આજના ડિજિટલ યુગમાં સોશિયલ મીડિયા દ્વારા સાયબર ગુનેગારો લોકોને સહેલાઈથી ટાર્ગેટ બનાવી રહ્યા છે. સુરતમાં આવી જ એક મોટી ઓનલાઈન છેતરપિંડીની ઘટના સામે આવી છે, જેમાં શેર માર્કેટ અને ફોરેક્સ ટ્રેડિંગના નામે રોકાણ કરાવી એક નાગરિક પાસેથી રૂ. 46.16 લાખ પડાવી લેવામાં આવ્યા છે. આરોપીએ ભોગ બનનારને સોશિયલ મીડિયા પ્લેટફોર્મ પર ઊંચા વળતરની મોટી-મોટી લાલચો આપીને પોતાની જાળમાં ફસાવ્યો હતો.સાયબર ગઠિયાએ ફરિયાદીનો વિશ્વાસ જીતવા માટે શેર માર્કેટની આબેહૂબ બનાવટી વેબસાઈટ તૈયાર કરી હતી. આ નકલી વેબસાઈટના માધ્યમથી ફરિયાદીને ડિજિટલ પોર્ટફોલિયો બતાવી ખોટો પ્રોફિટ દર્શાવવામાં આવતો હતો. આ લાલચમાં આવીને ફરિયાદીએ ટુકડે-ટુકડે કુલ રૂ. 46,16,000નું રોકાણ કરી દીધું હતું. જોકે, જ્યારે ફરિયાદીએ પોતાના પૈસા પાછા મેળવવાનો પ્રયાસ કર્યો, ત્યારે આરોપીએ સંપર્ક તોડી નાખ્યો હતો.
1930 હેલ્પલાઈન પર ફરિયાદ બાદ પોલીસ એક્શનમાં
પોતાની સાથે છેતરપિંડી થઈ હોવાનો અહેસાસ થતાં જ ભોગ બનનારે તુરંત સમય સૂચકતા વાપરીને ભારત સરકારની સાયબર હેલ્પલાઈન નંબર ‘1930’ પર ફરિયાદ નોંધાવી હતી. આ ફરિયાદના આધારે સુરત સાયબર ક્રાઈમ સેલની ટીમે ટેકનિકલ સોર્સિસ અને બેંક ખાતાઓની કડીઓ મેળવીને તપાસનો ધમધમાટ શરૂ કર્યો હતો. સચોટ તપાસના અંતે પોલીસે આ ગુનામાં સંડોવાયેલા આરોપી અવિનિક વઘાસિયાને દબોચી લીધો છે.
બેંકમાંથી નાણાં ઉપાડી મુખ્ય સૂત્રધારો સુધી પહોંચાડતો હતો
પોલીસની પ્રાથમિક પૂછપરછમાં સામે આવ્યું છે કે, પકડાયેલો આરોપી અવિનિક વઘાસિયા આ આખા કૌભાંડમાં કમિશન એજન્ટ તરીકે કામ કરતો હતો. સાયબર ફ્રોડ દ્વારા મેળવેલા નાણાં જે બેંક એકાઉન્ટમાં ટ્રાન્સફર થતા હતા, તેમાંથી રોકડા ઉપાડીને તે આ કૌભાંડના મુખ્ય સૂત્રધારો સુધી પહોંચાડવાનું કામ કરતો હતો. હાલ સાયબર પોલીસે અવિનિકની ધરપકડ કરી તેના રિમાન્ડ મેળવવાની અને આ ટોળકીના મુખ્ય માસ્ટરમાઇન્ડ સુધી પહોંચવા માટેની આગળની કાર્યવાહી હાથ ધરી છે.