નર્મદાના 8 વર્ષીય બાળકને મળ્યું નવું જીવન

નર્મદા જિલ્લાના નાંદોદ તાલુકાના ભૂછાડ ગામના નીલ વસાવાનું રાષ્ટ્રીય બાળ સ્વાસ્થ્ય કાર્યક્રમ-RBSK અંતર્ગત અમદાવાદની યુ.એન.મહેતા હોસ્પિટલમાં વિનામૂલ્યે હૃદયનું સફળ ઓપરેશન કરવામાં આવ્યું છે. શાળા આરોગ્ય તપાસણી દરમિયાન RBSK ટીમને નીલને હૃદયની તકલીફ હોવાનું જણાયું હતું. બાળકની માતા કલાવતીબેન વસાવાએ જણાવ્યું કે, ઓપરેશન પહેલા નીલને ધબકારા વધી જવા, યાદશક્તિ ઓછી થવી જેવી સમસ્યાઓ હતી. વળી, ઉંમર પ્રમાણે તેનું વજન અને ઊંચાઈ પણ ઓછા હતા. RBSK અંતર્ગત કામ કરતા મેડિકલ ઓફિસર ડો.તેજલ વસાવાએ જણાવ્યું હતુ કે, આ બાળકને શ્વાસોશ્વાસમાં મુશકેલી અને હાફ ચઢી જવાની સમસ્યા જણાઈ જેમાં અમને હૃદય સંબધિત તકલીફનું પ્રાથમિક અનુમાન કરવામાં આવ્યું હતું. આ બાળકને વધુ સારવાર માટે રાજપીપલા સિવિલ હોસ્પિટલમાં રિફર કરી પિડીયાટ્રીશન પાસે તપાસ કરાવતા ખ્યાલ આવ્યો કે, હદય સંબધિત તકલીફ ચોક્કસપણે છે. તેથી વધુ રીપોર્ટસ માટે વડોદરાની ગોત્રી હોસ્પિટલમાં રિફર કરવામાં આવ્યા અને ત્યાં રિપોર્ટસમાં ખબર પડી કે આ બાળકને ખરેખર હૃદયની ગંભીર તકલીફ છે.