ક્યાંક નેતાઓ સરકારી યોજનાઓમાં ભ્રષ્ટાચારના ગંભીર આરોપો લગાવીને પાર્ટી છોડી રહ્યા છે, તો ક્યાંક ભાજપની તાનાશાહી નીતિઓથી કંટાળીને, તો વળી ક્યાંક જૂના સંબંધો અને લાગણીઓને કારણે નેતાઓની કોંગ્રેસમાં ‘ઘરવાપસી’ થઈ રહી છે. એકસાથે આટલા બધા જિલ્લાઓમાં થયેલો આ પક્ષપલટો ભાજપ માટે મોટી ચિંતાનો વિષય બની ગયો છે.
દાહોદ ભાજપમાં ગાબડું: ભ્રષ્ટાચારના ગંભીર આરોપો
સૌથી પહેલા વાત કરીએ દાહોદ જિલ્લાની, તો અહીં ભાજપમાં મોટું ગાબડું પડ્યું છે. જાખલીયા જિલ્લા પંચાયત બેઠકના ભાજપના પૂર્વ સભ્ય મહેશ મછાર અને ઘોડીયા ગામના પૂર્વ સરપંચ મોહન ડામોર બંને કોંગ્રેસમાં જોડાઈ ગયા છે. કોંગ્રેસમાં આવતાની સાથે જ મહેશ મછારે ભાજપના નેતાઓ પર આકરા પ્રહારો કર્યા હતા. તેમણે ‘નળ સે જળ’ અને ‘મનરેગા’ જેવી સરકારી યોજનાઓમાં ભાજપના મંત્રીઓ અને ધારાસભ્યો પર મોટા પાયે ભ્રષ્ટાચાર કર્યો હોવાનો સનસનીખેજ આરોપ લગાવ્યો છે. સાથે જ તેમણે જણાવ્યું કે, આદિવાસી સમાજના પ્રશ્નોને સાચો અવાજ આપવા માટે જ તેમણે ભાજપને અલવિદા કહીને કોંગ્રેસની વિચારધારા અપનાવવાનો નિર્ણય લીધો છે.
સુરેન્દ્રનગરમાં કોળી સમાજના નેતાનું 50 કાર્યકરો સાથે જોડાણ
દાહોદ બાદ સુરેન્દ્રનગરમાં પણ ભાજપને મોટું નુકસાન વેઠવાનો વારો આવ્યો છે. લીંબડી તાલુકાના નાના ટીંબલા, અંકેવાડીયા સહિતના ગામોના આગેવાનો અને 50 થી વધુ યુવા કાર્યકર્તાઓ ભાજપ છોડીને કોંગ્રેસમાં જોડાયા છે. ખાસ કરીને, જિલ્લા પંચાયતના પૂર્વ સદસ્ય અને 52 ગામ કોળી સમાજના પ્રમુખ તેજાભાઈ મેટલીયાએ કોંગ્રેસનો હાથ પકડતા સ્થાનિક સમીકરણો બદલાયા છે. પૂર્વ ધારાસભ્ય અને સુરેન્દ્રનગર જિલ્લા કોંગ્રેસ સમિતિના પ્રમુખ નૌશાદ સોલંકીએ તેમને વિધિવત રીતે પક્ષમાં આવકાર્યા હતા. કોંગ્રેસમાં જોડાયેલા નેતાઓએ ભાજપની વધતી જતી તાનાશાહી અને વિકાસવિહિન નીતિઓ સામે ખુલ્લો અસંતોષ વ્યક્ત કર્યો છે.
મોરબીમાં મુકેશ ગામીની ‘ઘરવાપસી’
બીજી તરફ, મોરબી મહાનગરપાલિકાની ચૂંટણી પહેલાં પણ ભાજપને મોટો ફટકો પડ્યો છે. વર્ષ 2023 માં કોંગ્રેસ છોડીને ભાજપમાં ગયેલા મુકેશ ગામીએ ફરી એકવાર કોંગ્રેસમાં ‘ઘરવાપસી’ કરી લીધી છે. તેઓ 30 જેટલા કાર્યકર્તાઓની આખી ટીમ લઈને પાછા ફર્યા છે. કોંગ્રેસ નેતા મહેશ રાજપૂત અને જિલ્લા પ્રમુખ નયનભાઈ અઘારાએ તેમને હર્ષભેર આવકાર્યા હતા. પોતાની આ ઘરવાપસી અંગે મુકેશ ગામીએ બહુ સૂચક નિવેદન આપતા કહ્યું કે, “ક્ષણભરનો ક્રોધ હંમેશા નુકસાન કરે છે.” તેમણે જણાવ્યું કે સ્વર્ગસ્થ કિશોરભાઈ ચીખલીયાની એવી લાગણી હતી કે તેઓ પક્ષમાં પાછા આવી જાય, તેથી તેમને સાચી શ્રદ્ધાંજલિ આપવા માટે જ તેમણે ફરીથી કોંગ્રેસનો હાથ પકડ્યો છે.
પાટણમાં ભાજપના પૂર્વ ડેલિગેટના સસરા કોંગ્રેસમાં જોડાયા
આ સિલસિલો પાટણ જિલ્લામાં પણ જોવા મળ્યો છે. રાધનપુર તાલુકા પંચાયતના ભાજપના પૂર્વ ડેલિગેટ મધાભાઈ ચૌધરી પણ કોંગ્રેસમાં જોડાઈ ગયા છે. મધાભાઈનો પરિવાર ભાજપ સાથે ગાઢ રીતે જોડાયેલો રહ્યો છે; તેમની ટર્મ પૂરી થયા બાદ તેમના પુત્રવધૂ ભારતીબેન પણ કોલીવાડા જિલ્લા પંચાયત બેઠક પરથી ભાજપના ડેલિગેટ રહી ચૂક્યા છે. આમ, સ્થાનિક ચૂંટણીઓ પહેલાં ગામે-ગામથી ભાજપના વરિષ્ઠ સ્થાનિક આગેવાનોનું કોંગ્રેસ તરફ વળવું એ દર્શાવે છે કે જમીની સ્તરે રાજકીય પવનની દિશા બદલાઈ રહી છે.