ઉત્તરાખંડના ઉત્તરકાશીમાં ગામલોકોનું માનવું છે કે, ટનલ ધરાશાયી થવા પાછળ સ્થાનિક દેવતા બાબા બૌખાનાગનો પ્રકોપ છે

ઉત્તરાખંડના ઉત્તરકાશીની ટનલમાં છેલ્લા સાત દિવસથી 41 મજૂરો ફસાયેલા છે. હાલમાં રેસ્ક્યૂ ધમધોકાર ચાલી રહ્યું છે તેમ છતાં પણ મજૂરોને બહાર કાઢવામાં સફળતા મળી નથી. આવા બધાની વચ્ચે ત્યાંના ગામલોકોએ એક હેરાનીભર્યો દાવો કર્યો છે.

ટનલ ટ્રેજેડી બાદ ગામલોકોનું માનવું છે કે, ટનલ ધરાશાયી થવા પાછળ સ્થાનિક દેવતા બાબા બૌખાનાગનો પ્રકોપ છે. બાબા બૌખાનાગના ગુસ્સાને કારણે આ ટનલ ધરાશાયી થઈ હતી, કારણ કે નિર્માણ કાર્યને કારણે તેમનું મંદિર તોડી પાડવામાં આવ્યું હતું. સ્થાનિકોએ જણાવ્યું હતું કે ચારધામ ઓલ વેધર રોડ પ્રોજેક્ટનું કામ ચાલી રહ્યું છે. આમાં ટનલ બનાવવામાં આવી હતી, જેનો એક ભાગ ધરાશાયી થયો હતો. કન્સ્ટ્રક્શન કંપનીએ મંદિર તોડી પાડ્યાના થોડા દિવસ બાદ ટનલ તૂટી પડવાના કારણે 41 કામદારો ફસાયા હતા. રેસ્ક્યૂના 7માં દિવસે ટનલની બહાર મંદિર બનાવવામાં આવી રહ્યું છે. એક બાજુ મશીનો અંદર લઈ જવામાં આવી રહ્યા છે, તો બીજી બાજુ મંદિર સ્થાપિત છે. આ મંદિરની સ્થાપના ટનલના મુખ પર કરવામાં આવી રહી છે. પ્રાર્થનાઓ કરવામાં આવી રહી છે.

ઉત્તરાખંડના ઉત્તરકાશીની ટનલમાં ફસાયેલા 41 મજૂરોને બચાવવા માટે હવે વર્ટિંકલ ડ્રીંલિંગ શરુ કરવામાં આવ્યું છે. છેલ્લા સાત દિવસથી મજૂરો અંદર ફસાયેલા છે પરંતુ હજુ સુધી તેમને બહાર કાઢી શકાયા નથી. મજૂરોને કાઢવા માટે હવે એક મોટું ઓપરેશન શરુ કરવામાં આવ્યું છે અને વર્ટિંકલ ડ્રીંલિગ શરુ કરાયું છે.

મજૂરોને બચાવવા માટે આંતરરાષ્ટ્રીય ટનલ નિષ્ણાત પ્રોફેસર આર્નોલ્ડ ડિક્સ ટીમ સાથે ભારત આવ્યાં છે. તેમણે કહ્યું કે અમારે 41 મજૂરોને બચાવવાના જ છે. પર્વતની ટોચ પરથી ટનલમાં 100 ફૂટ સુધીની ઊભી કવાયત કરવામાં આવશે. તેમણે એમ પણ કહ્યું હતું કે મેન્યુઅલ ટનલની પરંપરાગત પદ્ધતિ, જેનો ઉપયોગ મોટાભાગે હાઇડ્રોપાવર પ્રોજેક્ટ્સ અને ટનલ બનાવવા માટે થાય છે, તે કામદારોને બહાર કાઢવા માટે પણ અપનાવી શકાય છે. તે જ સમયે, નિષ્ણાતો તૂટેલા ખડકને ફરીથી ખડકમાં ફેરવવા માટે ઉચ્ચ તકનીકી પદ્ધતિઓનો ઉપયોગ કરવા પર વિચાર કરી રહ્યા છે. આર્નોલ્ડ ડિક્સે કહ્યું કે મજૂરોને બહાર કાઢવામાં હજુ 7 દિવસ જેટલો સમય લાગી શકે છે.

મજૂરો ટનલમાં ખૂબ ઊંડે ફસાયેલા છે અને ટનલ કાટમાળથી ભરાયેલી છે. અત્યાર સુધી રેસ્ક્યૂ ટીમ ધરાશાયી થયેલી ટનલમાંથી માત્ર 24 મીટર કાટમાળને જ બહાર કાઢી શકી છે. 17 નવેમ્બરના રોજ બપોરે લગભગ 2:45 વાગ્યે, પાંચમી પાઇપ ફીટ કરતી વખતે ટનલમાં જોરદાર તિરાડનો અવાજ સંભળાયો હતો, જેના પગલે બચાવ કામગીરી બંધ કરી દેવામાં આવી હતી.