાલો ઊભા કરતો એક વીડિયો સોશિયલ મીડિયા પર વાયરલ થયો છે. જલાલપુર ગામના બે રહેવાસીઓને વીજ મીટર લગાવ્યા વગર અને વીજ કેબલ નાખવામાં આવી ન હોવા છતાં વીજ બિલ મળ્યું હોવાનો આક્ષેપ કરવામાં આવ્યો છે. આ ઘટનાને પગલે વીજ કંપનીની કામગીરી અને બિલિંગ પ્રક્રિયા અંગે ચર્ચા શરૂ થઈ છે.મળતી માહિતી મુજબ, જલાલપુર ગામના શૈલેષભાઈ કેશુભાઈ ડોડીયા અને ગોબરભાઈ કાળાભાઈ સોલંકીએ પોતાના ઘરના વપરાશ માટે નવા વીજ કનેક્શન મેળવવા અરજી કરી હતી. તેમના જણાવ્યા પ્રમાણે, કનેક્શન માટે વીજ થાંભલો ઊભો કરવામાં આવ્યો છે, પરંતુ હજુ સુધી કેબલ નાખવામાં આવી નથી અને વીજ મીટર પણ લગાવવામાં આવ્યું નથી.આ બંને ગ્રાહકોને રૂ. 818-818નું વીજ બિલ મળ્યું હોવાનો દાવો કરવામાં આવ્યો છે. ગ્રાહકોના જણાવ્યા અનુસાર, જ્યારે તેમના ઘરે વીજ મીટર જ લગાવવામાં આવ્યું નથી અને વીજ કનેક્શન કાર્યરત થયું નથી, ત્યારે બિલ કેવી રીતે જનરેટ થયું તે અંગે સવાલ ઊભો થાય છે.
આ મામલે ગ્રાહક દ્વારા વીડિયો બનાવીને સોશિયલ મીડિયા પર મૂકવામાં આવ્યો હતો, જે બાદ આ મુદ્દો ચર્ચામાં આવ્યો છે. જોકે, બિલ કયા સમયગાળાનું છે, તેમાં કયા પ્રકારના ચાર્જનો સમાવેશ થયો છે અને બિલિંગ સિસ્ટમમાં કોઈ ટેકનિકલ કે વહીવટી ભૂલ થઈ છે કે કેમ, તે અંગે હાલ સ્પષ્ટ માહિતી ઉપલબ્ધ નથી.