ઈરાન યુદ્ધ દરમિયાન કાચા તેલના સપ્લાય પર આવેલા સંકટ બાદ ભારતે એનર્જી સિક્યોરિટી મજબૂત કરવાની દિશામાં મોટું પગલું ભર્યું છે. સરકારી કંપની ONGC એ કર્ણાટકના મંગલુરુમાં સ્ટ્રેટેજિક ક્રૂડ ઓઈલ રિઝર્વ વધારવાની મંજૂરી આપી દીધી છે.
આ પ્રોજેક્ટ અંતર્ગત 17.5 લાખ ટનની નવી રિઝર્વ ક્ષમતા વિકસાવવામાં આવશે. સરકારનું માનવું છે કે, આનાથી ભવિષ્યમાં કોઈ પણ વૈશ્વિક સંકટ દરમિયાન દેશમાં કાચા તેલની ઉપલબ્ધતા જળવાઈ રહેશે.મંગલુરુમાં બનશે નવું ‘સ્ટ્રેટેજિક ઓઈલ રિઝર્વ’
રિપોર્ટ અનુસાર, કર્ણાટકના મંગલુરુમાં 17.5 લાખ ટનની ક્ષમતાવાળા નવા સ્ટ્રેટેજિક ક્રૂડ ઓઈલ રિઝર્વને મંજૂરી આપવામાં આવી છે. આ પ્રોજેક્ટ અંતર્ગત અંડરગ્રાઉન્ડ રિઝર્વ સુવિધા વિકસાવવામાં આવશે. જો કે, કંપનીએ હજુ આના ખર્ચ અને પ્રોજેક્ટ પૂરો થવાની સમય મર્યાદા વિશે માહિતી આપી નથી. આ ભંડાર દેશની એનર્જી સિક્યોરિટીને મજબૂત કરવામાં મહત્વની ભૂમિકા ભજવશે.
ઈરાન યુદ્ધ બાદ લેવાયો ‘નિર્ણય’
તાજેતરમાં ઈરાન યુદ્ધ દરમિયાન હોર્મુઝ સ્ટ્રેટ (Strait of Hormuz) લગભગ બંધ થવાની સ્થિતિમાં પહોંચી ગયું હતું. આનાથી ભારત સહિત ઘણા દેશો માટે કાચા તેલનો સપ્લાય પ્રભાવિત થયો હતો.
ભારત પોતાની જરૂરિયાતનો મોટો હિસ્સો પશ્ચિમ એશિયામાંથી આયાત કરે છે. આ અનુભવ બાદ સરકાર અને ONGC એ વ્યૂહાત્મક (સ્ટ્રેટેજિક) તેલ રિઝર્વ ક્ષમતા વધારવાનો નિર્ણય લીધો છે, જેથી ભવિષ્યમાં આવા સંકટની અસર ઓછી કરી શકાય.
દેશની ઓઈલ રિઝર્વ ક્ષમતા થશે ‘મજબૂત’
હાલમાં Indian Strategic Petroleum Reserves Limited પાસે દેશના ત્રણ સ્થળો પર કુલ 53.3 લાખ ટનની સ્ટ્રેટેજિક રિઝર્વ ક્ષમતા છે. આ સિવાય 65 લાખ ટનની ક્ષમતાવાળા બે નવા રિઝર્વ પણ તૈયાર કરવામાં આવી રહ્યા છે. ONGC નો નવો પ્રોજેક્ટ પૂરો થયા બાદ દેશની કુલ સ્ટ્રેટેજિક રિઝર્વ ક્ષમતામાં વધુ વધારો થશે.